Filipenses sbꞌi jun carta tic, aton jun scarta vin̈aj apóstol Pablo stzꞌibꞌejnac bꞌat dꞌa jun Iglesia yicꞌnaquel yich vin̈ dꞌa Macedonia dꞌa yol yic Europa. Preso yaj vin̈ ayic ix stzꞌibꞌan jun carta tic vin̈. Ay juntzan̈xo ebꞌ yetmunlajvumal vin̈, chuc lolonnac ebꞌ dꞌa spatic vin̈. Ochnac vin̈ ilcꞌolal yuj juntzan̈xo chꞌoc cꞌaybꞌubꞌal ochnac dꞌa scal iglesia chiꞌ, yuj chiꞌ ix yalbꞌat vin̈ to stecꞌbꞌej sbꞌa ebꞌ, yic max acꞌji ganar ebꞌ yuj juntzan̈xo cꞌaybꞌubꞌal chiꞌ. A dꞌa jun carta tic scheclaji to stzalaj vin̈, yujto ayoch Cristo dꞌa scꞌool vin̈, ix yacꞌanpax yuj diosal vin̈ dꞌa ebꞌ creyente aj Filipos yuj jun yofrenda ebꞌ ix yacꞌaꞌ. Ix yacꞌanbꞌat razón vin̈ dꞌa ebꞌ yuj yaln̈ej tas sjavi dꞌa yibꞌan̈ ebꞌ, syalanpax vin̈ to ayocabꞌ juncꞌolal dꞌa scal ebꞌ. Mocabꞌ comonoc smontajbꞌat spensar ebꞌ yuj juntzan̈ tas snibꞌej snivanil ebꞌ. Ix yalan vin̈ to a sqꞌuinal ebꞌ tzꞌacꞌji, silabꞌ Dios yaj dꞌa ebꞌ, yujto ix yacꞌoch Cristo ebꞌ dꞌa scꞌool. Syalan vin̈ to ayocabꞌ tzalajcꞌolal yedꞌ juncꞌolal dꞌa scal ebꞌ, yujto junxon̈ej yaj ebꞌ yedꞌ Cristo.