A Cristo emnaquil yutejnac sbꞌa
2
A Cristo tzon̈ iptzitani.
Syacꞌan co nivancꞌolal,
yujto xajan on̈ yuuj.
Junxon̈ej caj yuj Yespíritu ticnaic.
A tzꞌacꞌan co xajanej co bꞌa,
yuj chiꞌ tzꞌocꞌ co cꞌool dꞌa ebꞌ quetanimail.
2 Yuj val juntzan̈ tic,
junxon̈ej pensaril tzeyutej e bꞌa taꞌ.
Junxon̈ej tzeyutej e xajanan e bꞌa.
Junxon̈ej tzeyutej e naan masanil tasi.
Juncꞌolal tzeyutej e bꞌa,
yic ol vachꞌ ja in tzalajcꞌolal eyuuj.
3 Malajocabꞌ junoc mach syicꞌchaan̈ sbꞌa,
ma syacꞌ acꞌumtaquil.
Palta emnaquilocabꞌ tzeyutej e bꞌa,
syalelcꞌochi to más nivanocabꞌ yelcꞌoch junjun ebꞌ creyente dꞌa e sat.
4 Malajocabꞌ junoc mach an̈ej svachꞌil sayaꞌ.
Aocabꞌ tas tzꞌaj ebꞌ creyente smasanil yovalil snaꞌa.
5 Lajanocabꞌ tzeyutej e pensar icha yutejnac sbꞌa Cristo Jesús.
6 A Cristo chiꞌ,
vachꞌchom Dios taxoni,
palta malaj yalnac ayic yactannaccan jun bꞌaj ay yalan yic yedꞌ Dios chiꞌ.
Malaj jabꞌoc tas snanac ayic yactannaccan chiꞌ.
7 Icha chiꞌ aj yactannaccan masanil yicoꞌ,
scotnac,
ul yacꞌannac och sbꞌa checabꞌoc.
Ul yacꞌannac aljoc sbꞌa dꞌa animail.
8 Ayic ayoch animail chiꞌ,
emnaquil yutejnac sbꞌa,
scꞌanabꞌajejnac val masanil,
masanto schamnac.
Yacꞌnac val techaj smiljicham dꞌa teꞌ culus,
te qꞌuixvelal ajnac schami.
9 Yuj chiꞌ,
yelxo val te nivan yelcꞌoch yuj Dios ticnaic.
A acꞌjinac sbꞌi,
a sbꞌi chiꞌ,
an̈ej ecꞌal dꞌa yichan̈ juntzan̈xo bꞌi smasanil.
10 Icha chiꞌ yutejnac Dios,
yic a ol yabꞌan sbꞌi Jesús masanil ebꞌ ay dꞌa satchaan̈ yedꞌ masanil ebꞌ ay dꞌa yolyibꞌan̈qꞌuinal tic yedꞌ ebꞌ ay pax dꞌa yol luum,
ol laj em cuman ebꞌ dꞌay smasanil.
11 Axo ol yalan ebꞌ:
A Jesucristo,
aton Cajal,
xcham ebꞌ.
Icha chiꞌ ol aj scheclajeli to te nivan yelcꞌoch Dios Mamabꞌil.
Icha qꞌuen cꞌanal yaj ebꞌ creyente
12 Yuj chiꞌ,
ex xajanabꞌil vuuj,
tze cꞌanabꞌajejn̈ej,
ichataxon e modo.
Tzeyacꞌ val eyip e naanel dꞌa nanamil yedꞌ dꞌa xivcꞌolal tas syalelcꞌoch co colnabꞌil syacꞌ Dios.
Man̈ocn̈ej ay in ecꞌ eyedꞌ taꞌ,
icha chiꞌ tzeyutej e bꞌa.
Palta tze cꞌulejn̈ej juntzan̈ tic ayic man̈ in ayoc ecꞌ eyedꞌoc.
13 Yujto a Dios tzꞌacꞌan co naꞌ co cꞌulan vachꞌil,
an̈ejaꞌ tzꞌacꞌan pax co cꞌulej tas sgana.
14 Ayic tzꞌacꞌji e cꞌulej junoc tasi,
man̈ chichoncꞌolaloc tze cꞌulej.
Man̈ eyalubꞌtan̈ej yuj tas tzꞌacꞌji e cꞌulej chiꞌ.
15 Man̈ eyutej e bꞌa icha chiꞌ,
yic vachꞌ malaj mach ol alanoc to ay e mul,
ma e paltail.
Vachꞌchom ayex ecꞌ dꞌa scal ebꞌ anima chuc sbꞌeybꞌal yedꞌ ebꞌ chuc spensar,
a exxo tic,
yel yuninal ex Dios,
man̈xalaj tas chuclaj ayoch dꞌayex icha ebꞌ chiꞌ.
Ichaocabꞌ yilji juntzan̈ cꞌanal svevon dꞌa qꞌuicꞌbꞌalil,
icha ex ocabꞌ chiꞌ dꞌa scal ebꞌ.
16 Tzeyal slolonel Dios yabꞌ ebꞌ,
aton jun tzꞌalani to ay co qꞌuinal dꞌa juneln̈ej.
Yuj chiꞌ ayic ol ja Cristo,
ol in te tzalaj eyuuj,
yic ol in naani to man̈ ton̈ejoc ix vixtejecꞌ in bꞌa,
man̈ nabꞌan̈ejoc in munlajel.
17 Vachꞌchom a in tic tzin cham stzꞌacubꞌoc e silabꞌ tzeyacꞌ dꞌa Dios,
palta yujto tzeyacꞌoch Dios chiꞌ dꞌa e cꞌool,
tzin tzalaji.
In gana tzeyabꞌpax jun tzalajcꞌolal chiꞌ vedꞌoc.
18 A exxo tic,
tzalajan̈ec,
tzeyacꞌanpax vojtaquejel e tzalajcꞌolal chiꞌ.
Vin̈aj Timoteo yedꞌ vin̈aj Epafrodito
19 In gana tzin checbꞌat jayeoc cꞌual vin̈aj Timoteo tic dꞌayex,
tato icha chiꞌ sgana Cajal Jesús.
In gana svabꞌi tas eyaj taꞌ,
yic ol in tzalaj dꞌa tic eyuuj.
20 Malaj junoc mach lajan spensar yedꞌ vin̈ dꞌa tic.
Te ay val och spensar vin̈ eyuuj.
21 Masanil juntzan̈xo ebꞌ,
an̈ej svachꞌil ebꞌ sayaꞌ,
max snalaj smunlajel Cristo Jesús ebꞌ.
22 Palta eyojtacxo smodo vin̈aj Timoteo tic.
Icha syutej sbꞌa junoc yacꞌan servil smam,
icha chiꞌ syutej sbꞌa vin̈ dꞌayin.
Smunlaj val vin̈ vedꞌoc ayic scalanel slolonel Dios.
23 Yuj chiꞌ,
ayic ol lajvoc vilani tas ol in aj dꞌa tic,
ol in checanbꞌat vin̈ dꞌayex taꞌ.
24 Svacꞌoch Cajal Jesús yipoc in cꞌool to ol pet in bꞌatpax lacꞌan ex vilaꞌ.
25 An̈ejaꞌ tzin naꞌa to yovalil ol in chec pax vin̈ cucꞌtac Epafrodito.
A vin̈ cucꞌtac tic,
a ex e checnaccot vin̈ in yacꞌ servil dꞌa tic.
26 Sgana vin̈ sbꞌat ex yilxicani.
Te ilcꞌolal yaj vin̈ eyuuj,
yujto ix eyabꞌi to ix penaayax vin̈ dꞌa tic.
27 Yel toni,
ijan val ix cham vin̈,
axo Dios ix ocꞌ scꞌool dꞌa vin̈.
Yuj chiꞌ ix bꞌoxi vin̈.
Man̈ocn̈ej dꞌa vin̈aj Epafrodito tic ix ocꞌ scꞌool Dios chiꞌ,
ix ocꞌ pax scꞌool dꞌayin ayic ix bꞌoxi scꞌool vin̈ chiꞌ,
yic maxtzac ja junocxo in cuscꞌolal dꞌa tic.
28 Yuj chiꞌ,
in gana spet in chec pax vin̈ dꞌayex,
yic ol ex tzalajoc ayic ol eyilan scꞌochxi vin̈,
yic ol vachꞌ satpaxel in cuscꞌolal dꞌa tic.
29 Tzalajcꞌolalocabꞌ tze cha scꞌochxi vin̈ dꞌayex taꞌ,
yujto cucꞌtac co bꞌa yedꞌ vin̈ dꞌa yol scꞌabꞌ Cajal Jesús.
A jantacn̈ej ebꞌ lajan spensar yedꞌ vin̈,
ayocabꞌ yelcꞌoch ebꞌ dꞌayex.
30 A jun vin̈ cucꞌtac tic,
yujn̈ej to van yacꞌan servil Cristo vin̈,
ijan val ix cham vin̈.
Vachꞌchom ijan ix cham vin̈ yuj in yacꞌan servil,
palta malaj jabꞌoc tas ix sna vin̈.
A ex tic,
max yal-laj e cot in eyacꞌ servil,
yuj chiꞌ,
a vin̈ aycot in yacꞌ servil e qꞌuexuloc.