Colosenses sbꞌi jun carta tic, aton jun scarta vin̈aj apóstol Pablo ix stzꞌibꞌejbꞌat dꞌa ebꞌ creyente dꞌa chon̈abꞌ Colosas ayic preso yaj vin̈. A jun iglesia chiꞌ, elnac yich yuj ebꞌ anima ochnac creyenteal yuj vin̈aj Pablo chiꞌ, ayic ayecꞌ vin̈ dꞌa Éfeso. Ix yabꞌan specal vin̈ to ay juntzan̈xo ebꞌ chꞌoc scꞌaybꞌubꞌal ix cꞌoch dꞌa Colosas chiꞌ, ix yalan ebꞌ icha tic: Yovalil sco cꞌan scolvaj juntzan̈xo espíritu quedꞌoc yic scojtacanel Dios sicꞌlabꞌil. Yovalil pax tzon̈ acꞌji circuncidar, scacꞌanpax juntzan̈ qꞌuin̈, sco cꞌanabꞌajan sleyal tas svaji, xchi ebꞌ.

A yuj juntzan̈ chiꞌ ix stzꞌibꞌejbꞌat jun carta tic vin̈aj Pablo chiꞌ dꞌa ebꞌ creyente chiꞌ. A vachꞌ abꞌix yic Cristo max schalaj sbꞌa yedꞌ tas syal ebꞌ chiꞌ, yujto a Cristo tzꞌacan syutej yacꞌan colnabꞌil, palta a juntzan̈ cꞌaybꞌubꞌal chiꞌ, najat tzon̈ yicꞌcanel dꞌa stzꞌey Cristo chiꞌ.

A Cristo yacꞌlabꞌejnac Dios Mamabꞌil, ayic sbꞌoannac masanil tastac. An̈ejtonaꞌ pax Cristo chiꞌ syacꞌlabꞌej Dios ticnaic yic syicꞌanoch ebꞌ anima dꞌa yol scꞌabꞌ, yuj chiꞌ a mach junxon̈ej tzꞌaj yedꞌ Cristo chiꞌ, ay sqꞌuinal dꞌa juneln̈ej, schꞌoxocabꞌ pax eli to ix qꞌuexmaj sbꞌeybꞌal yuj Cristo.

Ix lajvi chiꞌ, ix acꞌjibꞌat stzatzil scꞌol ebꞌ creyente yuj vin̈aj Pablo chiꞌ. Axo mach ix icꞌanbꞌat jun carta tic, aton vin̈aj Tíquico, an̈ejaꞌ vin̈ icꞌjinacbꞌat chꞌan̈ bꞌatnac dꞌa Éfeso. Ajun vin̈aj Onésimo yedꞌnac vin̈.