Bꞌabꞌel Tesalonicenses sbꞌi jun carta tic, aton sbꞌabꞌel carta vin̈aj apóstol Pablo dꞌa ebꞌ creyente dꞌa nivan chon̈abꞌ Tesalónica ay dꞌa yol yic Macedonia dꞌa yol smacbꞌen Roma. Ix el yich jun iglesia chiꞌ yuj vin̈, ayic ix pechjiel vin̈ yuj ebꞌ israel dꞌa Filipos, yujto syal slolonel Dios vin̈ dꞌa ebꞌ man̈ israeloc. Ayic ix cꞌoch vin̈ dꞌa chon̈abꞌ Corinto, ix cꞌochpax yabꞌixal ebꞌ creyente dꞌa iglesia dꞌa Tesalónica chiꞌ, yuj chiꞌ ix stzꞌibꞌejbꞌat jun carta tic vin̈ yic syacꞌan stecꞌanil ebꞌ vin̈ dꞌa screyenteal.

Ix tzalaj val vin̈ yuj ebꞌ, ix yacꞌan yuj diosal vin̈ yuj ebꞌ, yujto ay val och spensar ebꞌ dꞌa slolonel Dios, xajanejpax sbꞌa ebꞌ. Ix yacꞌan vin̈ snacot ebꞌ tas ajnac yecꞌ vin̈ dꞌa scal ebꞌ. Ix lajvi chiꞌ, ix yacꞌan spac tas ix scꞌanbꞌej ebꞌ dꞌa vin̈ yuj sjaubꞌal Cristo dꞌa schaelal yedꞌ pax tas ol aj spitzvixi ebꞌ chamnac. Ix yalanbꞌat vin̈ dꞌa ebꞌ creyente chiꞌ to stecꞌbꞌej sbꞌa ebꞌ yedꞌ jun cꞌaybꞌubꞌal tic, yic vachꞌ ay yalan yic ebꞌ yedꞌ Cristo ayic ol jaxoc.