Jun vachꞌ bꞌeybꞌal dꞌa yichan̈ Dios
4
Ex vucꞌtac ex vanabꞌ,
ecꞌnac on̈ calel dꞌayex to vachꞌ tzeyutej e bꞌeybꞌal,
yic vachꞌ ol qꞌuechaan̈ Dios eyedꞌoc.
Axo ticnaic,
tzon̈ tevibꞌat dꞌayex dꞌa sbꞌi Cajal Jesús,
cham val calanbꞌati to tze cꞌanabꞌajej jun checnabꞌil tic sicꞌlabꞌil.
2 Eyojtacxo juntzan̈ schecnabꞌil Cajal Jesús ecꞌ calnaccaneli.
3 A juntzan̈ tas ol valbꞌat dꞌayex tic,
sgana Dios to ol e cꞌanabꞌajej.
Yovalil an̈ej dꞌay scacꞌoch co pensar:
Max yal eyem dꞌa ajmulal.
4 Junjun ex ex vucꞌtac yovalil tzeyojtaquejeli to an̈ej val ix eyetbꞌeyum bꞌaj tzeyacꞌoch e pensar.
Nivanocabꞌ yelcꞌoch ix eyetbꞌeyum chiꞌ dꞌayex junjun ex.
5 Max yal e nibꞌanoch junoc chucal yedꞌ e nivanil icha ebꞌ man̈ ojtannacoc Dios.
6 Mocabꞌ eyixtej junoc ebꞌ creyente yuj juntzan̈ tic.
Toxo ix cham val calan dꞌayex to a Dios Cajal ol acꞌan syaelal ebꞌ scꞌulan juntzan̈ chucal tic.
7 Yujto a ix on̈ avtanoch yicoc yic vachꞌ scutej co bꞌeybꞌal.
Man̈ yicoc sco cꞌulej chucal yuj chiꞌ ix on̈ yavtej och yicoc.
8 Tato ay ebꞌ schichonoch scꞌool dꞌa juntzan̈ checnabꞌil tic,
man̈oc dꞌa junoc anima schichonoch scꞌool ebꞌ,
palta aton dꞌa Dios ix acꞌanoch Yespíritu Santo dꞌayon̈.
9 Man̈ yovaliloc a in svalbꞌat dꞌayex to tze xajanej ebꞌ quetcreyenteal,
yujto a val lacꞌan Dios tzꞌacꞌan e naꞌa tas tzeyutej e xajanan e bꞌa.
10 Ina icha chiꞌ van eyutan e xajanan masanil ebꞌ quetcreyenteal dꞌa yol yic Macedonia chiꞌ eyedꞌoc.
Palta ex vucꞌtac ex vanabꞌ,
tzon̈ tevi val dꞌayex,
yic vachꞌ ecꞌalxo ol e xajanej e bꞌa.
11 Tzeyacꞌ val eyip,
yic juncꞌolal tzex aji.
Man̈ eyactejcan e bꞌoan e munlajel.
Vachꞌ tzeyutej e munlaj yedꞌ e cꞌabꞌ,
icha ajnac calancan dꞌayex,
12 yic vachꞌ ay eyelcꞌoch dꞌa yichan̈ ebꞌ comon anima.
Tato icha chiꞌ,
cꞌocbꞌil syabꞌ e gasto.
A yabꞌixal sjaubꞌal Cajal Jesús
13 Ex vucꞌtac ex vanabꞌ,
co gana tzeyojtaquej val eli,
tas yaj ebꞌ creyente chamnacxo,
yic vachꞌ max ex te cus yuj ebꞌ,
icha scus ebꞌ malaj jabꞌoc tas ayoch yipoc scꞌool.
14 A on̈xo tic scacꞌoch dꞌa co cꞌool to a Jesús ix chami,
ix pitzvixi.
Icha pax chiꞌ ol aj ebꞌ creyente chamnacxo.
A Dios ol acꞌanxicot ebꞌ yedꞌ Jesús.
15 A juntzan̈ van calanbꞌat tic dꞌayex,
aton slolonel Cajal Jesús.
Ayic ol jaxoc,
a on̈ pitzan on̈ to tic,
man̈ ol on̈ bꞌabꞌlaj bꞌatlaj dꞌa yichan̈ ebꞌ creyente chamnacxo,
junn̈ej ol aj co bꞌat yedꞌ ebꞌ.
16 Ayic ol cot Cajal Jesús dꞌa satchaan̈,
ol och jun av te chaan̈ icha yel yav jun sat ángel,
ol ocꞌ pax qꞌuen strompeta Dios.
Axo ebꞌ creyente chamnacxo ol bꞌabꞌlaj pitzvocxi ebꞌ.
17 Ol lajvoc chiꞌ,
a on̈xo pitzan on̈to taꞌ junn̈ej ol aj quicꞌjichaan̈ yedꞌ ebꞌ.
Axo co bꞌat chiꞌ dꞌa scal asun dꞌa nan̈al chaan̈,
yic bꞌat co cha Cajal Jesús chiꞌ.
Ichato chiꞌ ol on̈ aj yedꞌ dꞌa juneln̈ej.
18 Yuj chiꞌ,
tzeyal-laj eyabꞌ juntzan̈ cꞌaybꞌubꞌal tic,
yic ol vachꞌ ja snivanil e cꞌool.