A Scarta San Pablo
DꞌA EBꞌ AJ FILIPOS
Tzꞌel yich scarta vin̈aj Pablo
1
A in Pablo in tic yedꞌ vin̈aj Timoteo,
schecabꞌ on̈ Jesucristo.
Sco tzꞌibꞌejbꞌat jun co carta tic dꞌayex e masanil ex creyente aj Filipos,
aton ex yic exxo Dios quedꞌoc.
Junxon̈ej caj yedꞌ Cristo Jesús.
Sco tzꞌibꞌejbꞌat dꞌayex ex yilumal ebꞌ creyente taꞌ yedꞌ pax dꞌayex ex diácono.
2 Aocabꞌ co Mam Dios yedꞌ Cajal Jesucristo tzꞌacꞌan svachꞌcꞌolal yedꞌ sjuncꞌolal dꞌayex taꞌ.
Slesal vin̈aj Pablo yuj ebꞌ creyente
3 Ayic tzex in naancot dꞌa juntac el,
svacꞌ yuj diosal dꞌa co Mam Dios eyuuj.
4 Juntac el tzin lesalvi eyuj e masanil,
tzin lesalvi dꞌa tzalajcꞌolal,
5 yujto atax e chaannac Cristo,
masanto ticnaic,
junxon̈ej tzon̈ munlaj yuj jun vachꞌ abꞌix yic colnabꞌil tic.
6 Toxo ix syamoch Dios sqꞌuexan e bꞌeybꞌal.
A ticnaic,
vojtacxo to ol munlajn̈ej och dꞌayex,
masanto ol ja jun cꞌual ayic ol jax Jesucristo.
7 Smojton tzin na juntzan̈ tic eyuj e masanil,
yujto te xajan ex vuuj.
E masanil ix ex colvaj vedꞌoc dꞌa vopisio ix yacꞌ Dios tic.
Vachꞌchom preso vaji,
ma ayic vecꞌnac valeli to yel jun vachꞌ abꞌix yic colnabꞌil tic,
ma ayic svacꞌanpax stecꞌanil ebꞌ syacꞌoch scꞌool dꞌay,
tzex colvajn̈ej vedꞌoc.
8 A Dios tzꞌilani to tzex in xajanej e masanil icha tzꞌaj on̈ xajanan Cristo.
9 Tzin tevi dꞌa Dios eyuuj,
yic más tze xajanej e bꞌa,
yic syacꞌpax sjelanil dꞌayex.
Tzin cꞌananpax dꞌay yic syal e sicꞌlan tas vachꞌ dꞌa scal tas chuc,
10 yic ol e vachꞌ ojtaquejeli tas val juntzan̈ tas vachꞌ dꞌa sat Dios.
Tato icha chiꞌ,
ol vachꞌ tojolbꞌoc e pensar,
yic malaj jabꞌoc e paltail dꞌa yichan̈ Cristo ayic ol jaxoc.
11 Ol vachꞌ och Jesucristo eyedꞌoc,
yic vachꞌ tojoln̈ej ol eyutoc e bꞌeybꞌal.
Tato icha chiꞌ,
eyuuj ol checlajeloc to te nivan yelcꞌoch Dios,
axo yalji vachꞌ lolonel chiꞌ dꞌay.
Max xivlaj vin̈aj Pablo yabꞌan syail
12 Ex vucꞌtac ex vanabꞌ,
tzin nibꞌej snachajel junxo tic eyuuj,
to a jun ix ja dꞌa vibꞌan̈ tic,
man̈ chucoclaj.
Yuj jun tic svachꞌ pucaxel vachꞌ abꞌix yic colnabꞌil.
13 Yujto a masanil ebꞌ soldado yic vin̈ yajal yedꞌ masanil ebꞌ anima ay dꞌa tic,
ix yabꞌ ebꞌ to yujto tzacꞌan in och yuj Cristo,
preso vaji.
14 Ayic yilan ebꞌ creyente to tecꞌan svutej in bꞌa dꞌa preso tic,
tzijtum ebꞌ ix stecꞌbꞌejpax sbꞌa vuuj.
Maxtzac xivlaj ebꞌ yalanel slolonel Dios dꞌa tic.
Ix stecꞌbꞌej sbꞌa ebꞌ yacꞌanoch Cajal Jesús yipoc scꞌool.
15-17 Yel toni,
ay ebꞌ schichon scꞌool dꞌayin,
tzovajpaxqꞌue ebꞌ.
Yuj chiꞌ syalel yabꞌixal Cristo ebꞌ,
man̈ smasaniloc scꞌool ebꞌ syaleli,
ton̈ej syicꞌchaan̈ sbꞌa ebꞌ.
A snaan ebꞌ to icha chiꞌ,
más nivan syaelal svabꞌ dꞌa preso tic yuj ebꞌ.
Palta ay juntzan̈xo ebꞌ tzꞌalanel yuj svachꞌil scꞌool yujto xajan in yuj ebꞌ.
Yojtac ebꞌ to preso vaj dꞌa tic yujto svaleli to yel ton val jun vachꞌ abꞌix yic colnabꞌil tic.
18 Palta a in tic max in nalaj juntzan̈ chiꞌ.
Tato dꞌa smasanil scꞌool ebꞌ syaleli mato maay,
palta tzin tzalajn̈ej,
yujto aton yabꞌixal Cristo syalel ebꞌ.
Masn̈ej ol vachꞌ ja in tzalajcꞌolal.
19 Yujto vojtac to vachꞌchom svabꞌ syail ticnaic,
palta vachꞌn̈ej ol in elcꞌochoc,
yujto van e lesalvi vuuj.
Icha chiꞌ ol in ajoc,
yujto a Yespíritu Jesucristo ayoch vedꞌoc.
20 Svacꞌoch yipoc in cꞌool to man̈ ol in qꞌuixvoclaj.
In gana tecꞌan ol vutoc in bꞌa valanel ichataxon svutej in bꞌa.
Tato icha chiꞌ,
vachꞌchom pitzan in ma ol in chamoc,
vuuj ol checlajelta to te nivan yelcꞌoch Cristo.
21 Yujto a in tic,
yacbꞌan ay in to eqꞌui,
axon̈ej Cristo naan vuuj.
Axo ayic ol in chamoc,
ecꞌalxo val vachꞌ vicoꞌ.
22 Tato ay in to ecꞌ jabꞌocxo dꞌa yolyibꞌan̈qꞌuinal tic,
syal tzin munlaj dꞌa Cajal Jesús.
Palta,
¿bꞌaj am ay junoc ecꞌal svachꞌil?
23 Max nachajlaj vuuj.
In gana tzin chami,
yic elan̈chamel tzin cꞌoch bꞌaj ayecꞌ Cristo,
yujto a jun chiꞌ tzin te nibꞌejxo paxi.
24 Palta eyuuj a ex tic,
vachꞌ ama ayin to ecꞌ jabꞌocxo dꞌa yolyibꞌan̈qꞌuinal tic.
25 Yuj chiꞌ vojtac sicꞌlabꞌil to ol to in ecꞌ jabꞌocxo eyedꞌoc.
Ol in colvaj jabꞌocxo dꞌayex yic vachꞌ ol ex tecꞌcꞌaj dꞌa yic Dios,
yic ol vachꞌ ja e tzalajcꞌolal yujto ix eyacꞌoch Cristo dꞌa e cꞌool.
26 Yuj chiꞌ,
ol in cꞌoch junelxo dꞌayex,
yic vuuj ol eyal vachꞌ lolonel dꞌa Cristo Jesús.
27 Taxon̈ej ol in cꞌochxoc dꞌayex mato man̈xo,
vachꞌn̈ej tzeyutej e bꞌeybꞌal icha syal jun vachꞌ abꞌix yic Cristo,
yic ol vabꞌ e pecal to tecꞌan ex,
an̈ejaꞌ junn̈ej pax yaj e pensar taꞌ.
Ol vabꞌanpaxi to junn̈ej tzeyutej eyacꞌanoch jun vachꞌ abꞌix yic colnabꞌil dꞌa e cꞌool,
tecꞌan pax tzeyutej e bꞌa dꞌay.
28 An̈ejtonaꞌ,
ol vabꞌ pax yuj ebꞌ chianoch scꞌool dꞌayon̈,
to max ex xiv dꞌa ebꞌ.
Icha chiꞌ ol aj scheclajeli to ol bꞌatcan ebꞌ dꞌa syaelal dꞌa juneln̈ej.
An̈ejtonaꞌ,
icha chiꞌ ol aj scheclajeli to ayxo co colnabꞌil,
yujto icha chiꞌ ol yutoc Dios schꞌoxani.
29 Yuj svachꞌcꞌolal Cristo ix yacꞌ dꞌayon̈,
man̈ ton̈ejoc ay calan quic cacꞌanoch Cristo chiꞌ dꞌa co cꞌool.
Ay pax calan quic cabꞌan syail yuuj.
30 A ex tic,
junn̈ej tzeyutej e tecꞌbꞌan e bꞌa eyacꞌan eyip vedꞌoc.
Eyilnac dꞌa yalan̈taxo tas vutejnac in bꞌa vacꞌan vip.
An̈ejaꞌ pax ticnaic,
van eyabꞌanpaxi to an̈ejaꞌ tecꞌan svutej in bꞌa.