5
A jun co nivanil tic,
lajan yaj yedꞌ cꞌapac mantiado,
junn̈ej rato tzꞌixtaxi.
Cojtac to ayic ol lajvoquecꞌ jun co nivanil tic,
ay junxo ol yacꞌ Dios dꞌayon̈ dꞌa satchaan̈.
A jun chiꞌ malaj bꞌaqꞌuin̈ ol sateloc.
Lajan icha junoc pat vachꞌ yaj sbꞌocani,
aton jun man̈oc anima bꞌoannac,
palta aton val Dios bꞌoannac.
2 Yel toni,
yacbꞌan ay on̈ ecꞌ dꞌa jun co nivanil tic,
tzon̈ cꞌacvi yedꞌoc,
yujto co gana tzꞌacꞌji junxo yic satchaan̈ dꞌayon̈,
aton junocxo icha pat.
3 Ol acꞌjoc jun chiꞌ dꞌayon̈,
ichato spichul co pixan ol ajoc,
yic man̈xo ol el bꞌeran.
4 Ayic aytooch jun co nivanil tic,
tzon̈ cꞌacvi,
scabꞌan pax syail yedꞌoc.
Mantoc co gana tzꞌicꞌjiecꞌ jun co nivanil tic,
palta to co gana tzꞌacꞌji junxo co nivanil,
yic ol co cha co qꞌuinal dꞌa juneln̈ej.
A jun chiꞌ ol co chaꞌa,
ayic ol satel jun chamelbꞌa yaj tic.
5 Ix on̈ sbꞌocan Dios yujn̈ej val jun tic,
ix yacꞌanpaxoch Yespíritu dꞌayon̈,
yic scojtaquejeli to dꞌa val yel ol co cha jun tic dꞌay.
6 Yuj chiꞌ,
scacꞌoch Dios yipoc co cꞌool dꞌa masanil tiempo.
Cojtac to yacbꞌan ayto ecꞌ co pixan dꞌa jun co nivanil tic,
manto on̈ ayoc ecꞌ dꞌa co pat,
aton jun bꞌaj ayecꞌ Cajal Jesús.
7 Ayic tzon̈ ecꞌ dꞌa yolyibꞌan̈qꞌuinal tic,
an̈ej dꞌa Dios scacꞌoch co pensar.
Man̈oc juntzan̈ tas squil yedꞌ co sat bꞌaj scacꞌoch co pensar.
8 Yuj chiꞌ a Dios scacꞌoch yipoc co cꞌool.
Dꞌa val yel co gana scactejcan jun co nivanil tic,
yic ol yal co cꞌoch dꞌa junxo co pat bꞌaj ayecꞌ Cajal Jesús.
9 Yuj chiꞌ sco say tas vachꞌ scutej co bꞌa,
yic ol tzalaj Cajal Jesús chiꞌ quedꞌoc,
vachꞌchom ayon̈ to ecꞌ yedꞌ co nivanil tic,
mato toxo ix on̈ cꞌoch bꞌaj ay Co Mam Dios.
10 Yujto yovalil ol on̈ cꞌoch dꞌa yichan̈ sdespacho Cristo,
yic junjun on̈ ol co cha spac tastac ix co cꞌulej yacbꞌan ay on̈ ecꞌ yedꞌ jun co nivanil tic,
tato ay ix och tas ix co cꞌulej chiꞌ,
mato maay.
A yabꞌixal yic juncꞌolal
11 A on̈xo tic,
scojtaquejel xivcꞌolal dꞌa Cajal Jesús,
yuj chiꞌ scacꞌ val quip quecan sna ebꞌ anima.
A Dios yojtac tas yaj co pensar.
A exxo,
co gana tzeyojtaquej pax eli tas yaji.
12 Mantoc ton̈ej scal co bꞌa vachꞌil dꞌayex junelxo.
Palta co gana tzex tzalaj quedꞌoc,
yic ol yal e pacan e bꞌa dꞌa juntzan̈ ebꞌ ton̈ej scomon iqꞌuejchaan̈ sbꞌa yuj juntzan̈ tas scheclajel dꞌa co sat.
Axo tas ay dꞌa spensar ebꞌ,
max snalaj ebꞌ tato vachꞌ,
mato chuc.
13 A on̈xo tic,
tato ichato ay tas tzꞌixtan yol co jolom eyilani,
yuj cacꞌan servil Dios icha chiꞌ tzon̈ aji.
Palta dꞌa val yel vachꞌ co pensar.
Icha chiꞌ tzon̈ aji yuj ex cacꞌan servil.
14 Yujto xajan Cristo cuuj,
yuj chiꞌ scacꞌ pural co bꞌa cacꞌan servil.
Yujto ix cham cuuj co masanil,
yuj chiꞌ ichato ix on̈ champax yedꞌoc.
15 A Cristo ix cham cuuj co masanil,
yic vachꞌ a on̈ pitzan on̈ tic,
maxtzac cacꞌ co gana junjun on̈.
Palta yic scacꞌ sgana jun ix chami ix acꞌjixi pitzvoc yuj Dios cuuj.
16 Yuj chiꞌ a on̈ tic,
maxtzac yal calubꞌtan̈an junoc mach yuj tas scheclaj dꞌay.
Vachꞌchom a dꞌa yalan̈,
ix calubꞌtan̈ej Cristo yuj tas chequel dꞌay,
palta a ticnaic,
man̈xo ichoc taꞌ tzꞌaj co naan dꞌa spatic.
17 A mach junxon̈ej tzꞌaj yedꞌ Cristo,
toxo ix qꞌuexmaj spensar,
ichato ix och acꞌ animail.
A juntzan̈ pecaꞌ bꞌeybꞌal,
toxo ix lajvi eqꞌui.
Toxo ix acꞌbꞌixican smasanil.
18 Masanil juntzan̈ sval tic,
a Dios ix bꞌoancan dꞌayon̈.
Yuj Cristo ix on̈ yacꞌoch Dios dꞌa juncꞌolal yedꞌoc.
A acꞌjinac copisio calaneli tas tzꞌaj yoch ebꞌ anima juncꞌolal yedꞌoc.
19 A jun tic syalelcꞌochi to a Dios ayoch yedꞌ Cristo,
ayic ix uleqꞌui,
yic tzꞌoch ebꞌ anima masanil juncꞌolal yedꞌoc.
Maxtzac acꞌjioch co mul dꞌa quibꞌan̈ yuj Dios.
A acꞌjinaccan jun abꞌix tic dꞌa yol co cꞌabꞌ,
yic tzecꞌ caleli chajtil tzꞌaj yoch ebꞌ anima juncꞌolal yedꞌoc.
20 Yuj chiꞌ schecabꞌ ton Cristo caji.
Icha val to a Dios van stevioch dꞌayex ayic scalan juntzan̈ tic.
Yuj chiꞌ,
sqꞌuexul Cristo caji,
tzon̈ tevi dꞌayex to tzex och juncꞌolal yedꞌ Dios.
21 A Cristo,
malaj jabꞌoc chucal scꞌulejnac.
Palta a Dios acꞌjinacoch masanil co mul dꞌa yibꞌan̈,
yuj chiꞌ syal Dios to vachꞌ on̈xo dꞌa yichan̈,
yujto junxon̈ej caj yedꞌ Cristo.