Smunlajel vin̈aj Pablo dꞌa Tesalónica
2
Eyojtac to man̈ nabꞌan̈ejoc ecꞌnac on̈ dꞌayex.
2 A dꞌa chon̈abꞌ Filipos bꞌabꞌlaj ecꞌnac on̈.
Eyojtac to nivan yaelal ecꞌ cabꞌnac taꞌ.*
Yacꞌnac val chucal ebꞌ dꞌayon̈.
Ayic co cꞌochnac dꞌa e chon̈abꞌ chiꞌ,
cabꞌnacxo syaelal chiꞌ.
Palta a co Diosal ochnac quedꞌoc,
yuj chiꞌ maj on̈ xiv calanel vachꞌ abꞌix dꞌa e cal.
3 Te tojol ecꞌ cutejnac calan dꞌayex.
Man̈ yujoc junoc tas sco nibꞌej tzeyacꞌ dꞌayon̈,
man̈ yujoc to tzex cacꞌ musansatil ecꞌ calannac el dꞌayex.
4 Icha sgana Dios,
icha chiꞌ ecꞌ cutejnac calaneli,
yujto ix yil Dios to smoj yacꞌanoch copisio calanel vachꞌ abꞌix yic colnabꞌil.
Man̈ yujoc sqꞌuechaan̈ ebꞌ anima quedꞌoc tzecꞌ calaneli,
palta yic sqꞌuechaan̈ Dios quedꞌoc,
yujto a tzꞌilan co pensar junjun on̈.
5 Eyojtac,
maj on̈ xidꞌecꞌ ex co montej lolonoc.
Man̈ yujoc pax cacꞌan ganar tumin tzecꞌ calaneli.
A co Mam Dios ojtannac to yel scalaꞌ.
6 Maj on̈ ecꞌ co say yic tzon̈ yicꞌanchaan̈ ebꞌ anima,
man̈oc ex tic,
man̈oc pax juntzan̈xo ebꞌ.
7 Syal ton calan dꞌayex to yajal on̈,
yujto schecabꞌ on̈ Cristo.
Palta ina te emnaquil ecꞌ cutejnac co bꞌa dꞌayex.
Icha junoc ix ix,
syaꞌilej sqꞌuibꞌtzitan yuneꞌ,
icha chiꞌ cutejnac co bꞌa dꞌayex.
8 Te xajan ex cuuj.
Yuj chiꞌ co nanac to man̈ocn̈ej vachꞌ abꞌix yic Dios tzecꞌ calel dꞌayex,
palta co bꞌecnac co bꞌa cacꞌan co qꞌuinal eyuuj.
Icha chiꞌ cutejnac co bꞌa taꞌ,
yujto te xajanabꞌil ex cuuj.
9 Tecan tze nacoti chajtil ecꞌ cutejnac co munlaj dꞌa e cal.
Cacꞌnac val quip co munlaji.
Ayic quecꞌnac calel vachꞌ abꞌix yic Dios dꞌayex,
cꞌual dꞌacꞌval munlajnac on̈ pax yuj co gasto.
Icha chiꞌ aj quecꞌnac taꞌ,
yujto malaj co gana ay mach tzꞌabꞌan syail yacꞌan co gasto.
10 Ayic quecꞌnac taꞌ,
te vachꞌ cutejnac co bꞌeybꞌal.
Tojol cutejnac pax co pensar dꞌayex a ex creyente ex quedꞌoc.
Malaj jabꞌoc chucal ecꞌ co saynac taꞌ.
Eyojtac to icha chiꞌ ecꞌ cutejnac co bꞌa.
An̈ejtonaꞌ yojtac pax Dios.
11 Eyojtac to icha syutej sbꞌa junoc vin̈ mamabꞌil dꞌa ebꞌ yuninal,
icha chiꞌ cutejnac cacꞌan eyip,
cacꞌanpax snivanil e cꞌool.
12 Calannac pax dꞌayex to vachꞌ tzeyutej e bꞌeybꞌal icha sgana Dios.
A Dios chiꞌ avtannac on̈ och dꞌa yol scꞌabꞌ,
yic ay calan quic bꞌaj ol och Dios yajalil.
13 Ayic ecꞌ calannac el slolonel Dios dꞌa e cal,
elan̈chamel eyacꞌnac och dꞌa e cꞌool to yel yic Dios,
man̈ yicoc anima.
Yuj chiꞌ scacꞌ val yuj diosal dꞌa Dios eyuuj.
A slolonel tic,
te yel yicoꞌ,
ay val yopisio sbꞌoan co pensar a on̈ creyente on̈xo tic.
14 Lajan ex aj yedꞌ ebꞌ creyente dꞌa junjun yiglesia Dios dꞌa yol yic Judea.
A ebꞌ chiꞌ,
yicxo Cristo Jesús ebꞌ quedꞌoc.
Ix yabꞌ val syail ebꞌ yuj ebꞌ yetisraelal.
An̈ejtonaꞌ,
ich ex taꞌ,
ix eyabꞌ syail yuj ebꞌ eyetchon̈abꞌ.
15 Aton ebꞌ quetisraelal chiꞌ miljinaccham Cajal Jesús icha ajnac smilancham ebꞌ schecabꞌ Dios ebꞌ dꞌa pecaꞌ.
Ix on̈ spechanpaxel ebꞌ.
Malaj jabꞌoc svachꞌil ebꞌ dꞌa yichan̈ Dios.
Te ajcꞌool syutej sbꞌa ebꞌ dꞌa masanil anima.
16 Ayic scalanel yabꞌixal dꞌa ebꞌ man̈ israeloc yic scolchaj ebꞌ,
axo ebꞌ israel max stacꞌlaj ebꞌ calaneli.
Yuj chiꞌ svachꞌ tzꞌacviel smul ebꞌ dꞌa yichan̈ Dios,
axo ticnaic ix cot lemnaj scꞌacꞌalcꞌolal Dios yic slajviel ebꞌ.
A tas snibꞌej vin̈aj Pablo
17 Ex vucꞌtac ex vanabꞌ,
toxon̈ej ix on̈ el lemnaj elelal dꞌa e cal.
Vachꞌchom man̈xalaj bꞌaj squil-laj co bꞌa,
palta te naan ex cuuj.
Sco nibꞌej bꞌat ex quilxi.
18 Ix cacꞌlej co bꞌati.
A in Pablo in tic,
tzijtum el ix vacꞌlej,
palta axo vin̈ Satanás maj on̈ chaanbꞌatlaj.
19 Ayic ol javoc Cajal Jesucristo,
axo co cꞌoch chiꞌ dꞌa yichan̈,
scacꞌoch yipoc co cꞌool to eyuuj ol co cha spac.
Eyuuj ol co cha co tzalajcꞌolal.
Eyuuj ol co cha spac co munlajel,
yic ay quelcꞌochi.
20 Eyuuj ay quelcꞌoch dꞌa yichan̈ Cajal Jesús chiꞌ.
Eyuuj ay pax co tzalajcꞌolal.