A Scarta San Pablo
DꞌA EBꞌ AJ GALACIA
Yichbꞌanil scarta vin̈aj Pablo
1
A in Pablo in tic,
schecabꞌ in Jesucristo.
Man̈oc junoc anima ay in schecabꞌ.
An̈ejtonaꞌ,
man̈oc junoc anima acꞌjinac vopisio tic.
A val Jesucristo chiꞌ acꞌjinac dꞌayin yedꞌ co Mam Dios,
aton jun acꞌjinacxi pitzvoc Jesucristo dꞌa scal ebꞌ chamnac.
2 A in tic yedꞌ masanil ebꞌ cucꞌtac ayecꞌ vedꞌoc,
sco tzꞌibꞌejbꞌat jun co carta tic dꞌayex ex creyente dꞌa junjun iglesia dꞌa yol yic Galacia.
3 Aocabꞌ co Mam Dios yedꞌ Cajal Jesucristo syacꞌ svachꞌcꞌolal yedꞌ sjuncꞌolal dꞌayex taꞌ.
4 A Jesucristo,
yacꞌnac cham sbꞌa yic tzul yicꞌcanel co mul.
Icha chiꞌ ix yutej on̈ scolanel dꞌa yol scꞌabꞌ chucal dꞌa yolyibꞌan̈qꞌuinal tic,
yujto icha chiꞌ sgana Dios,
aton co Mam yaji.
5 Yuj chiꞌ,
calec vachꞌ lolonel dꞌa Dios dꞌa masanil tiempo.
Amén.
Malaj junocxo abꞌix yic colnabꞌil
6 Tzin och qꞌuelan eyuuj,
yujto elan̈chamel van eyactancan Dios,
aton ix on̈ avtan yuj svachꞌcꞌolal Cristo.
Yujto a ticnaic,
van eyacꞌanoch e pensar dꞌa junxo abꞌix yic colnabꞌil chꞌoc tzꞌalji dꞌayex.
7 Palta malaj junocxo abꞌix yic colnabꞌil chiꞌ.
Ay ebꞌ sgana sqꞌuexan svayan̈il yabꞌixal Cristo yic svachꞌ somchajel e pensar.
8 Palta ecꞌnac on̈xo calel vachꞌ abꞌix yic colnabꞌil chiꞌ dꞌayex.
Axo ticnaic,
tato ay junoc mach tzꞌecꞌ yalel junocxo chꞌoc cꞌaybꞌubꞌal,
vachꞌchom a in tic,
ma junoc ángel scot dꞌa satchaan̈ tzul alanoc,
cotocabꞌ yoval scꞌool Dios dꞌa yibꞌan̈.
9 Icha vutejnac valancan dꞌayex junel,
icha chiꞌ svutej valanxibꞌat dꞌayex ticnaic.
Tato ay junoc mach tzecꞌ alanel junocxo cꞌaybꞌubꞌal man̈ lajanoc yedꞌ jun e chanacxo,
cotocabꞌ yoval scꞌool Dios dꞌa yibꞌan̈.
10 Ayic svalanbꞌat juntzan̈ tic dꞌayex,
¿tom in gana ste tzalaj junoc anima vedꞌ e naani?
Maay,
an̈ej Dios in gana stzalaj vedꞌoc.
Man̈ jabꞌoc tzin naꞌ to stzalaj ebꞌ vedꞌoc.
Qꞌuinaloc a ebꞌ anima in gana stzalaj vedꞌoc,
man̈ in schecabꞌoc am Cristo syal chiꞌ.
A tas aj yochnac vin̈aj Pablo schecabꞌoc Cristo
11 Ex vucꞌtac ex vanabꞌ,
tzin nibꞌej tzeyojtaquejel junxo sval tic.
A jun vachꞌ abꞌix yic colnabꞌil sval tic,
man̈ yicoc anima.
12 Man̈oc dꞌa junoc anima in chanac,
ma in cꞌaybꞌejnac,
yujto an̈ej val Jesucristo acꞌjinac vojtaquejeli.
13 Eyabꞌnacxo chajtil vutejnac in bꞌa dꞌa yalan̈taxo,
ayic vacꞌannac och in bꞌa dꞌa scꞌaybꞌubꞌal ebꞌ vetisraelal.
Nivan val yaelal vacꞌnac och dꞌa yibꞌan̈ ebꞌ yicxo Dios.
Vacꞌnac val vip in satanel ebꞌ.
14 A dꞌa scꞌaybꞌubꞌal ebꞌ vetchon̈abꞌ chiꞌ,
a inn̈ej te jelan in dꞌa yichan̈ ebꞌ lajan in qꞌuinal yedꞌoc,
yujto vacꞌnac val och in pensar dꞌa scꞌaybꞌubꞌal ebꞌ co mam quicham.
15 Palta ayic manto in alji,
a Dios sicꞌjinac inxo eli.
Yuj svachꞌcꞌolal yavtejnac in och yicoc.
Axo yic ix cꞌoch stiempoal icha tas nabꞌil yuuj,
16 ix yacꞌan vojtaquejel Yuninal,
yic vachꞌ tzecꞌ valel yabꞌixal colnabꞌil dꞌa e cal a ex man̈ ex israeloc tic.
Slajvi chiꞌ,
malaj junoc mach bꞌaj in cꞌanbꞌej tas vachꞌ tzin cꞌulej.
17 Man̈ in xidꞌnacocpaxecꞌ dꞌa Jerusalén in cꞌumej ebꞌ bꞌabꞌlaj ochnac schecabꞌoc Cristo dꞌa vichan̈.
Palta elan̈chamel bꞌat in can dꞌa yol yic Arabia.
Slajvi chiꞌ,
in cꞌochxi dꞌa chon̈abꞌ Damasco.
18 Ato dꞌa yoxil abꞌil bꞌat in dꞌa Jerusalén,
yic bꞌat vil vin̈aj Pedro,
15 cꞌual ecꞌ in yedꞌ vin̈.
19 Man̈xa junocxo ebꞌ schecabꞌ Cristo in cꞌumej taꞌ,
an̈ej vin̈aj Jacobo,
vin̈ yucꞌtac sbꞌa yedꞌ Cajal Jesús in cꞌumej.
20 Dꞌa yichan̈ Dios svalbꞌat jun tic dꞌayex,
te yel tas sval tic.
21 Slajvi vecꞌ dꞌa Jerusalén chiꞌ,
in bꞌat dꞌa yol yic Siria yedꞌ dꞌa yol yic Cilicia.
22 Axo ebꞌ yicxo Cristo ay dꞌa yol yic Judea,
manto in yojtacoclaj ebꞌ.
23 Ton̈ejanto tzꞌalji yabꞌ ebꞌ:
A jun vin̈ acꞌjinac och co yaelal dꞌa yalan̈taxo,
aton vin̈ snibꞌejnac satanel jun cꞌaybꞌubꞌal chabꞌilxo cuuj,
a ticnaic,
a vin̈ tzecꞌ alanxiel yabꞌixal,
xchi ebꞌ vuuj.
24 Yuj chiꞌ,
yal vachꞌ lolonel ebꞌ dꞌa Dios smasanil vuuj.