4
A exxo patrón ex,
tojoln̈ej tzeyutej e bꞌa dꞌa ebꞌ e checabꞌ,
vachꞌ tzeyutej e bꞌa dꞌa ebꞌ.
Tze nacoti to ay junxo dꞌa satchaan̈ tzex acꞌan mandar,
aton Cajal Jesús.
2 A exxo e masanil,
tzex lesalvi val dꞌa smasanil e cꞌool dꞌa Dios dꞌa masanil tiempo.
Tzeyacꞌanpax yuj diosal dꞌay.
3 An̈ejtonaꞌ,
tzex lesalvi pax cuuj,
yic vachꞌ ol och Dios Cajal quedꞌoc,
yic ol yal calanel slolonel yedꞌ yabꞌixal Cristo acꞌbꞌilxo cojtaquejeli.
A ticnaic preso vaji,
yujto svalel yabꞌixal tic.
4 Lesalvan̈ec vuuj,
yic ol yal valanel yabꞌixal Cristo dꞌa stojolal.
5 Ayic tze cꞌuman ebꞌ manto creyenteoc dꞌa juntac el,
vachꞌ tzeyutej e bꞌa dꞌa ebꞌ.
6 Vachꞌn̈ej tzeyutej e loloni,
tze chꞌoxanel e vachꞌcꞌolal dꞌa ebꞌ.
Tato icha chiꞌ ol nachajel eyuuj tas ol aj e pacan tas scꞌanbꞌej junjun ebꞌ dꞌayex.
Tzꞌacꞌjibꞌat stzatzil scꞌool ebꞌ aj Colosas
7 A vin̈ cucꞌtac Tíquico tic,
xajan val vin̈ cuuj.
Tecꞌan val smunlaj vin̈ dꞌa co Mam Dios.
Ayoch vin̈ yacꞌan servil Cajal Jesús vedꞌoc.
Ol bꞌat vin̈ yal dꞌayex tastac caj dꞌa tic.
8 Tzin checpaxbꞌat vin̈ dꞌayex taꞌ yic ol yacꞌ yip e cꞌool vin̈.
9 An̈ejtonaꞌ ol bꞌat pax vin̈ cucꞌtac Onésimo yedꞌ vin̈.
A vin̈aj Onésimo tic,
eyetchon̈abꞌ vin̈,
te xajan vin̈ cuuj.
Tecꞌanxo vin̈.
Aton chavan̈ ebꞌ vin̈ tic ol bꞌat alan dꞌayex tastac caj dꞌa tic.
10 Axo pax vin̈aj Aristarco,
preso yaj vin̈ vedꞌ dꞌa tic.
Syacꞌpaxbꞌat stzatzil e cꞌool vin̈.
Yedꞌ vin̈aj Marcos,
aton vin̈ scꞌabꞌ yoc sbꞌa yedꞌ vin̈aj Bernabé,
syacꞌpaxbꞌat stzatzil e cꞌool vin̈.
Valnacxo dꞌayex yuj vin̈aj Marcos tic,
tato ol bꞌat vin̈ taꞌ,
tze cha vin̈ scꞌoch dꞌa tzalajcꞌolal.
11 Axo vin̈aj Jesús tic,
aton vin̈ scuch pax Justo,
syacꞌpaxbꞌat stzatzil e cꞌool vin̈.
A dꞌa scal ebꞌ vin̈ smunlaj vedꞌoc,
an̈ej ebꞌ vin̈ chavan̈ tic vetisraelal.
Tzꞌecꞌ ebꞌ vin̈ yaleli chajtil tzꞌaj yoch ebꞌ anima dꞌa yol scꞌabꞌ Dios.
A ebꞌ vin̈ chavan̈ tic,
syacꞌ val snivanil in cꞌool ebꞌ vin̈.
12 A vin̈ eyetchon̈abꞌ Epafras tic,
ayoch pax vin̈ yacꞌan servil Cristo vedꞌoc.
Slesalvi val vin̈ eyuuj,
yic tzex vachꞌ tecꞌcꞌaji,
yic an̈ej val juntzan̈ tas sgana Dios bꞌaj tze vachꞌ aqꞌuejoch e pensar.
13 A in tic,
svacꞌ testigoal in bꞌa,
svalani to tzex sna vin̈.
Snaanpaxbꞌat ebꞌ ay dꞌa Laodicea vin̈ yedꞌ ebꞌ ay dꞌa Hierápolis.
14 Axo vin̈aj Lucas,
vin̈ an̈tum,
xajan val vin̈ cuuj yedꞌ pax vin̈aj Demas,
syacꞌpaxbꞌat stzatzil e cꞌool ebꞌ vin̈.
15 Scacꞌpaxbꞌat stzatzil scꞌool ebꞌ creyente ay dꞌa Laodicea.
Scacꞌanpaxbꞌat stzatzil scꞌool ix canabꞌ Ninfas yedꞌ ebꞌ creyente smolbꞌej sbꞌa dꞌa spat ix.
16 Ayic ol lajvoc eyavtan jun carta tic dꞌa yichan̈ ebꞌ creyente taꞌ,
tzeyacꞌpaxbꞌat dꞌa ebꞌ aj Laodicea,
yic vachꞌ ol avtaj pax dꞌa scal ebꞌ taꞌ.
Axo tze chaan scꞌoch jun carta ol yacꞌpaxta ebꞌ aj Laodicea chiꞌ dꞌayex,
tzeyavtej paxi.
17 Axo dꞌa vin̈ cucꞌtac Arquipo,
tzeyal dꞌa vin̈ icha tic:
Acꞌval ip a munlaj dꞌa jun opisio ix yacꞌ Cajal Jesús tic dꞌayach,
xe chi dꞌa vin̈.
18 A in Pablo in tic,
a in val lacꞌan tzin tzꞌibꞌejbꞌat jun stzatzil e cꞌool tic.
Naeccoti to preso vaj dꞌa tic.
Yacꞌocabꞌ svachꞌcꞌolal Dios dꞌayex taꞌ.