Yovalil tzon̈ tzalajec yuj Cajal Jesús
4
Ex vucꞌtac ex vanabꞌ,
te xajan ex vuuj.
Ay val in gana tzin bꞌat ex vilaꞌ,
yujto tzin te tzalaj eyuuj.
Eyuujn̈ej toxo ix in cha spac in munlajel.
Yuj chiꞌ,
ex in xajanabꞌil,
tecꞌan tzeyutej e bꞌa eyacꞌanoch Cajal Jesús dꞌa e cꞌool.
2 A ticnaic svalbꞌat dꞌa ix Evodia yedꞌ dꞌa ix Síntique to junxon̈ej syutej spensar ebꞌ ix,
yujto snulej sbꞌa ebꞌ ix dꞌa Cajal Jesús.
3 A achxo,
ach vucꞌtac,
yel quetmunlajvumal co bꞌa,
tzin cꞌan pavor dꞌayach,
yic tzach colvaj a bꞌoan yaj ebꞌ ix canabꞌ chiꞌ taꞌ,
yujto a ebꞌ ix chiꞌ,
tecꞌan yutejnac sbꞌa ebꞌ ix smunlaj vedꞌoc ayic vecꞌnac valel vachꞌ abꞌix yic colnabꞌil.
An̈ejtonaꞌ,
munlajnac vin̈aj Clemente vedꞌoc yedꞌ juntzan̈xo ebꞌ.
A ebꞌ chiꞌ,
tzꞌibꞌabꞌilxo sbꞌi ebꞌ dꞌa jun libro bꞌaj ay co bꞌi a on̈ ayxo co qꞌuinal dꞌa juneln̈ej.
4 Con̈ tzalajec dꞌa masanil tiempo dꞌa Cajal Jesús.
Svalan junelxo,
con̈ tzalajec.
5 Yabꞌocabꞌ e pecal ebꞌ smasanil to vachꞌ e pensar.
Toxo ol ja Cajal Jesús.
6 Man̈ ex och ilcꞌolal yuj junoc tasi.
A jantacn̈ej tas tze naꞌa,
alec dꞌa Dios,
lesalvan̈ec.
Cꞌanec dꞌay,
tzeyacꞌanpax yuj diosal dꞌay.
7 Tato icha chiꞌ scutej co bꞌa,
ol yacꞌ sjuncꞌolal Dios dꞌayon̈.
A sjuncꞌolal ol yacꞌ chiꞌ,
maxtzac nachajel cuuj,
yujto man̈xo bꞌischajbꞌenoc jantac.
A sjuncꞌolal chiꞌ tzon̈ ilan yedꞌ co pensar,
yujto yic on̈xo Cristo Jesús.
Scacꞌoch co pensar dꞌa tas vachꞌ
8 Axo ticnaic ex vucꞌtac ex vanabꞌ,
scacꞌoch co pensar dꞌa masanil tas yel,
dꞌa masanil tas smoj nivan yelcꞌoch dꞌa co sat,
dꞌa masanil tas tojol,
dꞌa masanil tas malaj spaltail,
dꞌa masanil tas vachꞌ yedꞌ dꞌa masanil tas ay yelcꞌochi.
An̈ejtonaꞌ,
dꞌa masanil tas vachꞌ dꞌa yichan̈ Dios yedꞌ dꞌa masanil tas bꞌaj smoj tzꞌalji vachꞌ lolonel,
ataꞌ scaqꞌuec och co pensar.
9 Tze bꞌeybꞌalej juntzan̈ cꞌaybꞌubꞌal yedꞌ juntzan̈xo tas eyabꞌnaccan dꞌayin.
A jantac tas eyilnac yedꞌ tas eyabꞌnac dꞌayin,
a chiꞌ tze bꞌeybꞌalej.
Tato icha chiꞌ tzeyutej e bꞌa,
axo Dios,
jun tzꞌacꞌan co juncꞌolal,
a ol och eyedꞌoc.
Ofrenda schanac vin̈aj Pablo
10 A ticnaic,
tzin tzalaj yuj Cajal Jesús,
yujto ix in e nacot junelxo ayic ix eyacꞌancot e colval dꞌayin.
Vojtac to an̈ejaꞌ naan in eyuuj,
palta malaj val bꞌaj ix eyacꞌcot e colval dꞌayin,
yujto max yal eyuuj.
11 Svalbꞌat juntzan̈ tic dꞌayex,
man̈ yujoc to ay tas yovalil tzꞌoch vuuj yuj chiꞌ svalaꞌ.
Yujto toxo ix in cꞌaybꞌej in bꞌa in tzalaj yedꞌ tas ay dꞌayin.
12 Vojtac mebꞌail,
vojtacpax bꞌeyumal.
Ay bꞌaj malaj jabꞌoc tas ay dꞌayin.
Ay pax bꞌaj syacꞌ sobre.
Yuj chiꞌ vachꞌchom bꞌudꞌan in,
ma tzꞌoch in vejel,
cꞌaynac in,
stechajn̈ej vuuj.
13 Stechajn̈ej masanil tas vuuj,
yujto syacꞌ spoder Cristo dꞌayin.
14 Palta a ex pax tic,
te vachꞌ ix eyutej e bꞌa,
yujto ix eyacꞌcot e colval dꞌayin ayic ay in och dꞌa syaelal tic,
yuj chiꞌ ichato tzeyabꞌpax syail vedꞌ dꞌa tic.
15 Ex aj Filipos,
eyojtacxo to ayic in yamannac och valanel vachꞌ abꞌix,
in cot dꞌa Macedonia,
a exn̈ej ton colvaj ex dꞌayin.
A exn̈ej eyacꞌcot in gasto taꞌ.
16 Ayic vecꞌnac dꞌa Tesalónica,
eyacꞌnaccot chael oxel e colval dꞌayin taꞌ yuj in gasto.
17 Man̈ yujoc to svacꞌoch in pensar dꞌa e colval svalanbꞌat juntzan̈ tic dꞌayex.
Tzin te qꞌuechaan̈,
yujto van snivanbꞌi spac eyic dꞌa yichan̈ Dios.
18 A inxo tic,
man̈ jantacoc tas ix in chaꞌa,
tzato yacꞌpax sobre dꞌayin ticnaic.
A jun e colval ix ul yacꞌ vin̈aj Epafrodito tic,
cꞌocbꞌiln̈ej syabꞌ dꞌayin.
Icha junoc tas tzꞌacꞌji dꞌa Dios,
sucꞌuqꞌui sjabꞌ,
junoc silabꞌ n̈usbꞌil te vachꞌ,
icha chiꞌ jun e colval tic,
yujto stzalaj Dios yedꞌoc.
19 Yuj chiꞌ,
a co Diosal ol acꞌan masanil tas tzꞌoch eyuuj.
Yujto man̈ jantacoc tas vachꞌ ay dꞌay.
Aton juntzan̈ chiꞌ syacꞌ dꞌayon̈ a on̈ yic on̈xo Cristo Jesús tic.
20 Nivanocabꞌ yelcꞌoch co Diosal,
aton co Mam dꞌa masanil tiempo.
Amén.
Tzꞌacꞌjibꞌat stzatzil scꞌool ebꞌ
21 Svacꞌbꞌat stzatzil e cꞌool dꞌa sbꞌi Jesucristo e masanil ex yic exxo Dios taꞌ.
A ebꞌ vin̈ cucꞌtac ayecꞌ vedꞌ dꞌa tic,
syacꞌpaxbꞌat stzatzil e cꞌool ebꞌ vin̈.
22 An̈ejtonaꞌ masanil pax ebꞌ yicxo Dios dꞌa tic yedꞌ ebꞌ creyente ayoch dꞌa yopisio yuj vin̈ yajal dꞌa Roma tic,
syacꞌpaxbꞌat stzatzil e cꞌool ebꞌ.
23 Ayocabꞌ ecꞌ Cajal Jesucristo e yedꞌ e masanil taꞌ.
Amén.