6
A on̈ tic quetmunlajvumal co bꞌa dꞌa smunlajel Dios,
yuj chiꞌ tzon̈ tevi dꞌayex to max e patiquejel-laj svachꞌcꞌolal ix yacꞌ dꞌayex.
2 Yujto Aꞌ alannaccan icha tic dꞌa Slolonel Tzꞌibꞌabꞌilcani:
A dꞌa jun tiempoal vachꞌ,
ix vabꞌi tas ix alaꞌ.
Yedꞌ dꞌa stiempoal yacꞌji colnabꞌil ix in och edꞌoc,
xchi Dios.
A ticnaic,
toxo ix ja jun tiempoal vachꞌ yalnaccan chiꞌ.
Toxo ix ja pax stiempoal yacꞌji co colnabꞌil chiꞌ ticnaic.
3 Malaj bꞌaj chuc scutej co bꞌa dꞌa junoc mach,
yic malaj mach sbꞌuchan co munlajel.
4 Masanil tiempo sco chꞌoxel co vachꞌ bꞌeybꞌal,
yujto schecabꞌ Dios caji.
Tecꞌtecꞌ scutej co bꞌa cacꞌan techaj juntzan̈ yaelal,
juntzan̈ co tzapanil co majanil yedꞌ juntzan̈ tas sja dꞌa quibꞌan̈.
5 Ay bꞌaj tzon̈ macꞌji,
tzon̈ acꞌjioch dꞌa preso.
Ay bꞌaj sqꞌue bꞌulnaj ebꞌ anima cuuj.
Ay bꞌaj tzꞌel quip co munlaji.
Ay bꞌaj max on̈ vaylaj.
Ay bꞌaj scacꞌ techaj vejel.
6 Scheclajeli to schecabꞌ Dios caji yujto te tojoln̈ej scutej co pensar,
cojtacxo juntzan̈ schꞌoxnaccan Dios chiꞌ,
nivan scutej co cꞌool,
vachꞌ scutej co pensar,
axo Yespíritu Dios ayoch dꞌayon̈,
dꞌa val yel xajan ebꞌ anima cuuj.
7 A jun cꞌaybꞌubꞌal scalel tic,
te yel.
Ayoch spoder Dios quedꞌoc.
Icha junoc soldado scol sbꞌa yedꞌ juntzan̈ syamcꞌabꞌ,
syacꞌlabꞌan pax yacꞌan oval,
icha chiꞌ scutej co bꞌa,
yujto te tojol scutej co pensar.
8 Ay bꞌaj ay quelcꞌoch dꞌa sat ebꞌ anima,
ay pax bꞌaj malaj tzon̈ ochi.
Ay bꞌaj tzon̈ alji vachꞌil,
ay pax bꞌaj tzon̈ bꞌuchji.
Ay ebꞌ snaani to ton̈ej squesej,
palta yel scalaꞌ.
9 Syalan ebꞌ to man̈ on̈ yojtacoc ebꞌ,
palta ojtacabꞌil on̈.
Ay bꞌaj tzon̈ acꞌjioch dꞌa yol scꞌabꞌ chamel,
palta an̈ejaꞌ pitzan on̈.
Tzꞌacꞌjioch co yaelal,
palta max on̈ chamlaj.
10 Vachꞌchom tzꞌacꞌji co cuscꞌolal,
palta masanil tiempo tzon̈ tzalaji.
Vachꞌchom mebꞌaꞌ on̈,
palta tzijtum ebꞌ sbꞌeyumaxcan cuuj.
Vachꞌchom malaj tas ay dꞌayon̈,
palta icha val to quic tastac smasanil.
11 A exxo ex aj Corinto,
syaln̈ej calan dꞌayex.
Masanil tas ay dꞌa co pensar ix cal dꞌayex.
12 Malaj junoc tas ix co cꞌubꞌejeli.
Palta a ex tic,
ay juntzan̈ tas tze cꞌubꞌejel dꞌayon̈.
13 Icha stevi junoc mamabꞌil dꞌa ebꞌ yuninal,
icha chiꞌ tzꞌaj in tevi dꞌayex to tze jac e pensar dꞌayon̈,
icha ix cutej co jacan quic dꞌayex.
Stemplo on̈ Dios pitzan
14 Max yal junn̈ej scutej co bꞌa yedꞌ ebꞌ man̈ creyenteoc,
yujto man̈ smojoc icha chiꞌ.
Icha saquilqꞌuinal max yal junn̈ej tzꞌaj yedꞌ qꞌuicꞌalqꞌuinal,
icha pax chiꞌ tojolal,
max scha sbꞌa yedꞌ chucal.
15 A spensar Cristo,
max scha sbꞌa yedꞌ yic vin̈ Satanás.
A on̈ creyente on̈ tic,
man̈ lajanoc co pensar yedꞌ ebꞌ man̈ creyenteoc.
16 A juntzan̈ comon dios,
malaj yalan yic yedꞌ ebꞌ scajnubꞌxo Dios yaji.
Yujto a on̈ tic,
scajnubꞌ on̈xo Dios pitzan,
icha ix yalcani:
A in tic,
ol in och cajan dꞌa ebꞌ,
ol in bꞌeyecꞌ yedꞌ ebꞌ.
Ol in och sDiosaloc ebꞌ.
Axo ebꞌ ol och in chon̈abꞌoc,
xchi.
17 Yuj chiꞌ yalnacpaxcan Dios Cajal chiꞌ icha tic:
Elan̈ec dꞌa scal ebꞌ,
iqꞌuec el e bꞌa.
Man̈ eyam pax junoc malaj svachꞌil.
Tato icha chiꞌ tzeyutej e cꞌanabꞌajani,
ol ex in cha vicoc.
18 Ol in och e Mamoc.
A exxo ol ex och vuninaloc,
visiloc,
xchi Cajal chiꞌ,
aton Dios masanil tas syal yuuj,
xchi dꞌa Slolonel Tzꞌibꞌabꞌilcan chiꞌ.