A jun tas bꞌaj smoj scacꞌoch co pensar
3
A ticnaic ex vucꞌtac ex vanabꞌ,
tzalajan̈ec dꞌa Cajal Jesús.
A juntzan̈ svalbꞌat tic dꞌayex,
vachꞌchom valnacxobꞌati,
palta man̈ chucoc valanxibꞌati,
yujto yovalil tze vachꞌ ojtaquejeli.
2 Tzeyil val e bꞌa dꞌa juntzan̈ ebꞌ chuc spensar.
Chuc syutej sbꞌa ebꞌ,
sgana ebꞌ spolel jabꞌoc e tzꞌumal.
3 Yujto a ebꞌ dꞌa val yel schon̈abꞌ Dios,
a on̈ ton tic.
Yujto scaqꞌuem co bꞌa dꞌay yuj Yespíritu.
An̈ej Cristo Jesús scacꞌoch yipoc co cꞌool.
A juntzan̈xo tas sco cꞌulej,
max cacꞌochlaj jabꞌoc yipoc co cꞌool.
4 A in tic,
in nanac to smoj svacꞌoch juntzan̈ chiꞌ yipoc in cꞌool,
yujto in cꞌanabꞌajejnac.
Ay ebꞌ snaani to syal scolchaj ebꞌ yuj juntzan̈ munil scꞌulej chiꞌ.
Palta a in tic más in cꞌanabꞌajejnac juntzan̈ chiꞌ dꞌa yichan̈ ebꞌ.
5 Yucubꞌixial valji,
vacꞌjinac circuncidar,
yujto israel in.
Yin̈tilal in can vin̈aj Benjamín.
Hebreo in,
yujto a in mam in nun,
hebreo ebꞌ.
In cꞌanabꞌajejnac val ley Moisés,
yujto fariseo in.
6 Vacꞌnac val och in bꞌa dꞌa in religión,
yuj chiꞌ vacꞌnac och syaelal ebꞌ yicxo Cristo.
In cꞌanabꞌajejnac val masanil tastac syal ley Moisés chiꞌ,
man̈xa jabꞌoc in paltail dꞌay.
7 Masaniln̈ej juntzan̈ in cꞌulejnac chiꞌ,
vachꞌ ton in naani.
Axo ticnaic,
malaj yelcꞌoch dꞌayin,
yujto an̈ej dꞌa Cristo svacꞌoch in pensar ticnaic.
8 Masaniln̈ej juntzan̈ tastac vacꞌnac och yipoc in cꞌool chiꞌ,
a ticnaic man̈xalaj yelcꞌoch dꞌayin.
Yujto a junxo más nivan yelcꞌoch dꞌayin,
aton vojtacanel Cristo Jesús,
aton Cajal.
Yuujn̈ej ix satcanel masanil juntzan̈ vacꞌnac och yipoc in cꞌool chiꞌ.
Axo ticnaic,
icha yilji cꞌalem yaj dꞌayin,
yujto in gana tzꞌoch Cristo vicoc dꞌa juneln̈ej,
9 yic junxon̈ej tzin aj yedꞌoc.
A Dios tzꞌalani to vachꞌ in dꞌa yichan̈,
yujn̈ej to ix vacꞌoch Cristo dꞌa in cꞌool,
man̈ yujoc to ix in cꞌanabꞌajej ley Moisés chiꞌ.
An̈ej yujto scacꞌoch Cristo dꞌa co cꞌool yuj chiꞌ vachꞌ on̈ dꞌa yichan̈.
10 In gana tzin vachꞌ ojtaquejel Cristo,
yic smunlajoch spoder dꞌayin,
aton spoder icꞌannacxi pitzvoc.
In gana vabꞌan syail yedꞌoc.
In gana lajan tzꞌaj in pensar icha ajnac spensar ayic schamnac,
11 yujto in gana ay valan vic in pitzvixi dꞌa scal ebꞌ chamnac.
Caqꞌuec quip yic ol co cha spac quicoꞌ
12 Max val-laj tato toxo ix vacꞌ ganar juntzan̈ ix val tic smasanil,
yujto ayto palta in tecꞌcꞌaj dꞌa masanil yic Cristo.
Palta an̈ejaꞌ svacꞌ pural in bꞌa ticnaic yic vachꞌ ol in tecꞌcꞌajoc,
yuj chiꞌ ix in yavtejoch Cristo Jesús yicoc.
13 Max valaꞌ tato tecꞌan inxo,
palta icha tic svutej in bꞌa to a ticnaic maxtzac in nacotlaj juntzan̈ tas toxo ix ecꞌbꞌati.
An̈ej juntzan̈ tas ayto palta tzin naꞌa.
Svacꞌan val vip
14 yic vachꞌ ol vacꞌ ganar,
axo in chaan spac chiꞌ dꞌa satchaan̈.
Yuj val jun spac chiꞌ,
tzon̈ yavtejoch Dios yicoc,
yujto junxon̈ej caj yedꞌ Cristo Jesús.
15 A on̈ tecꞌan on̈xo,
yovalil icha tic scutej co naan junjun on̈.
Tato ayex man̈ ichoc taꞌ e naani,
ol colvaj Dios eyedꞌoc yic ol nachajel pax juntzan̈xo tic eyuuj.
16 Yovalil sco bꞌeybꞌalej jantac tas tzꞌacꞌji nachajel cuuj yuj Dios.
17 Bꞌeybꞌalejec in bꞌeybꞌal tic.
A on̈ tic,
van co chꞌoxan jun vachꞌ bꞌeybꞌal tic dꞌayex.
Yuj chiꞌ,
ilec sbꞌeybꞌal ebꞌ lajan sbꞌeybꞌal quedꞌoc,
yic tze bꞌeybꞌalej paxi.
18 Ay jun tas tzijtum el valnac dꞌayex.
Axo yic svalanxibꞌat dꞌayex ticnaic,
tzin te oqꞌui,
yujto tzijtumxo ebꞌ chuc syutej sbꞌa,
yuj chiꞌ chequel to malaj yelcꞌoch schamel Cristo dꞌa teꞌ culus dꞌa ebꞌ.
19 Palta a ebꞌ chiꞌ,
yovalil ol satcanel ebꞌ dꞌa juneln̈ej.
An̈ej tas sgana ebꞌ,
an̈ej val ta ayoch spensar ebꞌ,
ichato sdiosal ebꞌ yaj juntzan̈ chiꞌ.
Ay juntzan̈ tas sbꞌo ebꞌ,
qꞌuixvubꞌtac.
An̈ej dꞌa juntzan̈ chiꞌ syicꞌchaan̈ sbꞌa ebꞌ.
An̈ej val juntzan̈ yic yolyibꞌan̈qꞌuinal tic sna ebꞌ.
20 Palta a on̈xo tic,
a dꞌa satchaan̈,
ataꞌ aybꞌat co pensar,
yujto aton jun chiꞌ co chon̈abꞌ yaji.
Van co tan̈van sjax co Columal dꞌa satchaan̈ chiꞌ,
aton Cajal Jesucristo.
21 A ol acꞌan qꞌuexmaj jun co nivanil malaj yelcꞌoch tic,
yic vachꞌ lajan ol aj yedꞌ yicoꞌ,
yujto a snivanil chiꞌ te vachꞌ toni.
Icha chiꞌ ol on̈ yutej yedꞌ spoder,
yujto ay spoder yacꞌan mandar masanil tasi.