2 Scacꞌ val yuj diosal dꞌa Dios eyuuj e masanil.

Juntac el tzon̈ lesalvi,

tzex co nacoti.

3 A dꞌa yichan̈ co Mam Dios sco nacoti to nivan tzex munlaj dꞌay,

yujto ix eyacꞌ val och dꞌa e cꞌool.

Sco nacoti to tzeyacꞌ servil Dios chiꞌ,

yujto te xajan eyuuj.

An̈ejtonaꞌ,

tecꞌan tzeyutej e bꞌa,

yujto an̈ej Cajal Jesucristo tzeyacꞌoch yipoc e cꞌool.

4 Xajanabꞌil ex yuj Dios,

yujto a sicꞌjinac exxo caneli.

5 Ayic quecꞌnac calel vachꞌ abꞌix yic colnabꞌil dꞌayex,

man̈ ton̈ejoc comon lolonnac on̈.

Yujto a Yespíritu Dios ochnac quedꞌoc.

Cojtac val sicꞌlabꞌil to te yel jun abꞌix tic.

Eyojtac paxi chajtil cutejnac co bꞌeybꞌal dꞌa e cal yuj e vachꞌil.

6 A exxo,

ochnac ex ijan e bꞌeybꞌalan co bꞌeybꞌal chiꞌ.

Ix e bꞌeybꞌalan pax sbꞌeybꞌal Cajal Jesús.

Vachꞌchom nivan syaelal ix eyabꞌi ayic ix e chaan slolonel Dios,

palta te tzalajcꞌolal ix e chaꞌa,

yujto a Yespíritu Dios ix acꞌan e tzalajcꞌolal chiꞌ.

7 Yuj chiꞌ,

ix e chꞌoxel jun vachꞌ bꞌeybꞌal dꞌa masanil ebꞌ quetcreyenteal dꞌa yol yic Macedonia chiꞌ yedꞌ dꞌa yol yic Acaya tic.

8 Eyuuj ix pucaxbꞌat yabꞌixal Cajal Jesús dꞌa junjun lugar.

Ix laj yabꞌ ebꞌ aj Macedonia chiꞌ yedꞌ ebꞌ aj Acaya to tzeyacꞌ val och Dios dꞌa e cꞌool.

Man̈ocn̈ej ebꞌ ix abꞌani,

ix laj yabꞌ pax ebꞌ ay dꞌa junjun lugar.

Yuj chiꞌ,

man̈xo yovaliloc a on̈ scalel eyabꞌixal dꞌa scal ebꞌ anima.

9 Yujto masanil mach van yalan eyabꞌixal to vachꞌ ajnac on̈ e chaani ayic quecꞌnac dꞌayex.

Van laj yalanpax ebꞌ chajtil eyutejnac eyactancan juntzan̈ eyacꞌnacoch e diosaloc,

ix ex och pax ijan eyacꞌan servil Dios pitzan,

aton jun Dios te yel.

10 An̈ejtonaꞌ syalanpax ebꞌ to van e tan̈van yemxul Yuninal Dios dꞌa satchaan̈,

aton Jesús.

A Dios acꞌjinacxi pitzvoc dꞌa scal ebꞌ chamnac.

Aton tzon̈ colancanel dꞌa yol scꞌabꞌ jun nivan yaelal ol javoc yuj yoval scꞌool Dios.