3
Yujto maj techaj ex co naani,
yuj chiꞌ ix co naꞌa to tzon̈ can co chꞌocoj dꞌa chon̈abꞌ Atenas,
2 yic sco checanbꞌat vin̈ cucꞌtac Timoteo tic dꞌayex,
yujto schecabꞌ co Mam Dios yaj vin̈.
Syalel vachꞌ abꞌix yic Cristo vin̈ quedꞌoc.
A vin̈ xidꞌ acꞌan e tecꞌanil,
xidꞌ yacꞌanpax eyip vin̈,
yic tze vachꞌ aqꞌuejoch Cristo dꞌa e cꞌool.
3 A vin̈ xidꞌ alannac dꞌayex,
yic vachꞌ malaj ex somchajel e pensar yuj tastac van eyabꞌan syail.
Yujto eyojtactaxoni to yovalil sja juntzan̈ yaelal chiꞌ dꞌa quibꞌan̈ icha sgana Dios.
4 Ayic quecꞌnac dꞌayex,
calnaccani to yovalil scabꞌ syail.
Eyojtac,
ix elcꞌoch icha tas calnaccan chiꞌ.
5 Yujto ix in te cusi ayic ix ex in naancoti,
yuj chiꞌ ix in checbꞌat vin̈aj Timoteo tic yabꞌi tato an̈ejaꞌ eyacꞌanoch Cristo dꞌa e cꞌool.
A val in naani talaj ix comon juviel e pensar taꞌ yuj vin̈ diablo.
Tato icha chiꞌ,
nabꞌan̈ej am ix quixtej co bꞌa quecꞌ taꞌ.
6 Axo ticnaic ix xidꞌ vin̈aj Timoteo tic dꞌayex.
Ixn̈ej jax vin̈ ix yalan vin̈ to an̈ejaꞌ tzeyacꞌoch Cristo dꞌa e cꞌool,
an̈ejaꞌ tze xajanej e bꞌa taꞌ.
Ix yalan vin̈ to tzon̈ e nacot dꞌa masanil tiempo,
to te xajan on̈ eyuuj.
Ix yalanpax vin̈ to e gana tzon̈ eyilaꞌ.
An̈ejtonaꞌ ich on̈ taꞌ,
co gana tzon̈ bꞌat ex quilaꞌ.
7 A on̈ tic,
tzijtum tas sja dꞌa quibꞌan̈,
van cabꞌan syail dꞌa tic.
Palta ayic ix cabꞌani to an̈ejaꞌ tzeyacꞌoch Cristo dꞌa e cꞌool,
ix on̈ te tzalaj eyuuj.
8 Icha yecꞌbꞌat junoc chamel dꞌa quibꞌan̈,
icha chiꞌ ix aj co cꞌool cabꞌani to tecꞌan eyaj dꞌa yic Cajal Jesús.
9 Eyuuj te ay val co tzalajcꞌolal dꞌa yichan̈ co Mam Dios.
Yuj chiꞌ scacꞌ val yuj diosal dꞌay eyuuj,
palta a jun yuj diosal scacꞌ chiꞌ max tzacꞌvan dꞌa jun tzalajcꞌolal ix yacꞌ Dios dꞌayon̈ eyuuj.
10 Cꞌual dꞌacꞌval cacꞌan quip co lesalvi yic vachꞌ syal co bꞌat ex quilaꞌ yic ol co vachꞌ acꞌan e tecꞌanil.
11 Co gana to a co Mam Dios yedꞌ Cajal Jesucristo tzꞌoch quedꞌoc,
yic vachꞌ syal co bꞌat ex quilaꞌ.
12 Sco cꞌan dꞌa Cajal Jesús,
yic aꞌ ol vachꞌ acꞌan e xajanej e bꞌa.
Tze xajanej masanil ebꞌ anima icha scutej ex co xajanan a on̈ tic.
13 Ayic ol jax Cajal Jesucristo,
ol on̈ aj yedꞌoc a on̈ yicon̈xo tic.
Co gana to a tzꞌacꞌan stecꞌanil e pensar yic vachꞌ an̈ejaꞌ vachꞌ e bꞌeybꞌal,
malaj jabꞌoc e paltail dꞌa yichan̈ co Mam Dios dꞌa jun tiempoal chiꞌ.