7
Yuj chiꞌ,
ex xajanabꞌil vuuj,
aton juntzan̈ tic yalnaccan Dios dꞌayon̈.
Yuj chiꞌ co vachꞌ actejeccan masanil juntzan̈ tzꞌacꞌan juvoquel co nivanil yedꞌ co pensar dꞌa yichan̈ Dios.
Caqꞌuec val quip co vachꞌ acꞌanoch co pensar dꞌa Dios,
yujto te ay yelcꞌoch dꞌayon̈.
Ochnac scuscꞌolal ebꞌ aj Corinto
2 Aqꞌuec och e cꞌool dꞌayon̈.
Malaj junoc ex bꞌaj ochnac co mul.
Malaj junoc ex co junaquel e pensar.
Malaj pax junoc ex co qꞌuexan̈ tiejnac ex.
3 Man̈ yujoc vacꞌanoch junoc tas dꞌa eyibꞌan̈ svalanbꞌat juntzan̈ tic dꞌayex.
Yujto toxo ix val dꞌayex to te naan ex cuuj.
Yuj chiꞌ,
vachꞌchom pitzan on̈,
mato tzon̈ chami,
palta junn̈ej caj eyedꞌoc.
4 Tzex vacꞌoch yipoc in cꞌool,
tzex valan vachꞌil.
Vachꞌchom nivan yaelal tzꞌacꞌjioch dꞌa quibꞌan̈,
palta eyuuj snivanaj in cꞌool svabꞌi.
Tzin tzalaj val eyuuj.
5 Yictax ix on̈ javi dꞌa Macedonia tic,
maxtzac yal quicꞌan jabꞌoc quip,
yujto a juntzan̈ yaelal tic oyanoch dꞌa co patic quichan̈.
An̈ej oval tzꞌacꞌjioch dꞌa quibꞌan̈.
Xivelaln̈ej caji.
6 Palta a Dios tzꞌacꞌan snivanil scꞌool jantac mach ayoch dꞌa scuscꞌolal.
A ix acꞌan snivanil co cꞌool,
yujto ix ja vin̈aj Tito dꞌa tic.
7 Man̈ yujocn̈ej to ix ja vin̈aj Tito chiꞌ ix acꞌji snivanil in cꞌool,
palta tzon̈ tzalaj pax eyuuj,
yujto ix eyacꞌ snivanil scꞌool vin̈ ayic ix ecꞌ vin̈ dꞌayex.
Ix yalan vin̈ dꞌayon̈ to e gana tzin e yilaꞌ.
Ix yalanpax vin̈ to tzex cus val yuj jun ix uji dꞌa e cal chiꞌ.
Ix yalanpax vin̈ to tzin e nacoti.
Yuj chiꞌ ix vachꞌ ja in tzalajcꞌolal eyuuj.
8 Vachꞌchom te cusnac ex yuj jun carta in tzꞌibꞌejnacbꞌat dꞌayex,
palta maxtzac in cus yuuj ticnaic.
Vachꞌchom dꞌa sbꞌabꞌelal cusnac in yuj jun carta chiꞌ,
yujto vabꞌnac to cusnac ex jayeꞌ cꞌual yuuj.
9 Axo ticnaic,
tzin tzalaji man̈ yujoc to cusnac ex yuuj,
palta tzin tzalaj ticnaic,
yujto yuj jun e cuscꞌolal chiꞌ ix e na e bꞌa.
Ix ex cus icha val dꞌa sgana Dios,
yuj chiꞌ man̈ jabꞌoc ix juviel e pensar vuuj.
10 Tato tzon̈ cus icha val sgana Dios,
yuj jun co cuscꞌolal chiꞌ sco na co bꞌa yic tzon̈ colchaji.
Tato icha chiꞌ,
max on̈ te cuslaj yuuj.
Palta ay junxo macan̈ cuscꞌolal.
A jun chiꞌ,
yic yolyibꞌan̈qꞌuinal tic yaji.
A ebꞌ scus icha chiꞌ,
ton̈ej sbꞌatcan ebꞌ dꞌa chamel dꞌa juneln̈ej yuuj.
11 Palta a exxo tic,
ochnac e cuscꞌolal icha sgana Dios.
Yuj chiꞌ naeccoti tas ajnac ex yuuj.
Ochnac ex val dꞌa ilcꞌolal sicꞌlabꞌil.
E sayannac modo tas tzꞌaj e colan e bꞌa.
Cotnac eyoval yuj jun chucal ujinac dꞌa e cal chiꞌ,
xivnac ex pax yuuj.
E nibꞌejnac val in e cꞌumej.
E nanac eyacꞌbꞌat dꞌa yibꞌan̈ jun vin̈ ochnac smul chiꞌ.
Icha chiꞌ eyutejnac e chꞌoxani to man̈xo ex locanoc dꞌa jun chucal chiꞌ.
12 A jun in carta chiꞌ,
man̈ yujoc jun vin̈ ochnac smul chiꞌ in tzꞌibꞌejnacbꞌati.
Man̈ yujoc pax jun mach yabꞌnac syail yuj jun chucal chiꞌ.
Palta in tzꞌibꞌejnacbꞌat dꞌayex yic snachajel eyuuj to a dꞌa yichan̈ Dios,
te xajan on̈ eyuuj.
13 Yuj chiꞌ ix acꞌji snivanil co cꞌool.
Man̈ocn̈ej ix acꞌji snivanil co cꞌool.
Ix vachꞌ ja pax co tzalajcꞌolal ayic ix yalan vin̈aj Tito to ix te tzalaj vin̈ eyedꞌoc,
yujto ix vachꞌ ja snivanil scꞌool vin̈ eyuuj e masanil.
14 A dꞌa yalan̈,
ix valel e vachꞌil dꞌa vin̈aj Tito tic.
Axo ticnaic,
max in qꞌuixvi,
yujto valnac jun chiꞌ.
Masanil tas calnac dꞌayex,
te yel.
An̈ejtonaꞌ,
ayic scalan e vachꞌil dꞌa vin̈aj Tito tic,
te yel juntzan̈ scal chiꞌ.
15 A vin̈ tic,
te xajan exxo pax yuj vin̈ ticnaic,
yujto snacot vin̈ tas eyutejnac e cꞌanabꞌajan tas yalnac vin̈ dꞌayex.
Snaanpaxcot vin̈ to emnaquil eyutejnac e bꞌa e chaan vin̈,
xivcꞌolal eyutejnac e bꞌa dꞌa vin̈.
16 Tzin tzalaj ticnaic,
yujto syal ex vacꞌanoch yipoc in cꞌool.