Yalnac yabꞌix ebꞌ man̈ israeloc vin̈aj Pablo
3
Yuj val juntzan̈ ix val tic,
tzin lesalvi eyuuj.
A in Pablo in tic,
preso vaji,
yujto svacꞌ servil Cristo Jesús dꞌa e cal a ex man̈ ex israeloc.
2 Ina eyojtacxo to a Dios acꞌannac och jun vachꞌ abꞌix yic colnabꞌil dꞌa yol in cꞌabꞌ yujn̈ej svachꞌcꞌolal,
yic svalel dꞌa e cal.
3 A jun man̈ ojtacabꞌiloctaxon dꞌa yalan̈,
a Dios ix chꞌoxan dꞌayin.
Ix yacꞌan vojtaquejeli.
A jun tic,
toxo ix val jabꞌ dꞌayex dꞌa jun in carta tic.
4 Ayic ol eyilan jun van in tzꞌibꞌanbꞌat tic,
ol nachajel eyuuj to vojtacxo juntzan̈ cꞌaybꞌubꞌal yic Cristo,
yujto a Dios ix chꞌoxan dꞌayin.
5 A dꞌa yalan̈taxo,
maj acꞌji ojtacajel juntzan̈ tic,
icha ajnac yacꞌji cojtaquejel a on̈ sicꞌbꞌil on̈ el schecabꞌoc tic yedꞌ juntzan̈xo ebꞌ tzꞌalanel slolonel Dios yuj Yespíritu.
6 Ix acꞌji cojtaquejeli to a ex man̈ ex israeloc,
ay eyalan eyic quedꞌ a on̈ israel on̈ tic dꞌa svachꞌil Dios syacꞌ dꞌayon̈.
Junxon̈ej animail eyaj quedꞌoc dꞌa yichan̈ Dios.
A jun stiꞌ Dios acꞌbꞌilcan dꞌayon̈,
junn̈ej tzꞌaj e chaan quedꞌoc yuj Cristo Jesús.
7 Yuj svachꞌcꞌolal Dios yacꞌnac vopisio,
yic svalel jun vachꞌ abꞌix tic dꞌa e cal.
Icha chiꞌ yutejnac in yedꞌ spoder.
8 Jantacn̈ej ebꞌ yicxo Dios vedꞌoc,
yelxo val ecꞌal yelcꞌoch ebꞌ dꞌa vichan̈.
Palta yuj svachꞌcꞌolal Dios yacꞌnac vopisio tic.
Yuj chiꞌ,
ecꞌnac in valel dꞌa e cal a ex man̈ ex israeloc to te nivan svachꞌil Cristo.
9 Ix yacꞌ pax vopisio yicꞌ svacꞌ yojtaquejel ebꞌ schon̈abꞌ smasanil tas spensar.
A jun spensar chiꞌ,
atax yic manto sbꞌo masanil tastac snaannaccani.
Cꞌubꞌabꞌil taxon el yuj Dios chiꞌ dꞌa yichbꞌanil,
axo ticnaic ix yacꞌ vopisio valaneli.
10 A spensar Dios chiꞌ to a jantacn̈ej ebꞌ ayoch yajalil dꞌa satchaan̈ yedꞌ ebꞌ ay yopisio taꞌ,
ayic syilan ebꞌ chajtil caj a on̈ yiglesia on̈xo tic,
svachꞌ nachajel yuj ebꞌ to man̈ jantacoc sjelanil Dios chiꞌ.
11 Yujn̈ej Cajal Jesucristo ol elcꞌoch jun snanaccan chiꞌ ayic manto sbꞌo yolyibꞌan̈qꞌuinal tic.
12 Yuj Cajal Jesucristo chiꞌ ayxo calan quic calan co bꞌa dꞌa Dios.
Maxtzac on̈ xiv co lesalvi dꞌay,
yujto aꞌ ayxo och yipoc co cꞌool.
13 Yuj chiꞌ tzin tevibꞌat dꞌayex,
yic max eyacꞌ somchaj e pensar yuj jun yaelal ix ja dꞌa vibꞌan̈ yuj e vachꞌiloc.
A juntzan̈ yaelal chiꞌ,
aꞌ schꞌoxani to te nivan eyelcꞌoch dꞌa yichan̈ Dios.
Xajan on̈ yuj Cristo
14 Yuj chiꞌ tzin em cuman dꞌa yichan̈ co Mam Dios.
15 Aꞌ chꞌoxnabꞌil yaji,
tas yopisio junjun macan̈ ebꞌ mamabꞌil dꞌa yolyibꞌan̈qꞌuinal tic yedꞌ dꞌa satchaan̈.
16 Man̈ jantacoc svachꞌil co Mam Dios chiꞌ.
Yuj chiꞌ tzin cꞌan dꞌay yic svachꞌ aqꞌuejoch stecꞌanil e pensar,
yic svachꞌ aqꞌuej pax spoder dꞌayex yuj Yespíritu.
17 Tzin cꞌananpax dꞌay to svachꞌ aqꞌuejoch cajan Cristo dꞌayex,
yujto ix e yacꞌoch e cꞌol dꞌay.
Icha chiꞌ ol aj e tecꞌbꞌan e bꞌa,
tato tze xajanej Dios yedꞌ ebꞌ quetanimail.
Icha junoc te teꞌ tzijtum schꞌan̈al yibꞌ,
icha chiꞌ ol ex ajoc.
18 Axo svachꞌ nachajel eyuuj yedꞌ ebꞌ yicxo Dios smasanil to te xajan on̈ val yuj Cristo chiꞌ.
19 Vachꞌchom malaj bꞌaqꞌuin̈ ol nachajel cuuj jantac val tzon̈ sxajanej,
palta in gana tzeyojtaquej val eli.
An̈ejtonaꞌ in gana to svachꞌ tzꞌacvioch cajan Dios dꞌayex.