Efesios sbꞌi jun carta tic, aton jun scarta vin̈aj apóstol Pablo stzꞌibꞌejnac bꞌat dꞌa ebꞌ creyente dꞌa chon̈abꞌ Éfeso. A jun carta tic, cha macan̈ tas syalaꞌ: Bꞌabꞌel macan̈, tzꞌel yich dꞌa capítulo 1 versículo 3 masanto dꞌa capítulo 3 versículo 21. A dꞌa tic syalaꞌ to junn̈ej tzꞌaj yiglesia Cristo, aton ebꞌ israel yedꞌ ebꞌ man̈ israeloc. Yujto a dꞌa scal ebꞌ chiꞌ, ataꞌ sicꞌbꞌilelta ebꞌ schon̈abꞌ Dios, ebꞌ to acꞌbꞌilxo lajvoc smul, colbꞌilxoelta ebꞌ dꞌa scal chucal yuj Jesucristo. Axo Yespíritu Dios cajanxo och dꞌayon̈, a schꞌoxani to syaqꞌuelcꞌoch stiꞌ Dios yacꞌnaccani.

Schabꞌil macan̈, schael dꞌa capítulo 4 versículo 1 masanto dꞌa capítulo 6 versículo 24. A dꞌa tic syal vin̈aj Pablo chiꞌ, to a ebꞌ creyente dꞌa Éfeso chiꞌ, schꞌoxel sbꞌa ebꞌ yedꞌ sbꞌeybꞌal to junxon̈ej yaj ebꞌ yedꞌ Cristo. Tzijtum juntzan̈xo chꞌoxnabꞌil ix yacꞌlabꞌej vin̈aj Pablo yic junxon̈ej tzꞌaj yiglesia Cristo, ichato junxon̈ej nivanil yaj ebꞌ, axo Cristo icha sjolom yaj dꞌa yiglesia chiꞌ. Lajan icha junoc pat sbꞌoi. Lajan icha junoc qꞌuen qꞌueen tzꞌem yichoc junoc pat. A yiglesia Cristo lajan icha junoc ix ix ay yetbꞌeyum, axo Cristo chiꞌ icha vin̈ yetbꞌeyum ix chiꞌ. A Cristo xajanan ebꞌ creyente, yuj chiꞌ smoj val yalan vachꞌ lolonel ebꞌ dꞌa Dios. Tzꞌacꞌji stecꞌanil ebꞌ, yic stecꞌbꞌej sbꞌa ebꞌ dꞌa screyenteal.