2
Yuj chiꞌ,
a tzin naꞌa,
man̈xo ol in cꞌoch dꞌayex dꞌa scal cuscꞌolal.
2 Tato sbꞌat vacꞌoch e cuscꞌolal,
¿machto junoc ol acꞌanxi in tzalajcꞌolal?
Yuj chiꞌ,
malaj in gana sbꞌat vacꞌoch e cuscꞌolal yujto a exn̈ej syal eyacꞌan snivanil in cꞌool.
3 Yuj chiꞌ,
icha chiꞌ vutejnac valanbꞌat dꞌayex dꞌa jun in carta,
yujto malaj in gana bꞌat vacꞌoch e cuscꞌolal.
Yujto a ex val smoj eyacꞌan in tzalajcꞌolal.
Svacꞌanoch yipoc in cꞌool,
yujto tzin naꞌa,
tato sja in tzalajcꞌolal,
ol japax e tzalajcꞌolal vedꞌoc.
4 Ayic in tzꞌibꞌannacbꞌat jun in carta chiꞌ dꞌayex,
te ochnac in ilcꞌolal eyuuj.
Ochnac val pitzꞌan dꞌa in cꞌool,
an̈ejtonaꞌ ocꞌnac in pax eyuuj.
Palta man̈ yujoc vacꞌanoch e cuscꞌolal in tzꞌibꞌejnacbꞌati.
In tzꞌibꞌejnacbꞌati yic tzeyojtaquejeli to te xajan ex vuuj.
Acꞌbꞌil nivancꞌolal vin̈ ochnac smul
5 Malaj in gana tzin ecꞌ dꞌa yibꞌan̈ in bꞌoan yaj jun tic,
palta a jun vin̈ acꞌjinac och co cuscꞌolal,
man̈oc inn̈ej cusnac in,
ayex pax cusnac ex janicꞌ vedꞌoc.
6 A jun yaelal ix eyacꞌoch dꞌa yibꞌan̈ vin̈ ayic ix e molbꞌan e bꞌa,
cꞌocbꞌilocabꞌi.
7 Axo ticnaic,
más vachꞌ tzeyacꞌ nivancꞌolal vin̈.
Tzeyacꞌanpax snivanil scꞌol vin̈,
yic vachꞌ max te juviel vin̈ yuj cuscꞌolal.
8 Yuj chiꞌ tzin tevi dꞌayex to tze chꞌox e vachꞌcꞌolal dꞌa vin̈.
9 Yuj jun chiꞌ in tzꞌibꞌejnacbꞌat jun in carta dꞌayex,
yic vachꞌ tzex vacꞌ proval.
Yujto in gana svojtaquejeli tato yel tze cꞌanabꞌajej tas svalaꞌ.
10 Yuj chiꞌ tato tzeyacꞌ nivancꞌolal dꞌa yibꞌan̈ jun vin̈ chiꞌ,
a inxo pax tic,
ol vacꞌpax nivancꞌolal vin̈.
Tato a in svacꞌ nivancꞌolal vin̈,
a dꞌa yol sat Cristo svacꞌ nivancꞌolal syal chiꞌ,
palta yuj e vachꞌiloc a ex tic.
11 Icha chiꞌ svutej,
yic vachꞌ max on̈ yacꞌ ganar vin̈ Satanás,
yujto cojtacxo tas sgana vin̈ dꞌayon̈.
Ochnac vin̈aj Pablo ilcꞌolal dꞌa chon̈abꞌ Troas
12 Ayic in cꞌoch dꞌa chon̈abꞌ Troas,
yic svalanel jun vachꞌ abꞌix yic Cristo,
ilchaj vuuj to a Cajal Jesús bꞌoan yaj masanil yic svalel slolonel.
13 Palta och in ilcꞌolal,
yujto maj ilchaj vin̈ cucꞌtac Tito vuj taꞌ.
Yuj chiꞌ valcan quil co bꞌa dꞌa ebꞌ ay chiꞌ taꞌ,
in cotxi taꞌ,
in ja dꞌa yol yic Macedonia tic.
A tas yopisio yabꞌixal Cristo
14 Palta caqꞌuec yuj diosal dꞌa Dios,
yujto masanil tiempo aꞌ tzon̈ icꞌanoch tzacꞌan yedꞌ Cristo Jesús yic scheclajeli to aꞌ ix acꞌan ganar.
Cuuj spucaxbꞌat yabꞌixal Cristo dꞌa junjun lugar,
icha spucaxbꞌat sjabꞌ junoc tas sucꞌuqꞌui sjabꞌ.
15 Icha sjabꞌ stabꞌil junoc tas sucꞌuqꞌui sjabꞌ syacꞌ Cristo dꞌa Dios,
ich on̈ taꞌ ayic tzecꞌ calanel yabꞌixal.
Spucaxbꞌat dꞌa scal ebꞌ scolchaji yedꞌ pax dꞌa scal ebꞌ vanto sateqꞌui.
16 Ayic scalan dꞌa ebꞌ van sateqꞌui,
lajan yabꞌixal chiꞌ icha sjabꞌ junoc tas tzon̈ cham yuuj.
Axo tato a dꞌa ebꞌ van scolchaj scaleli,
lajan yabꞌixal chiꞌ icha junoc tas te sucꞌuqꞌui sjabꞌ dꞌa ebꞌ,
schꞌoxan paxi to ol scha sqꞌuinal ebꞌ.
Yuj chiꞌ,
¿mach val junoc syal yalanel jun abꞌix tic?
17 A on̈ tic,
man̈ yujoc cacꞌan ganar dꞌa spatic slolonel Dios,
yuj chiꞌ tzecꞌ caleli,
icha syutej sbꞌa juntzan̈xo ebꞌ.
Nivanoc tzecꞌ yal ebꞌ,
palta soman syutej ebꞌ yalani.
Palta a on̈ tic,
yel scalaꞌ,
yujto a Dios ix acꞌan copisio tic.
A dꞌa yichan̈ Dios scalaꞌ yujto yic on̈xo Cristo eyedꞌoc.