4
Yujto tzꞌocꞌ scꞌool Dios dꞌayon̈ ix yacꞌan jun copisio tic,
yuj chiꞌ max tac co cꞌool dꞌay.
2 Ay juntzan̈ tas scꞌulej ebꞌ anima dꞌa elcꞌaltac,
yujto qꞌuixvelal yaji.
A on̈xo tic,
sco chaquel juntzan̈ bꞌeybꞌal chiꞌ dꞌa juneln̈ej.
Max cacꞌlaj musansatil ebꞌ anima yuj juntzan̈ tas jelan scutej calani.
Max co qꞌuex jabꞌoc tas syalcan Dios,
yujto an̈ej val juntzan̈ tas yel,
aton scalaꞌ.
Icha chiꞌ scutej co chꞌoxanel copisio dꞌa junjun anima dꞌa yichan̈ Dios,
yic snachajel yuj ebꞌ tas caji.
3 Ayic tzecꞌ calanel jun vachꞌ abꞌix yic colnabꞌil,
a ebꞌ vanto sateqꞌui,
max nachajel-laj yuj ebꞌ.
4 A ebꞌ chiꞌ max yacꞌochlaj ebꞌ dꞌa scꞌool,
yujto a vin̈ sdiosal jun yolyibꞌan̈qꞌuinal tic tzꞌacꞌan juvoc spensar ebꞌ.
Ichato a vin̈ tzꞌacꞌan juvoc yol sat ebꞌ,
yic max och saquilqꞌuinal dꞌa spensar ebꞌ yuj jun abꞌix tzꞌalani to a Cristo te nivan yelcꞌochi,
yuuj paxi scheclajeli chajtil yaj Dios.
5 Ayic tzon̈ ecꞌ caleli,
man̈oc cabꞌixal tzecꞌ caleli.
Palta an̈ej tic scalaꞌ,
a Jesucristo Cajal yaji.
Scalan paxi to a on̈ tic tzex cacꞌ servil yujto sco xajanej Jesús.
6 A Dios alannaccani:
Ayocabꞌ saquilqꞌuinal dꞌa scal qꞌuicꞌalqꞌuinal tic,
xchi.
A val tzꞌacꞌanoch saquilqꞌuinal dꞌa co pensar yic vachꞌ scojtaquejeli to te nivan svachꞌilal Dios.
A dꞌa Jesucristo,
ataꞌ scheclajel svachꞌilal Dios chiꞌ.
Axon̈ej Dios scacꞌoch yipoc co cꞌool
7 A jun copisio nivan yelcꞌoch tic,
aꞌ ayoch dꞌayon̈,
palta a on̈ tic lajan on̈ icha junoc lum chen,
yujto malaj vachꞌ cochi,
yuj chiꞌ scheclajeli to a jun nivan poder tic,
an̈ej dꞌa Dios scoti,
man̈ quicoc.
8 Vachꞌchom oyanoch yaelal dꞌa co patic quichan̈,
palta max on̈ canlaj dꞌa yalan̈ yuuj.
Vachꞌchom somcꞌolal caji,
palta max co vachꞌ aqꞌuej somchajel co bꞌa.
9 Vachꞌchom tzon̈ pechji bꞌeyecꞌ bꞌaj tzon̈ bꞌeyeqꞌui,
palta man̈ on̈ actabꞌiloccani.
Vachꞌchom tzon̈ macꞌji telvoc,
palta max on̈ chamlaj.
10 Masanil bꞌajtac tzon̈ eqꞌui,
scabꞌn̈ej syaelal yedꞌ co nivanil tic,
icha ajnac yabꞌan syail Jesús ayic schamnac.
Icha chiꞌ tzon̈ aji,
yic scheclajeli to a sqꞌuinal Jesús ayoch dꞌayon̈.
11 Yacbꞌan pitzan on̈,
masanil tiempo ayoch chamel dꞌa quibꞌan̈,
yujto junxon̈ej caj yedꞌ Jesús,
yic vachꞌchom chamelbꞌa yaj co nivanil tic,
van scheclajel sqꞌuinal Jesús dꞌay.
12 Yuj chiꞌ a on̈ tic,
ayxo och chamel dꞌa quibꞌan̈.
A exxo pax tic,
ayxo e qꞌuinal dꞌa juneln̈ej.
13 A dꞌa Slolonel Dios Tzꞌibꞌabꞌilcani ay jun syalcan icha tic:
Ix vacꞌoch dꞌa in cꞌool,
yuj chiꞌ ix valeli,
xchi.
A on̈xo tic,
lajan scutej cacꞌanoch dꞌa co cꞌool yedꞌ ebꞌ.
Scalpaxeli,
yujto ix cacꞌoch dꞌa co cꞌool.
14 Cojtac to a jun ix acꞌan pitzvoc Cajal Jesús dꞌa scal ebꞌ chamnac,
Aꞌ ol on̈ acꞌanxi pitzvoc yuj Jesús.
Ol ex pitzvocpax quedꞌoc,
axo on̈ yicꞌanbꞌat chiꞌ bꞌaj ayeqꞌui.
15 Masanil juntzan̈ sval tic,
eyuuj ix acꞌjioch dꞌa quibꞌan̈.
Icha chiꞌ tzon̈ utaji,
yic tzijtum ebꞌ ol chaan svachꞌcꞌolal Dios.
An̈ejtonaꞌ tzijtum pax ebꞌ ol acꞌan yuj diosal dꞌay.
Yuj chiꞌ scheclajeli to nivan svachꞌilal Dios.
16 Yuj chiꞌ,
malaj bꞌaj staquel co cꞌool.
Vachꞌchom van yichamax jun co nivanil tic,
palta a co pensar junjun cꞌu stecꞌcꞌaji.
17 A juntzan̈ yaelal sja dꞌa quibꞌan̈,
malaj yelcꞌoch dꞌayon̈,
yujto elan̈chamel tzꞌecꞌbꞌati.
Palta yuuj ol co cha jun te nivan yelcꞌochi.
A jun chiꞌ man̈ jantacoc svachꞌil,
ayn̈ejecꞌ dꞌa juneln̈ej.
18 Max cacꞌoch co pensar dꞌa juntzan̈ tas squilaꞌ,
yujto a juntzan̈ tas squil tic elan̈chamel tzꞌecꞌbꞌati.
A dꞌa juntzan̈ tas max quilaꞌ,
ataꞌ scacꞌoch co pensar,
yujto a juntzan̈ max quil chiꞌ,
ayn̈ejecꞌ dꞌa juneln̈ej.