A Scarta San Pablo
DꞌA EBꞌ AJ COLOSAS
Tzꞌel yich scarta vin̈aj Pablo
1
A in Pablo in tic,
schecabꞌ in Jesucristo,
yujto icha chiꞌ ix el dꞌa scꞌool Dios.
A in tic yedꞌ vin̈ cucꞌtac Timoteo
2 sco tzꞌibꞌejbꞌat jun co carta tic dꞌayex ex yic xo Dios dꞌa chon̈abꞌ Colosas,
mach ex eyacꞌnacxooch Cristo dꞌa e cꞌool.
Aocabꞌ co Mam Dios tzꞌacꞌan svachꞌcꞌolal yedꞌ sjuncꞌolal dꞌayex taꞌ.
Slesal vin̈aj Pablo yuj ebꞌ creyente
3 Ayic tzon̈ lesalvi eyuuj dꞌa juntac el,
scacꞌ yuj diosal dꞌa Dios,
aton Smam Cajal Jesucristo,
4 yujto ix cabꞌi to ix eyacꞌoch Cristo Jesús dꞌa e cꞌool,
ix cabꞌanpaxi to te xajan masanil ebꞌ yicxo Dios eyuuj.
5 Icha chiꞌ tzeyutej e bꞌa,
yujto van e tan̈van e colnabꞌil sicꞌan dꞌa satchaan̈.
Atax ix eyabꞌan jun vachꞌ abꞌix te yel tic,
ix eyacꞌanoch jun chiꞌ yipoc e cꞌool.
6 A jun abꞌix yic colnabꞌil albꞌil dꞌayex chiꞌ,
van yaljiel dꞌa masanil yolyibꞌan̈qꞌuinal tic.
Icha junoc te teꞌ sqꞌuibꞌi,
syacꞌan sat,
icha chiꞌ yaj jun abꞌix tic dꞌa ebꞌ tzꞌabꞌani.
An̈ejtonaꞌ,
icha chiꞌ ix aj dꞌayex,
atax ix e bꞌabꞌlaj abꞌani to man̈ jantacoc svachꞌcꞌolal Dios,
yujto ix nachajel eyuuj to yel.
7 Aton jun tic bꞌaj scꞌaybꞌejnac ex vin̈aj Epafras.
A vin̈ tic,
sco xajanej co bꞌa yedꞌ vin̈,
yujto quetmunlajvumal co bꞌa.
Te emnaquilal yacꞌan servil Cristo vin̈ dꞌa e cal taꞌ.
8 A vin̈ ul aljinac dꞌayon̈ to tze xajanej val e bꞌa yuj Yespíritu Dios.
9 Yuj chiꞌ,
atax ix cabꞌani,
max cactej co lesalvi eyuuj.
Sco cꞌan val dꞌa Dios eyuuj,
yic a tzꞌacꞌan e jelanil yuj Yespíritu,
syacꞌan nachajel masanil yic Dios eyuuj,
yic vachꞌ ol eyojtaquejel sicꞌlabꞌil tas snibꞌej Dios dꞌayex.
10 Tato icha chiꞌ tzex aji,
vachꞌ ol eyutej e bꞌa,
yic ol tzalaj Cajal Jesús eyedꞌoc,
yujto smoj val icha chiꞌ tzeyutej e bꞌa.
Te vachꞌ tzeyutej e bꞌa icha junoc te teꞌ tzijtum sat syacꞌaꞌ.
Ol e vachꞌ ojtacanel Dios sicꞌlabꞌil.
11 Tzon̈ lesalvi pax eyuuj,
yic a Dios tzꞌacꞌan e tecꞌanil yedꞌ spoder te nivan.
Tato icha chiꞌ,
ol techaj masanil tastac eyuuj.
Tecꞌan ol eyutoc e bꞌa,
ol ex tzalajn̈ej.
12 Ol eyacꞌan yuj diosal dꞌa co Mam Dios,
yujto a tzꞌacꞌan bꞌo co pensar,
yic ay calan quic co chaan tas ol yacꞌ dꞌayon̈ yedꞌ masanil ebꞌ yicxo yaji,
yujto yic on̈xo jun ay yic saquilqꞌuinal.
13 Yujto aꞌ ix on̈ colancanelta dꞌa yol scꞌabꞌ vin̈ yajal qꞌuicꞌalqꞌuinal.
Ix on̈ yacꞌanoch dꞌa yol scꞌabꞌ Yuninal te xajan yuuj.
14 Yujto ix cham Yuninal chiꞌ cuuj,
yuj chiꞌ ix on̈ colchajeli,
ix yacꞌancan lajvoc co mul.
Juncꞌolalxo caj yedꞌ Dios
15 Vachꞌchom max quil co Mam Dios,
palta a Cristo schꞌoxaneli chajtil yaji,
yujto lajann̈ej yedꞌoc.
A Cristo chiꞌ,
aytaxon eqꞌui ayic manto bꞌo junoc tasi.
16 A yacꞌlabꞌejnac Dios sbꞌoan masanil tas ay dꞌa satchaan̈ yedꞌ dꞌa sat luum tic,
juntzan̈ tas chequel yedꞌ juntzan̈ tas man̈ chequeloclaj,
a bꞌojinac smasanil.
Yedꞌ juntzan̈xo ebꞌ ayoch yajalil,
ebꞌ ay spoder,
vachꞌchom max yal quilan ebꞌ,
palta an̈ejaꞌ bꞌojinac ebꞌ,
yic vachꞌ tzꞌacꞌji servil yuj ebꞌ.
17 Ayic manto bꞌo yolyibꞌan̈qꞌuinal tic,
aytaxon ecꞌ Cristo chiꞌ.
Yuuj vachꞌ yajecꞌ masanil tasi.
18 Icha co jolom,
icha chiꞌ yaj Cristo dꞌayon̈,
yujto yiglesia on̈xo,
ichato snivanil caji.
Aꞌ tzꞌacꞌan co qꞌuinal.
Aꞌ bꞌabꞌlaj pitzvinac dꞌa scal ebꞌ chamnac,
yic vachꞌ yelxo nivan yelcꞌoch dꞌa yichan̈ masanil.
19 Ay val och Dios dꞌa Cristo sicꞌlabꞌil,
yujto icha chiꞌ sgana.
20 Snibꞌej pax Dios to juncꞌolalxon̈ej ol aj masanil tastac yedꞌoc yuj Cristo,
aton juntzan̈ ay dꞌa sat luum tic yedꞌ juntzan̈ tas ay dꞌa satchaan̈,
yujto ix elcan schiqꞌuil ayic ix cham dꞌa teꞌ culus,
yuj chiꞌ juncꞌolal ol aj masanil tas yedꞌoc.
21 A dꞌa yalan̈taxo najat ayex el dꞌa stzꞌey Dios.
Eyajcꞌool val e bꞌa yedꞌoc yuj e chuc pensaril,
yujto chuc e bꞌeybꞌal taꞌ.
Palta a ticnaic,
22 juncꞌolalxo eyaj yedꞌoc yuj schamel snivanil Cristo.
Icha chiꞌ ix aj schami,
yic tzon̈ yacꞌanoch yicoc,
yic malaj jabꞌoc co mul yedꞌ co chucal dꞌa yichan̈.
23 Palta yovalil tzeyacꞌn̈ej och e pensar dꞌa juntzan̈ cꞌaybꞌubꞌal bꞌaj cacꞌnacoch co cꞌool.
Tecꞌan val tzeyutej e bꞌa,
ichoc junoc te teꞌ te ay schꞌan̈al yibꞌ.
A jun abꞌix yic colnabꞌil eyabꞌnacxo,
man̈ eyactejcan eyacꞌanoch yipoc e cꞌool.
A jun abꞌix tic,
van yaljiel dꞌa masanil yolyibꞌan̈qꞌuinal tic.
A inxo Pablo in tic,
an̈ejaꞌ ix acꞌji vopisio valaneli.
Yopisio vin̈aj Pablo dꞌa scal ebꞌ creyente
24 A ticnaic,
tzin tzalaji,
yujto van vilan syaelal yuj e vachꞌiloc.
Yujto ayic svabꞌan syaelal yedꞌ in nivanil tic,
ichato tzin vachꞌ aqꞌuej tzꞌacvoc syaelal Cristo,
aton jun yaelal ix yabꞌ cuuj a on̈ yiglesia on̈xo tic,
ichato snivanil caji.
25 In acꞌjioch vacꞌ servil masanil ebꞌ vetcreyenteal.
Yacꞌnac jun vopisio tic Dios,
yujto sgana to tzin vachꞌ alej el slolonel.
26 Ay jun tas cꞌubꞌancanel yuj Dios yictax manto bꞌo yolyibꞌan̈qꞌuinal tic.
Palta axo ticnaic,
a ix acꞌan cojtaquejel a on̈ yic on̈xo tic.
A acꞌjinac vopisio yic svalanel jun tic.
27 Ix yacꞌan cojtaquejel jun tic,
yujto icha chiꞌ sgana.
A jun tic,
yelxo val nivan yelcꞌoch dꞌayex a ex man̈ ex israeloc.
A jun sval tic,
aton jun ix acꞌji cojtaquejeli to a Cristo cajanoch dꞌayex junjun ex quedꞌoc.
Yuj val Cristo tic,
scacꞌoch yipoc co cꞌool to ol on̈ cꞌoch bꞌaj ay svachꞌil.
28 Aton yabꞌixal Cristo van calaneli.
Sco cach junjun ebꞌ anima bꞌaj tzon̈ eqꞌui.
Sco cꞌaybꞌan pax ebꞌ,
yic vachꞌ sjelanbꞌi junjun ebꞌ dꞌa yic Dios.
Yujto co gana tecꞌanxo ebꞌ ayic ol cacꞌan och ebꞌ dꞌa yol scꞌabꞌ Cristo.
29 Yuj val juntzan̈ tic,
tzin munlaji.
Svacꞌan val vip dꞌa smasanil in cꞌool,
yujto a Cristo syacꞌ spoder dꞌayin.