A tas scutej co bꞌeybꞌal
5
A ticnaic yuninal on̈xo Dios,
xajanabꞌilon̈xo yuuj.
Yuj chiꞌ icha syutej sbꞌa,
yovalil icha chiꞌ scutej co bꞌa.
2 Sco xajanejn̈ej co bꞌa icha ix aj on̈ xajanan Cristo ayic ix cham cuuj.
Icha nocꞌ calnel smiljicham silabꞌil yuj mul,
sumumi sjabꞌ dꞌa Dios,
stzalaj val yedꞌoc,
icha chiꞌ ix aj smiljicham Cristo chiꞌ yuj co mul.
3 A ticnaic,
yicon̈xo Dios.
Yuj chiꞌ,
a val ajmulal,
ma yaln̈ej tas chucal scꞌulej ebꞌ anima yedꞌ snivanil,
ma pecꞌal,
man̈xo smojoc calubꞌtan̈ani.
4 An̈ejtonaꞌ,
max yal calan juntzan̈ tas qꞌuixvubꞌtac yalji,
ma juntzan̈ chucal lolonel.
Yujto a juntzan̈ chiꞌ,
man̈ smojoc calani.
Aocabꞌ acꞌoj yuj diosal scacꞌ dꞌa Dios dꞌa yichan̈ to scalaꞌ.
5 Cojtacxo to a ebꞌ tzꞌemn̈ej dꞌa ajmulal yedꞌ ebꞌ scꞌulan yaln̈ej tas chucal yedꞌ snivanil,
ebꞌ pecꞌ tumin,
malaj yalan yic ebꞌ yoch bꞌaj ol yacꞌ yajalil Cristo yedꞌ Dios.
Yujto a ebꞌ pecꞌ tumin chiꞌ,
a dꞌa yichan̈ Dios,
ichato sdiosal jun chiꞌ ebꞌ.
6 Man̈ eyacꞌ acꞌjoc musansatil e bꞌa yuj ebꞌ tzꞌalani to malaj yovalil co cꞌulan juntzan̈ sval tic.
A tas syal ebꞌ chiꞌ,
malaj yelcꞌochi,
yujto ol cot jun nivan yaelal yuj yoval scꞌool Dios dꞌa yibꞌan̈ ebꞌ scꞌulan juntzan̈ chiꞌ.
7 Yuj chiꞌ,
xe comon aqꞌuejtaoch e bꞌa yedꞌ ebꞌ.
8 A dꞌa yalan̈taxo,
ichato a dꞌa scal qꞌuicꞌalqꞌuinal ayon̈ ecꞌ yuj co chuc bꞌeybꞌal.
Axo ticnaic,
ichato ayon̈xo ecꞌ dꞌa scal saquilqꞌuinal,
yujto junxon̈ej caj yedꞌ Cajal Jesús.
Yicon̈xo jun ay yic saquilqꞌuinal chiꞌ ticnaic,
yuj chiꞌ yovalil vachꞌ scutej co bꞌeybꞌal.
9 Tato yel yicon̈xo jun aj saquilqꞌuinal chiꞌ,
vachꞌn̈ej scutej co bꞌa,
tojol scutej co bꞌa.
An̈ej val tas yel scalaꞌ.
10 Aocabꞌ juntzan̈ tas vachꞌ dꞌa sat Dios sco bꞌeybꞌalej.
11 Man̈ eyacꞌoch e bꞌa dꞌa scal juntzan̈ tas scꞌulej ebꞌ ayto ecꞌ dꞌa scal qꞌuicꞌalqꞌuinal,
yujto a tas scꞌulej ebꞌ chiꞌ,
malaj svachꞌil.
Más am vachꞌ tze chꞌoxeli to malaj yelcꞌoch juntzan̈ chiꞌ.
12 Yujto a juntzan̈ tas scꞌulej ebꞌ dꞌa cꞌubꞌeltac chiꞌ,
vachꞌchom ton̈ej scalaꞌ,
te qꞌuixvelal.
13 Palta a jantacn̈ej tas scꞌulej ebꞌ chiꞌ,
ol acꞌjoc proval yuj jun saquilqꞌuinal yic Dios,
axo scheclajelta chiꞌ.
Yujto a jun saquilqꞌuinal chiꞌ,
a tzꞌacꞌan checlajel masanil tasi.
14 Yuj chiꞌ ay jun tzꞌalan icha tic:
A ach ichato vaynac ach,
aqꞌuel a vayan̈.
Qꞌuean̈ vaan dꞌa scal ebꞌ icha chamnacto,
yic ol yacꞌ saquilqꞌuinal Cristo dꞌayach,
xchi.
15 Yuj chiꞌ,
tzeyil val e bꞌa yedꞌ tas tze cꞌulej,
man̈ ichoc ebꞌ malaj spensar dꞌa yichan̈ Dios tzeyutej e bꞌa.
Ayocabꞌ e pensar.
16 Tzeyacꞌ val eyip dꞌa yic Dios,
yacbꞌan ayto jabꞌocxo tiempo,
yujto a jun tiempoal tic,
ayxo smay.
17 Man̈ quistaloc tzeyutej e bꞌa.
Aqꞌuec eyip e naaneli tas val sgana Dios dꞌayon̈.
18 Man̈ ex och ucꞌuman̈il,
yujto tzꞌixtaxel co pensar yuj an̈.
Más vachꞌ a Yespíritu Dios tze vachꞌ chaejoch yacꞌ yajalil dꞌayex.
19 Ayic tze molbꞌan e bꞌa,
tze bꞌitej juntzan̈ salmo,
himno yedꞌ juntzan̈xo bꞌit yic Dios.
Ayic tzex bꞌitani,
tzeyal vachꞌ lolonel dꞌa Cajal Jesús dꞌa smasanil e cꞌool.
20 A dꞌa sbꞌi Cajal Jesucristo scacꞌ yuj diosal dꞌa Dios co Mam yuj yaln̈ej tas sja dꞌa quibꞌan̈.
A schecnabꞌil Dios dꞌayon̈
21 Tze chaoch dꞌa eyibꞌan̈ e cꞌanabꞌajan tas tzeyal junjun ex,
yujto ayon̈ och dꞌa yalan̈ smandar Cristo.
22 A ex ix ex ayxo eyetbꞌeyum,
tze chaoch dꞌa eyibꞌan̈ e cꞌanabꞌajan tas syal ebꞌ vin̈,
icha tzeyutej e bꞌa dꞌa Cajal Jesús.
23 Yujto a vin̈ eyetbꞌeyum chiꞌ,
ichato e jolom yaj vin̈,
icha Cristo sjolomal yaj dꞌa yiglesia.
An̈ejtonaꞌ,
co Columal paxi,
ichato snivanil caji.
24 Icha syutej iglesia scꞌanabꞌajan dꞌa Cristo,
ichaocabꞌ chiꞌ ebꞌ ix ix,
cꞌanabꞌajumocabꞌ syutej sbꞌa ebꞌ ix dꞌa vin̈ yetbꞌeyum dꞌa smasanil.
25 A exxo vinac ex ayxo eyetbꞌeyum,
tze xajanej ebꞌ ix,
icha syutej Cristo xajanan yiglesia.
Aꞌ ix yacꞌcham sbꞌa cuuj,
26 yic tzon̈ yicꞌoch yicoc yuj on̈ sacbꞌitan dꞌa a aꞌ yedꞌ dꞌa slolonel.
27 Icha chiꞌ ix on̈ yutej a on̈ yiglesia on̈ tic,
yic te vachꞌ on̈,
ayic ol on̈ cꞌoch dꞌa yichan̈.
Man̈xa jabꞌoc co paltail taꞌ.
Icha junoc pichul malaj jabꞌoc mic dꞌay,
malaj pax jabꞌoc bꞌaj n̈icꞌchimtac,
te dꞌajaji yilji.
28 An̈ejtonaꞌ,
a ex ayxo ebꞌ ix eyetbꞌeyum chiꞌ,
icha chiꞌ tzeyutej e xajanan ebꞌ ix.
Tato tze xajanej ebꞌ ix,
syalelcꞌochi,
a e nivanil van e xajanani.
29 ¿Toc val ay junoc mach schichonoch scꞌool dꞌa snivanil?
Co masanil sco yaꞌilej val co nivanil chiꞌ,
scacꞌanpax servil.
Icha chiꞌ tzon̈ yutej Cristo a on̈ yiglesia on̈ tic,
30 yujto ichato snivanil caji.
31 Yuj chiꞌ,
a vin̈ vinac,
syactejcan smam snun vin̈,
yic junxon̈ej tzꞌajcan vin̈ yedꞌ ix yetbꞌeyum.
Axo ebꞌ schavan̈il,
junxon̈ej nivanil tzꞌajcan ebꞌ,
xchican dꞌa Slolonel Dios.
32 A dꞌa juntzan̈ lolonel tic scheclajel jun cꞌaybꞌubꞌal te nivan yelcꞌochi,
aton jun chꞌoxbꞌilxo yuj Dios.
Sval jun tic yuj tas yaj Cristo yedꞌ yiglesia.
33 An̈ejtonaꞌ syalanpax dꞌayex a ex vinac ex ayxo ebꞌ ix eyetbꞌeyum to tze xajanej ebꞌ ix,
icha tzeyutej e xajanan e nivanil.
Syalanpax dꞌayex a ex ix ex ayxo eyetbꞌeyum,
nivanocabꞌ yelcꞌoch vin̈ eyetbꞌeyum chiꞌ dꞌayex junjun ex.