5
Palta man̈ yovaliloc svalbꞌat dꞌayex bꞌaqꞌuin̈ ol jax Cajal Jesús chiꞌ.
2 Yujto eyojtacxo sicꞌlabꞌil to icha junoc elcꞌum sja dꞌacꞌvalil,
malaj junoc mach ojtannac janicꞌ sjavi,
icha chiꞌ ol aj sjavi scꞌual sjaubꞌal Cajal Jesús chiꞌ.
3 A dꞌa jun tiempoal chiꞌ ol yal ebꞌ anima:
A on̈ tic te vachꞌ caji,
¿toc ay tas sco naꞌa?
xcham ebꞌ.
Palta a dꞌa jun rato chiꞌ ol lajvoc el ebꞌ.
Icha tzꞌaj scot syail yalji yuneꞌ junoc ix ix,
icha chiꞌ ol aj sja yaelal dꞌa yibꞌan̈ ebꞌ.
Man̈ ol colchajcan el-laj ebꞌ dꞌa jun yaelal chiꞌ.
4 Palta a on̈ tic man̈ on̈ ayoc ecꞌ dꞌa qꞌuicꞌalqꞌuinal,
yujto snachajel juntzan̈ tic cuuj.
Yuj chiꞌ,
vachꞌchom icha sja junoc elcꞌum ol aj sjavi jun cꞌual chiꞌ,
palta lista scutej co bꞌa.
5 Yujto a on̈ tic ay on̈xo ecꞌ dꞌa saquilqꞌuinal,
yic on̈xo cꞌualil.
Yel man̈xo on̈ ayoc ecꞌ dꞌa qꞌuicꞌalqꞌuinal,
man̈xo on̈ yicoc dꞌacꞌvalil.
6 Yuj chiꞌ max yal lajan scutej co bꞌa icha juntzan̈xo ebꞌ anima ichato vaynac,
yujto max smaclej ebꞌ sja jun cꞌual chiꞌ.
Yovalil sco maclej,
tecꞌan pax scutejec co pensar.
7 A ebꞌ svayi,
a dꞌacꞌvalil svay ebꞌ.
A pax ebꞌ tzꞌucꞌan an̈,
a dꞌacꞌvalil syucꞌ an̈ ebꞌ.
8 Palta a on̈ tic,
yic on̈xo cꞌualil.
Yuj chiꞌ,
tecꞌan val scutej co pensar.
Yovalil sco vachꞌ aqꞌuejoch Cristo dꞌa co cꞌool.
An̈ejtonaꞌ,
yovalil sco xajanej co bꞌa,
yic lajan ol on̈ aj yedꞌ ebꞌ soldado scol sbꞌa yedꞌ qꞌuen qꞌueen syacꞌoch ebꞌ spichuloc sn̈iꞌ scꞌool.
Yovalil scacꞌoch yipoc co cꞌool to colbꞌil on̈xo,
yic lajan ol on̈ aj icha ebꞌ soldado cꞌoxbꞌil qꞌuen xumpil yuuj.
Icha chiꞌ scutej co colan co bꞌa.
9 Yujto ix on̈ siqꞌuelta Dios man̈ yicoc syacꞌ co yaelal yuj yoval scꞌool,
palta ix on̈ siqꞌuelta yic sco cha co colnabꞌil yuj Cajal Jesucristo.
10 A ix cham co qꞌuexuloc,
yuj chiꞌ taxon̈ej pitzan on̈ mato chamnac on̈xo,
palta ayic ol javoc,
junn̈ej ol on̈ aj yedꞌ co masanil.
11 Yuj chiꞌ,
tzeyacꞌlaj e tzalajcꞌolal junjun ex.
Tzeyacꞌanpax e tecꞌanil ichataxon van e cꞌulani.
Tzꞌiptzitaj ebꞌ creyente
12 Tzon̈ tevibꞌat dꞌayex ex vucꞌtac yedꞌ ex vanabꞌ yic nivanocabꞌ yelcꞌoch ebꞌ van smunlaj dꞌa e cal yuj Cajal Jesús dꞌa e sat,
yujto van ex scuchbꞌan ebꞌ,
van yecanpax yic Cajal chiꞌ ebꞌ e naꞌa.
Nachajocabꞌel eyuuj to a Dios ix acꞌan yopisio ebꞌ chiꞌ.
13 Yovalil nivanocabꞌ yelcꞌoch ebꞌ dꞌa e sat,
tze xajanej ebꞌ,
yujto smunlaj ebꞌ dꞌa Cajal Jesús.
Te juncꞌolal slaj eyutej e bꞌa e masanil taꞌ.
14 Scham val calanbꞌat dꞌayex to tze chec munlaj ebꞌ malaj sgana smunlaji.
Tzeyacꞌanpax snivanil scꞌool ebꞌ utzin scꞌool.
Tzeyacꞌanpax stecꞌanil ebꞌ manta val stecꞌanil.
Nivanocabꞌ tzeyutej e cꞌool dꞌa ebꞌ smasanil.
15 A ebꞌ malaj svachꞌil syutej sbꞌa dꞌayex,
man̈ e pac e bꞌa dꞌa ebꞌ.
Vachꞌn̈ej tzeyutej e bꞌa dꞌayex junjun ex yedꞌ dꞌa ebꞌ anima smasanil.
16 Tzalajcꞌolalocabꞌn̈ej eyaji.
17 Lesalvan̈ec.
Man̈ eyactejcan e lesalvi.
18 Tzeyacꞌ yuj diosal dꞌa Dios yuj yaln̈ej tas eyaji,
yujto a chiꞌ sgana Dios chiꞌ dꞌayon̈ a on̈ yicon̈xo Cristo Jesús tic.
19 Man̈ e cachoch vaan Yespíritu Dios ayoch dꞌayex junjun ex.
20 Man̈ eyacꞌcot eyoval dꞌa ebꞌ syacꞌ Dios yalel slolonel dꞌayex.
21 Jantacn̈ej juntzan̈ cꞌaybꞌubꞌal tzꞌalji dꞌayex,
cham val e naani tato yel,
mato maay.
A val dꞌa juntzan̈ yel,
ataꞌ tzeyacꞌoch e pensar.
22 Yaln̈ej tas malaj svachꞌil man̈ e chaꞌa.
23 A Dios acꞌum juncꞌolal.
Co gana to aꞌ tzex vachꞌ icꞌanoch yicoc sicꞌlabꞌil.
Co gana pax to aꞌ stan̈van e pixan,
e pensar yedꞌ e nivanil,
yic vachꞌ malaj jabꞌoc e mul ayic ol javoc Cajal Jesucristo.
24 A jun sicꞌjinac on̈ eli,
tzꞌelcꞌoch val tas syalaꞌ.
A ol acꞌanelcꞌoch juntzan̈ tic smasanil.
Tzꞌacꞌjibꞌat stzatzil scꞌool ebꞌ
25 Ex vucꞌtac ex vanabꞌ,
tzex lesalvi cuuj taꞌ.
26 Tzeyacꞌlaj stzatzil e cꞌool yuj e xajanan e bꞌa taꞌ.
27 Dꞌa yichan̈ Cajal Jesús,
svalbꞌat dꞌayex to tzeyavtej jun in carta tic dꞌa scal ebꞌ creyente smasanil taꞌ.
28 Aocabꞌ Cajal Jesucristo syacꞌ svachꞌcꞌolal dꞌayex.