2
In gana snachajel eyuuj,
to svacꞌ val vip ex vacꞌan servil yedꞌ ebꞌ ay dꞌa chon̈abꞌ Laodicea yedꞌ masanil ebꞌ creyente mantalaj bꞌaj tzin ilani.
2 Snibꞌej in cꞌool to tecꞌan val tzeyutej e pensar yedꞌ ebꞌ taꞌ.
Junxon̈ej tzeyutej e xajanan e bꞌa e masanil.
Tzin nibꞌej to snachajel svachꞌcꞌolal Dios eyuuj,
yic ol ex vachꞌ tecꞌcꞌajoc.
Tato icha chiꞌ,
ol e vachꞌ ojtaquejel Cristo,
aton jun man̈ ojtacabꞌiloclaj dꞌa yalan̈taxo,
palta a ticnaic ix acꞌji cojtaquejeli.
3 Yuuj syal snachajel masanil sjelanil Dios cuuj yedꞌ jantacn̈ej tas yojtac.
4 Svalbꞌat juntzan̈ tic dꞌayex,
yic max e cha acꞌjoc musansatil e bꞌa yuj ebꞌ jelan syutej sbꞌa yalan yic dꞌayex.
5 Vachꞌchom man̈ in ayoc ecꞌ eyedꞌ taꞌ,
palta ichato ay in ecꞌ eyedꞌoc.
Yuj chiꞌ tzin tzalaji ayic svabꞌani to jun lajann̈ej tzeyutej e bꞌa taꞌ,
tecꞌan tzeyutej e bꞌa eyacꞌanoch Cristo dꞌa e cꞌool.
6 Yuj chiꞌ,
icha ix eyutej e chaan Cajal Jesucristo,
icha chiꞌ tzeyutej e bꞌa dꞌa yol scꞌabꞌ ticnaic.
7 Icha junoc te teꞌ ay val schꞌan̈al yibꞌ,
vachꞌ sqꞌuibꞌi,
ichocabꞌ taꞌ tzeyutej e pensar dꞌa Cristo chiꞌ.
Tecꞌan val tzeyutej e bꞌa eyacꞌanoch dꞌa e cꞌool,
icha ix acꞌji e cꞌaybꞌej.
Tzeyacꞌ yuj diosal dꞌa Dios dꞌa masanil tiempo.
Ix yacꞌ co qꞌuinal Dios yedꞌ Cristo
8 Tzeyil val e bꞌa.
Man̈ e cha juvoquel e pensar yuj juntzan̈ ebꞌ jelan syutej sbꞌa yalan yicoꞌ.
Jelan ebꞌ yesani,
palta malaj vachꞌ yoch tas syal ebꞌ chiꞌ.
Yujto man̈oc dꞌa Cristo scot jun yic ebꞌ chiꞌ.
An̈ej tastac scꞌulejnac ebꞌ smam yicham ebꞌ syalaꞌ yedꞌ juntzan̈xo scꞌaybꞌubꞌal yolyibꞌan̈qꞌuinal tic.
9 A masanil tas yaj Dios,
scheclajel masanil dꞌa Cristo.
10 Icha pax chiꞌ caj ticnaic,
yujto junn̈ej caj yedꞌ Cristo chiꞌ,
aton jun yajal yaj dꞌa masanil juntzan̈ ayoch yajalil,
juntzan̈ ay yopisio vachꞌchom man̈ chequeloc.
11 Acꞌbꞌil exxo circuncidar ticnaic,
yujto junxon̈ej eyaj yedꞌ Cristo.
Man̈oc jun circuncisión yic co nivanil svalaꞌ.
Palta ix on̈ colchajelta dꞌa yol scꞌabꞌ jun co chuc pensaril,
aton chiꞌ syalelcꞌochi,
ichato ix ex acꞌji circuncidar yuuj.
12 Ayic ix ex acꞌji bautizar,
ix ex mucchaj yedꞌ Cristo dꞌa yichan̈ Dios.
An̈ejtonaꞌ,
ix ex pitzvixi pax yedꞌoc,
yujto tzeyacꞌoch spoder Dios dꞌa e cꞌool.
Yuj spoder chiꞌ,
ix pitzvixi Cristo dꞌa scal ebꞌ chamnac.
13 A dꞌa yalan̈taxo,
chamnac ex dꞌa yichan̈ Dios yuj e mul,
yuj pax to malaj e circuncisión.
Palta axo ticnaic,
junn̈ej ix yutej Dios yacꞌan co qꞌuinal yedꞌ Cristo.
Ix yacꞌan lajvoc masanil co mul.
14 A dꞌa yalan̈taxo,
ay jun icha co bꞌoc ayoch dꞌa quibꞌan̈.
Aybꞌat dꞌa quibꞌan̈ yujto max co cꞌanabꞌajej juntzan̈ ley acꞌbꞌil dꞌayon̈.
Palta a Dios ix sucan sat jun icha co bꞌoc chiꞌ.
Ix yiqꞌuel dꞌa quibꞌan̈,
ichato a dꞌa spenec teꞌ culus ix lavuxajcanochi.
15 Ayic ix cham Cristo dꞌa teꞌ culus chiꞌ,
ix yacꞌ ganar dꞌa yibꞌan̈ juntzan̈ ebꞌ ayoch yajalil,
juntzan̈ ebꞌ ay yopisio.
A dꞌa yichan̈ ebꞌ anima,
ix chꞌoxjielta to malaj jabꞌoc yelcꞌoch ebꞌ.
Ix can ebꞌ dꞌa yalan̈ yuuj dꞌa juneln̈ej.
Yovalil a tas ay dꞌa satchaan̈ sco naꞌa
16 Malajocabꞌ mach tzex alubꞌtan̈an yuj tas tze vaꞌa,
ma yuj tas tzeyuqꞌuej,
ma yujto max e cꞌanabꞌajej juntzan̈ sqꞌuin̈ ebꞌ,
ma ayic tzꞌalji qꞌuen uj,
ma scꞌual icꞌoj ip.
17 Yujto a masanil juntzan̈ chiꞌ,
malaj yelcꞌochi.
Lajann̈ej yaj icha yechel junoc tas toto ol javoc.
A jun yechel squil chiꞌ,
aton yic Cristo.
18 Ay ebꞌ sgana yicꞌanecꞌ jun spac ol yacꞌ Dios dꞌayex,
palta man̈ e cha tas syal ebꞌ dꞌayex.
Nivanoc emnaquilal syutej sbꞌa ebꞌ,
syacꞌanem sbꞌa ebꞌ dꞌa yichan̈ juntzan̈ ángel.
Comon syacꞌoch sbꞌa ebꞌ dꞌa scal juntzan̈ tas man̈ yojtacoc ebꞌ.
Ton̈ej syicꞌchaan̈ sbꞌa ebꞌ,
yujto nivanoc syacꞌoch sbꞌa ebꞌ jelanil.
19 Yuj chiꞌ maxtzac yacꞌoch sbꞌa ebꞌ dꞌa Cristo ticnaic.
Palta a Cristo chiꞌ,
icha co jolom,
icha chiꞌ yaj dꞌayon̈.
A on̈xo snivanil caji.
Yujto a tzꞌacꞌan quip co tecꞌcꞌaji.
Yuj spoder Dios junn̈ej tzon̈ aj co masanil icha yaj junoc nivanil.
20 A ticnaic,
chamnac exxo yedꞌ Cristo quedꞌoc dꞌa yichan̈ Dios,
man̈xa yelcꞌoch juntzan̈ comon cꞌaybꞌubꞌal yic yolyibꞌan̈qꞌuinal tic dꞌayon̈.
Yuj chiꞌ,
¿tas yuj tzato eyacꞌoch e pensar dꞌa juntzan̈ scomon cꞌaybꞌubꞌal ebꞌ anima?
Ichato yic exto yolyibꞌan̈qꞌuinal tic.
21 A juntzan̈ cꞌaybꞌubꞌal chiꞌ tzꞌalani to ay juntzan̈ tas max yal co yamani yedꞌ juntzan̈ tas max yal co vaani yedꞌ pax juntzan̈ tas ay smay co cꞌanani.
22 Palta a juntzan̈ tzꞌalji to ay yovalil chiꞌ,
man̈xalaj yelcꞌoch dꞌayon̈,
yujto a juntzan̈ chiꞌ,
ayic sco cꞌanani junn̈ej rato slajvieli.
A juntzan̈ tzꞌalji chiꞌ,
comon cꞌaybꞌubꞌaln̈ej,
animan̈ej snaanqꞌue juntzan̈ scꞌaybꞌaj chiꞌ.
23 Yel toni,
ichato vachꞌ juntzan̈ cꞌaybꞌubꞌal chiꞌ.
Syalani to yovalil ay tas bꞌaj scal co bꞌa,
squiqꞌuemta co bꞌa,
scacꞌan techaj syaelal yedꞌ co nivanil tic.*
Palta a juntzan̈ chiꞌ,
malaj jabꞌoc yopisio on̈ scachan dꞌa co chucal.