6
A ex uninabꞌil ex,
cꞌanabꞌajejec e mam e nun.
Te vachꞌ dꞌa yichan̈ Cajal Jesús tato icha chiꞌ tzeyutej e bꞌa.
2 Ay jun schecnabꞌil Dios tzꞌalan icha tic:
Ayocabꞌ yelcꞌoch e mam e nun dꞌayex,
xchi.
Aton jun bꞌabꞌel checnabꞌil tic bꞌaj yacꞌnaccan stiꞌ Dios yuj tas syacꞌ dꞌayon̈,
tato sco cꞌanabꞌajej.
Syalani:
3 Tato icha chiꞌ,
ecꞌalxo svachꞌil eyicoꞌ yic vachꞌ snajatbꞌi e qꞌuinal dꞌa yolyibꞌan̈qꞌuinal tic,
xchi.
4 A exxo mamabꞌil ex,
man̈ e tzuntzejcot yoval ebꞌ eyuninal,
palta to tze qꞌuibꞌtzitej ebꞌ,
tze cachan ebꞌ.
Tze cꞌaybꞌanpax ebꞌ dꞌa scꞌaybꞌubꞌal Cajal Jesús.
5 A exxo checabꞌ eyaji,
tze cꞌanabꞌajej tas syal e patrón.
Ayocabꞌ yelcꞌoch ebꞌ dꞌa e sat,
tzex xiv dꞌa ebꞌ.
Dꞌa smasanil e cꞌool tzex munlaj dꞌa ebꞌ,
yujto ichato a dꞌa Cristo van e munlaji.
6 Man̈ocn̈ej van ex yilan ebꞌ tzex munlaji,
yic stzalaj ebꞌ eyedꞌ e naani.
Palta tzex munlaj dꞌa smasanil e cꞌool icha sgana Dios,
yujto aton Cristo van eyacꞌan servil.
7 Tzex munlaj val dꞌa tzalajcꞌolal,
yujto a dꞌa Cajal Jesús van e munlaji,
man̈oc dꞌa junoc anima.
8 Yujto cojtacxo to vachꞌchom checabꞌ caji,
ma munil quic co bꞌa,
palta ol co cha spac quic junjun on̈ dꞌa Cajal Jesús.
Ato syalaꞌ tastac vachꞌ sco cꞌulej junjun on̈.
9 A exxo patrón ex,
icha pax chiꞌ tzeyutej e bꞌa dꞌa ebꞌ checabꞌ yaj dꞌayex.
Man̈ ovoc tzeyutej e bꞌa dꞌa ebꞌ.
Tze nacoti to ay jun dꞌa satchaan̈ tzex acꞌan mandar yedꞌ ebꞌ,
aton Cajal Jesús.
A dꞌa yichan̈ Cajal chiꞌ,
lajann̈ej eyelcꞌoch yedꞌ ebꞌ.
Tecꞌan val tzeyutej e bꞌa
10 A ticnaic tecꞌan val scutej co bꞌa dꞌa yol scꞌabꞌ Cajal Jesús.
Ochocabꞌ co tecꞌanil yuj spoder.
11 Co chaec juntzan̈ tas syacꞌ Dios dꞌayon̈.
Aton juntzan̈ icha syamcꞌabꞌ ebꞌ soldado,
yic vachꞌ syal co tecꞌbꞌan co bꞌa dꞌa vin̈ diablo,
ayic syacꞌlan vin̈ on̈ yacꞌan ganar yedꞌ sjelanil.
12 Yujto man̈oc yedꞌ ebꞌ anima van cacꞌan oval,
palta a yedꞌ juntzan̈ enemigo scꞌulan chucal ay yopisio dꞌa scal icꞌ,
a yedꞌ ebꞌ van cacꞌan oval.
Aton ebꞌ chiꞌ ay yopisio yacꞌan mandar,
ayoch ebꞌ yajaliloc chucal dꞌa yolyibꞌan̈qꞌuinal tic.
13 Yuj chiꞌ,
ichaocabꞌ junoc soldado scꞌanan syamcꞌabꞌ yic oval,
ichaocabꞌ chiꞌ scutej co yamcꞌabꞌan juntzan̈ tas syacꞌ Dios dꞌayon̈,
yic tecꞌan scutej co bꞌa,
ayic sjavi junoc chucal.
Tato sco tecꞌbꞌej co bꞌa,
an̈ejaꞌ tecꞌan on̈ ayic ol lajvoc oval chiꞌ.
14 Yuj chiꞌ,
tecꞌan scutej co bꞌa.
Scacꞌ val och co pensar dꞌa jun lolonel te yel icha ebꞌ soldado syacꞌoch cincho yic oval.
Co chaec jun stojolal syacꞌ Dios dꞌayon̈,
yic lajan tzon̈ aj icha ebꞌ soldado scol sbꞌa yedꞌ jun qꞌuen pichul syacꞌoch ebꞌ dꞌa sn̈iꞌ scꞌool.
15 Icha ebꞌ soldado syacꞌ lista sbꞌa,
syacꞌanoch xan̈abꞌ,
ichaocabꞌ pax chiꞌ scutej cacꞌan lista co bꞌa yedꞌ co pensar,
yic tzon̈ bꞌat calel vachꞌ abꞌix yic juncꞌolal.
16 Axo junxo tic,
más yovalil to sco vachꞌ aqꞌuejoch Dios dꞌa co cꞌool,
sec yuj chiꞌ max on̈ yamchaj yuj vin̈ diablo,
ayic syacꞌan oval vin̈ quedꞌoc.
Ichato sjulcot juntzan̈ te teꞌ vin̈ ayoch scꞌacꞌal dꞌayon̈.
Tato sco vachꞌ aqꞌuejoch Dios dꞌa co cꞌool,
lajan on̈ icha ebꞌ soldado yambꞌiloch smaclabꞌ jul-labꞌ yic max yamchaj sjulji.
17 Scacꞌoch yipoc co cꞌool to colchajnac on̈xo.
Tato icha chiꞌ,
lajan on̈ icha ebꞌ soldado cꞌoxbꞌil jun qꞌuen xumpil yuuj.
Axon̈ej slolonel Dios acꞌbꞌil dꞌayon̈ yuj Yespíritu scacꞌlabꞌej icha syutej ebꞌ soldado yacꞌlabꞌan yespada.
18 An̈ejtonaꞌ tzon̈ lesalvi dꞌa Dios dꞌa masanil tiempo yedꞌ spoder Yespíritu,
sco cꞌanan tas dꞌay.
Scacꞌ val och co pensar co lesalvi.
Man̈ on̈ tzactzajoc.
Lesalvan̈ec yuj jantacn̈ej ebꞌ yicxo Dios quedꞌoc.
19 Tzex lesalvi pax vuuj,
yic ol yacꞌpax Dios nachajel vuuj tas ol valaꞌ,
sec yuj chiꞌ an̈ejaꞌ tecꞌan ol vutoc in bꞌa valanel vachꞌ abꞌix,
aton jun chꞌoxbꞌil yuj Dios dꞌayon̈.
20 A Dios acꞌjinac vopisio valanel jun abꞌix tic,
yuj chiꞌ preso vaj ticnaic.
Lesalvan̈ec vuuj,
yic an̈ejaꞌ tecꞌan ol vutoc in bꞌa valaneli,
icha sgana Dios chiꞌ.
Tzꞌacꞌjibꞌat stzatzil scꞌool ebꞌ aj Éfeso
21 A vin̈ cucꞌtac Tíquico,
xajanabꞌil val vin̈ cuuj.
Tecꞌan val smunlaj vin̈ quedꞌ dꞌa yic Cajal Jesús.
A vin̈ ol bꞌat alan dꞌayex tas vaj dꞌa tic yedꞌ tas van in cꞌulani.
22 Yuj chiꞌ tzin checbꞌat vin̈ dꞌayex taꞌ,
yic a vin̈ ol alanoc tas caji,
sec yuj chiꞌ ol ex tzalaj cuuj.
23 Yacꞌocabꞌ sjuncꞌolal co Mam Dios yedꞌ Cajal Jesucristo dꞌayex taꞌ,
tze xajanan e bꞌa.
In gana tze vachꞌ aqꞌuejoch Dios chiꞌ dꞌa e cꞌool.
24 Jantacn̈ej ebꞌ xajanan Cajal Jesucristo dꞌa masanil tiempo,
ayocabꞌ svachꞌcꞌolal Dios dꞌa ebꞌ.