A yabꞌixal jun schabꞌil strato Dios
3
Ayic scalanbꞌat juntzan̈ tic dꞌayex,
¿tom tze naꞌ to scal co bꞌa vachꞌilal dꞌayex junelxo?
Man̈ yovaliloc sco chꞌox juntzan̈ carta dꞌayex tzꞌalani tas copisio,
icha syutej sbꞌa juntzan̈xo ebꞌ.
An̈ejtonaꞌ,
man̈ yovaliloc sco cꞌancot e carta,
tzeyalancoti to ay copisio dꞌa eyichan̈.
2 Yujto a ex val van e chꞌoxaneli to ay copisio.
Lajan ex icha junoc carta tzꞌibꞌabꞌiloch dꞌa co pensar,
yujto syil ebꞌ anima masanil tas eyaji.
3 Icha junoc carta tzꞌibꞌabꞌilcan yuj Cristo a on̈ quicꞌnacbꞌati,
ich ex taꞌ.
A jun icha carta tic,
man̈oc dꞌa tinta tzꞌibꞌabꞌilcani,
palta a Yespíritu Dios pitzan,
a tzꞌibꞌannaccani.
Man̈oc dꞌa junoc qꞌueen tzꞌibꞌabꞌilochi,
palta a dꞌa co pensar,
ataꞌ tzꞌibꞌabꞌilochi.
4 Icha chiꞌ sco naꞌ,
yujto yuj Cristo scacꞌoch Dios yipoc co cꞌool.
5 Mantoc sco naꞌa to munil syal cuuj co chꞌocoj.
Palta yujn̈ej scolval Dios syal junoc tas cuuj.
6 A acꞌjinac copisio yic scacꞌ servil,
yic scalanpaxel yabꞌixal jun schabꞌil trato.
A jun strato tic,
man̈ yujoc to sco cꞌanabꞌajej junoc tas tzꞌibꞌabꞌilcani tzꞌelcꞌochi,
palta yujn̈ej Yespíritu tzꞌelcꞌochi.
A jun ley tzꞌibꞌabꞌilcani ay yopisio yacꞌanoch chamel dꞌa quibꞌan̈.
Palta axo Yespíritu Dios ay yopisio yacꞌan co qꞌuinal dꞌa juneln̈ej.
7 A jun ley chiꞌ,
a dꞌa qꞌuen qꞌueen tzꞌibꞌabꞌilcani.
Ayic yacꞌjinaccan jun ley chiꞌ,
janac copnaj stziquiquial Dios.
Axo ebꞌ israel,
maj yal-laj yilan sat vin̈aj Moisés ebꞌ,
yujto veei yilji sat vin̈ chiꞌ.*
Palta a jun svevon chiꞌ,
cꞌojancꞌolal tupnac yoc.
Vachꞌchom ay yopisio jun ley chiꞌ on̈ smilanchamoc,
palta ayic sjanac,
te nivan ajnac yelcꞌochi.
Tato icha chiꞌ ajnac yelcꞌoch jun ley chiꞌ,
8 te ecꞌto val nivan yelcꞌoch jun abꞌix syicꞌcot Yespíritu Dios dꞌayon̈.
9 A jun ley tzꞌacꞌanoch chamel dꞌa quibꞌan̈ chiꞌ,
nivan ton yelcꞌochi.
Yuj chiꞌ,
a junxo abꞌix tzꞌalani to vachꞌ on̈ dꞌa yichan̈ Dios,
másxo val nivan yelcꞌoch dꞌa yichan̈ jun chiꞌ.
10 Vachꞌchom a dꞌa pecaꞌ te nivan yelcꞌoch jun ley chiꞌ,
palta malaj yelcꞌoch dꞌa yichan̈ junxo tic,
yujto yelxo val nivan yelcꞌoch junxo abꞌix tic.
11 Tato nivan yelcꞌoch jun ley quenn̈ej tiempo ecꞌnac yopisio chiꞌ,
syalelcꞌochi to a jun ayecꞌ dꞌa juneln̈ej,
másxo val nivan yelcꞌochi.
12 Yujto scacꞌoch jun tic yipoc co cꞌool,
yuj chiꞌ max on̈ xiv calaneli.
13 Man̈ lajanoc scutej co bꞌa icha scꞌulejnac vin̈aj Moisés chiꞌ.
Yujto smusejnac sat vin̈ dꞌa jun cꞌapac,
yic vachꞌ max yil ebꞌ yetisraelal vin̈ stup yoc jun svevon chiꞌ dꞌa sat.
14 Palta maj nachajel yuj ebꞌ tas syalelcꞌoch jun chiꞌ.
An̈ejtonaꞌ ticnaic,
ayic tzꞌavtaj bꞌaj tzꞌibꞌabꞌilcan jun bꞌabꞌel trato dꞌa ebꞌ,
max nachajel-laj yuj ebꞌ.
Yujto icha jun cꞌapac bꞌaj smusejnac sat vin̈aj Moisés chiꞌ,
icha chiꞌ yajoch dꞌa spensar ebꞌ.
Max yal-laj yel jun chiꞌ dꞌa spensar ebꞌ chiꞌ,
palta yuj Cristo syal yeli.
15 An̈ejtonaꞌ ticnaic,
ayic syabꞌan ebꞌ yavtaj juntzan̈ libro yic Moisés chiꞌ,
ichato an̈ejaꞌ musan sat ebꞌ yuj jun icha cꞌapac chiꞌ.
16 Palta ayic smeltzaj co pensar dꞌa Dios Cajal,
ichato tzꞌelxi jun icha cꞌapac chiꞌ dꞌa co pensar.
17 A Cajal,
aton Espíritu.
A on̈ mach on̈ bꞌaj ayoch Yespíritu Cajalil tic,
librexo caji,
jacanxo co sat quilani.
18 Yuj chiꞌ,
man̈xo ayoc och jun icha cꞌapac chiꞌ dꞌa co pensar.
A ticnaic,
lajan on̈ icha junoc nen.
Cuuj scheclajel svachꞌil Cajal Jesús.
Van slajanbꞌi pax co pensar yedꞌ Cristo chiꞌ,
yujto van yacꞌan svachꞌil dꞌayon̈.
Icha chiꞌ van on̈ yutan Cajal,
aton Yespíritu Dios.