Yuj Yespíritu Dios junn̈ej pensaril tzon̈ aji
4
A in tic,
preso vaji,
yujto svacꞌ servil Cajal Jesús.
Svalbꞌat dꞌayex to vachꞌn̈ej tzeyutej e bꞌa.
Smoj icha chiꞌ,
yujto a Dios avtannac ex och yicoc.
2 Emnaquil tzeyutej e bꞌa,
vachꞌ pax tzeyutej e pensar.
Tzeyacꞌ nivancꞌolal ebꞌ tzꞌoch smul dꞌayex.
Nivan tzeyutej e cꞌool junjun ex.
An̈ejtonaꞌ,
slaj e xajanej e bꞌa.
3 Tzeyacꞌ val e yip,
yic juncꞌolal tzex aji,
yic man̈ ol ixtax el e junn̈ej pensaril syacꞌ Yespíritu Dios.
4 Yujto a on̈ tic,
ichato junn̈ej animail caji.
Junn̈ej Espíritu ayoch dꞌayon̈.
Junn̈ej tas ayoch yipoc co cꞌool,
aton bꞌaj avtabꞌil on̈ och yuj Dios.
5 Junn̈ej Cajal.
Junn̈ej cꞌaybꞌubꞌal bꞌaj scacꞌoch co cꞌool.
Junn̈ej tas syalelcꞌoch co bautismo co chanac.
6 An̈ejtonaꞌ,
junn̈ej Dios,
aton co Mam co masanil.
Aꞌ tzon̈ acꞌan mandar co masanil,
tzon̈ syamcꞌabꞌan pax junjun on̈.
Aꞌ ayoch dꞌayon̈ co masanil.
7 Palta chꞌocchꞌoc copisio,
ato syalaꞌ tas syacꞌ Cristo dꞌayon̈ junjun on̈.
8 Yuj chiꞌ,
syal icha tic dꞌa Slolonel Dios Tzꞌibꞌabꞌilcani:
Ayic ix qꞌuex dꞌa satchaan̈,
a ebꞌ icha presotaxon yaji,
ix yicꞌbꞌat ebꞌ yedꞌoc.
An̈ejtonaꞌ syacꞌ pax yopisio ebꞌ anima,
xchi.
9 Svalbꞌat dꞌayex tas syalelcꞌoch jun syal chiꞌ:
Ix qꞌuex dꞌa satchaan̈.
Syal icha chiꞌ,
yujto ayic manto paxqꞌue Cristo dꞌa satchaan̈,
xidꞌnaquem dꞌa sjulal yich lum luum.
10 A jun xidꞌnaquem chiꞌ,
an̈ejtonaꞌ aꞌ paxnacqꞌue masanto dꞌa schaan̈il satchaan̈ chiꞌ,
yic svachꞌ bꞌoel masanil tas yuuj.
11 Yuj chiꞌ,
a tzꞌacꞌan copisio junjun on̈.
Ay on̈ schecabꞌ caji.
Ay on̈ syacꞌ calel slolonel.
Ay on̈ scalel vachꞌ abꞌix yic colnabꞌil.
Ay on̈ squil ebꞌ quetcreyenteal,
sco cꞌaybꞌan ebꞌ.
12 Icha chiꞌ ix yutej yacꞌan copisio junjun on̈,
yujto yic on̈xo,
yic scacꞌ servil,
yic svachꞌ tecꞌcꞌaj co pensar a on̈ icha snivanil Cristo caj tic.
13 Icha chiꞌ tzon̈ yutej,
yic vachꞌ junlajan ol aj cacꞌan och dꞌa co cꞌol co masanil.
Axo co vachꞌ ojtacanel Yuninal Dios chiꞌ,
yic stecꞌcꞌaj co pensar icha stecꞌanil spensar Cristo.
14 Tato icha chiꞌ caji,
man̈ ol somchajel co pensar yuj juntzan̈ chꞌoc cꞌaybꞌubꞌal tzꞌalji.
Man̈ ol on̈ acꞌjoc pax musansatil yuj juntzan̈ ebꞌ jelan yesani yic tzon̈ yicꞌbꞌat ebꞌ dꞌa junoc chꞌoc cꞌaybꞌubꞌal.
Man̈ lajanoc pax ol on̈ aj icha ebꞌ unin cꞌun somchajel spensar,
ma icha junoc barco ton̈ej stzꞌeytzꞌonecꞌ yuj icꞌ.
15 Palta a on̈ tic,
an̈ej juntzan̈ tas yel tzꞌalji sco bꞌeybꞌalej,
yujto sco xajanej co bꞌa.
Yovalil tzon̈ tecꞌcꞌaji,
yic lajan tzon̈ aj yedꞌ Cristo,
yujto icha yaj co jolom,
icha chiꞌ yaj dꞌayon̈.
16 A on̈xo tic,
ichato snivanil caji.
A co nivanil tic yamyumbꞌa yaj yedꞌ schꞌan̈al.
Ayic vachꞌ yaj junjun macan̈,
te vachꞌ smunlaji.
Icha chiꞌ caj yedꞌ Cristo chiꞌ,
yujto aꞌ tzꞌacꞌan quip co masanil.
Ayic tzon̈ munlaj junjun on̈ dꞌa smojal,
svachꞌ tecꞌcꞌaj co pensar co masanil,
sco vachꞌ xajanan pax co bꞌa.
Sco cha qꞌuexmaj co pensar
17 A juntzan̈ ol valbꞌat tic dꞌayex,
aton schecnabꞌil Cajal Jesús:
Man̈xo lajanoc tzeyutej e bꞌa icha ebꞌ man̈ ojtannacoc Dios,
yujto icꞌbꞌilbꞌey sbꞌeybꞌal ebꞌ yuj juntzan̈ pensar malaj bꞌaj scꞌanabꞌajaxi.
18 A spensar ebꞌ,
te qꞌuicꞌalqꞌuinal yaji.
Najat yajel ebꞌ dꞌa jun qꞌuinal syacꞌ Dios dꞌa juneln̈ej.
Yuj spitalil ebꞌ max nachajel jabꞌoc yuj ebꞌ.
19 Max qꞌuixvi jabꞌoc ebꞌ.
Comonn̈ej tzꞌem ebꞌ dꞌa ajmulal.
Comonn̈ej scꞌulej yaln̈ej tas chucalil ebꞌ.
20 Palta a exxo,
man̈ ichoc taꞌ ix aj e cꞌaybꞌan yic Cristo.
21 Yujto a ex tic,
eyabꞌnac yabꞌixal Cristo chiꞌ,
eyojtac pax e bꞌeybꞌalani a to a yalan scꞌaybꞌubꞌal te yel yacꞌnac e cꞌaybꞌej chiꞌ.
22 A jun eyicham bꞌeybꞌal dꞌa yalan̈taxo,
tzex ixtaj yuuj,
yujto tze cꞌulej juntzan̈ tas tze nibꞌejochi.
Yuj chiꞌ yovalil tze vachꞌ actejcan jun eyicham bꞌeybꞌal chiꞌ.
23 Yuj chiꞌ,
yovalil tze vachꞌ bꞌoej e pensar dꞌa junjun cꞌu.
24 Yovalil tze cha qꞌuexmaj e pensar,
tze chaan junxo acꞌ pensar sbꞌo Dios icha sgana.
Tato icha chiꞌ,
tojol ol eyutoc e bꞌa,
te vachꞌn̈ej ol aj e bꞌeybꞌal.
25 Yuj chiꞌ,
man̈xo eyeslaj e tiꞌoc junjun ex,
an̈ej val junoc tas te yel tzeyalaꞌ,
yujto junn̈ej animail caj co masanil.
26 Ayic scot eyoval,
man̈ e cꞌulej junoc chucal yuj jun eyoval chiꞌ.
Max yal an̈ejaꞌ yajcot eyoval tzꞌem cꞌu.
27 Tato ayn̈ejcot eyoval chiꞌ,
ol eyacꞌ slugar vin̈ diablo sjuanel e pensar.
28 Tato ayex mach ex elcꞌum ex dꞌa yalan̈taxo,
man̈xo ex elcꞌanvoc ticnaic.
Más vachꞌ tzex munlaj dꞌa junoc munlajel vachꞌ,
yic vachꞌ ol yal e colvaj dꞌa ebꞌ malaj yicoꞌ.
29 Man̈ eyal juntzan̈ chucal lolonel.
An̈ej juntzan̈ lolonel vachꞌ tzeyalaꞌ,
yic sbꞌo spensar ebꞌ tzꞌabꞌan tas tzeyal chiꞌ,
axo svachꞌ tecꞌcꞌaj ebꞌ chiꞌ eyuuj.
30 Man̈ eyacꞌ cus Yespíritu Dios cajanoch dꞌayex junjun ex.
Yujto icha tzꞌaj yacꞌjioch junoc sello dꞌa junoc tasi,
icha chiꞌ ix aj yacꞌjioch dꞌayon̈ junjun on̈.
Yuuj scheclajeli to yic on̈xo Dios,
masanto ol ja jun cꞌual ayic ol co vachꞌ chaan co colnabꞌil.
31 Actejeccan masanil e chichoncꞌolal yedꞌ e cꞌacꞌalcꞌolal.
Man̈ comonoc schacbꞌi e sat scot eyoval.
An̈ejtonaꞌ,
man̈ comonoc sqꞌue e jaj e tumvaji.
Actejeccan e cꞌulan masanil tas chuc.
32 Vachꞌ tzeyutej e pensar dꞌayex junjun ex.
Slaj ocꞌ e cꞌool dꞌayex junjun ex.
An̈ejtonaꞌ,
tzeyacꞌlaj nivancꞌolal e bꞌa,
icha ix aj on̈ yacꞌan nivancꞌolal Dios yuj Cristo.