3
A ticnaic jun,
pitzvinac on̈xo yedꞌ Cristo.
Yuj chiꞌ,
yovalil scacꞌoch co pensar dꞌa juntzan̈ tas ay dꞌa satchaan̈,
aton bꞌaj cꞌojanem Cristo dꞌa svachꞌ cꞌabꞌ Dios.
2 Yovalil an̈ej dꞌa tas ay dꞌa satchaan̈ bꞌaj scacꞌoch co pensar.
Man̈xo caqꞌuec och co pensar dꞌa tas ay dꞌa yolyibꞌan̈qꞌuinal tic,
3 yujto chamnac on̈xo yedꞌ Cristo.
Axo co qꞌuinal manto checlaj dꞌa yichan̈ ebꞌ anima yujto ayxo och dꞌa Cristo dꞌa yichan̈ Dios.
4 Yujto a Cristo co qꞌuinal yaji,
ato ol jaxoc,
ichato chiꞌ ol on̈ jax yedꞌoc,
axo scheclajel co qꞌuinal chiꞌ,
ay calan quic yedꞌ svachꞌilal Cristo.
Ix acꞌji jun acꞌ pensar dꞌayon̈
5 Yuj chiꞌ,
a jantacn̈ej e bꞌeybꞌal yic jun yolyibꞌan̈qꞌuinal tic,
actejeccan smasanil,
satocabꞌcanel dꞌa juneln̈ej.
Man̈xaocabꞌ junocxo mach tzꞌem dꞌa ajmulal,
ma junocxo chucal scꞌulej yedꞌ snivanil.
An̈ejtonaꞌ man̈ pecꞌtuminoc tzeyutej e bꞌa.
Tato pecꞌtumin tzeyutej e bꞌa,
a dꞌa yichan̈ Dios,
ichato e diosal jun chiꞌ.
6 Yujto a Dios ol acꞌancot jun nivan yaelal dꞌa yibꞌan̈ ebꞌ scꞌulan juntzan̈ sval tic,
yujto max scꞌanabꞌajej Dios chiꞌ ebꞌ.
7 A exxo tic,
a dꞌa yalan̈taxo,
e cꞌulejnac masanil juntzan̈ sval tic.
8 Palta a ticnaic,
yovalil ol e vachꞌ actejcan juntzan̈xo ol val tic:
Aton oval,
chichoncꞌolal,
chucal,
bꞌajval yedꞌ juntzan̈ chucal lolonel.
9 Man̈ eyesej dꞌayex junjun ex.
A juntzan̈ ix val tic,
man̈ e cꞌulej,
yujto a co chuc pensaril yedꞌ juntzan̈ co bꞌeybꞌal dꞌa yalan̈taxo,
toxo ix cactejcani.
10 A ticnaic,
qꞌuexmajnacxo co pensar.
Vanto svachꞌ bꞌoi,
yic slajanbꞌi co pensar yedꞌ Dios bꞌojinac on̈,
yic ol co vachꞌ ojtaquejel Dios chiꞌ.
11 Yuj chiꞌ,
man̈xalaj yelcꞌochi tato israel on̈ mato maay.
Tato ay on̈ acꞌbꞌil on̈ circuncidar mato maay.
Vachꞌchom ebꞌ chꞌoc chon̈abꞌil,
mato icha juntzan̈ ebꞌ tzꞌalji caltacteꞌal anima,
vachꞌchom ebꞌ checabꞌ yaji,
ma ebꞌ yic sbꞌa,
malaj yelcꞌoch juntzan̈ tic.
An̈ej Cristo ay yelcꞌochi,
a ayoch dꞌayon̈ junjun on̈.
12 A Dios ix on̈ xajanani.
Ix on̈ yacꞌanoch yicoc,
yuj chiꞌ vachꞌocabꞌ scutej co bꞌeybꞌal dꞌa yichan̈.
Ocꞌocabꞌ co cꞌool dꞌa ebꞌ quetanimail,
vachꞌocabꞌ scutej co pensar dꞌa ebꞌ.
Emnaquilocabꞌ scutej co bꞌa.
Nanamocabꞌ scutej co bꞌa.
Cacꞌocabꞌ nivancꞌolal ebꞌ tzꞌoch smul dꞌayon̈.
13 Max yal co pacan co bꞌa dꞌa ebꞌ.
Tato ay ebꞌ tzꞌacꞌanoch junoc tas dꞌa quibꞌan̈,
yovalil scacꞌ nivancꞌolal ebꞌ.
Icha ix aj on̈ yacꞌan nivancꞌolal Cristo,
icha chiꞌ scutej co bꞌa cacꞌan nivancꞌolal ebꞌ.
14 A val junxo tic to sco xajanej co bꞌa.
Tato sco xajanej co bꞌa,
ol co cꞌanabꞌajej juntzan̈ sval tic.
Tato icha chiꞌ,
tzꞌacan ton sco cꞌanabꞌajej.
15 A Dios avtannac on̈ och yicoc,
yic juncꞌolal tzon̈ aj co masanil,
yujto junxon̈ej caj dꞌa yol scꞌabꞌ Cristo.
Yuj chiꞌ te vachꞌ scutej co bꞌa dꞌa co cal,
yic syacꞌ sjuncꞌolal Cristo dꞌayon̈.
An̈ejtonaꞌ,
scacꞌan yuj diosal dꞌay.
16 In gana a val slolonel Cristo bꞌaj tzeyacꞌn̈ejoch e pensar.
Tze cꞌaybꞌan e bꞌa,
tzeyacꞌlan yip e cꞌool junjun ex dꞌa masanil sjelanil Cajal chiꞌ.
Slaj e bꞌitan juntzan̈ salmo,
himno yedꞌ juntzan̈xo bꞌit yic Dios yuj eyacꞌan yuj diosal dꞌay dꞌa smasanil e cꞌool.
17 Yaln̈ej tas sco cꞌulej,
ma tas scalaꞌ,
co cꞌulejocabꞌ dꞌa sbꞌi Cajal Jesús yuj cacꞌan yuj diosal dꞌa Dios Mamabꞌil yuuj.
A tas sco cꞌulej junjun on̈
18 A ex ix ex ayxo eyetbꞌeyum,
cꞌanabꞌajejec tas syal ebꞌ vin̈ dꞌayex.
Smoj tze cꞌanabꞌajej yujto icha chiꞌ sgana Cajal Jesús.
19 An̈ejtonaꞌ ex vinac ex ayxo eyetbꞌeyum,
tze xajanej ebꞌ ix eyetbꞌeyum chiꞌ.
Max yal scomon chichonoch e cꞌool dꞌa ebꞌ ix.
20 Yedꞌ ex pax ex uninabꞌil,
cꞌanabꞌajejec tas syal e mam e nun dꞌayex,
yic ol tzalaj Cajal Jesús eyedꞌoc.
21 A exxo mamabꞌil ex,
man̈ e comon tzuntzejcot yoval ebꞌ eyuninal,
yic vachꞌ max cus ebꞌ eyuuj.
22 An̈ejtonaꞌ,
ex checabꞌ eyaji,
cꞌanabꞌajejec tas syal ebꞌ e patrón.
Man̈ocn̈ej van ex yilan ebꞌ tze cꞌanabꞌajani,
yic stzalaj ebꞌ eyedꞌ e naani,
palta dꞌa smasanil e cꞌool tzex munlaji,
yuj e xivcꞌolal dꞌa Dios.
23 Masanil tas tze cꞌulej,
cꞌulejec dꞌa smasanil e cꞌool,
ichato a dꞌa Cajal Jesús van e munlaji,
man̈oc dꞌa ebꞌ anima.
24 Yujto cojtacxo to a Cajal Jesús chiꞌ ol acꞌan spac dꞌayon̈ a on̈ yuninal on̈ tic.
Yujto a jun Cajal van cacꞌan servil,
aton Cristo.
25 Palta a ebꞌ scꞌulan chucal,
ol scha spac juntzan̈ chucal scꞌulej ebꞌ chiꞌ.
Ato syalaꞌ tastac scꞌulej junjun ebꞌ,
icha chiꞌ ol aj schaan spac ebꞌ.