Yuj svachꞌcꞌolal Dios tzon̈ colchaji
2
A dꞌa yalan̈taxo,
chamnac ex dꞌa yichan̈ Dios yuj e mul yedꞌ yuj e chucal.
2 Yujto an̈ej jun sgana yolyibꞌan̈qꞌuinal tic tze cꞌanabꞌajej,
aton sgana vin̈ ay yopisio yacꞌan mandar dꞌa scal icꞌ,
aton vin̈ Satanás,
vin̈ tzꞌacꞌan scꞌuloc ebꞌ max cꞌanabꞌajan Dios.
3 A dꞌa yalan̈taxo,
icha chiꞌ cutejnac co bꞌa co masanil.
Co cꞌulejnac icha co gana.
An̈ej dꞌa juntzan̈ chucal snibꞌej co nivanil tic bꞌaj cacꞌnacoch co pensar.
Yujto an̈ej co pensar chiꞌ acꞌjinac on̈ mandar.
Yuj chiꞌ,
smoj val tzꞌacꞌjioch jun nivan yaelal dꞌa quibꞌan̈,
icha ol aj yacꞌjioch dꞌa yibꞌan̈ juntzan̈xo anima.
4 Palta tzꞌocꞌ val scꞌool Dios dꞌayon̈.
Te xajan on̈ yuuj.
5 Yuj chiꞌ,
vachꞌchom chamnac on̈ el dꞌa yichan̈ yuj co chucal,
palta ix yacꞌ co qꞌuinal yedꞌ Cristo.
Yuj val svachꞌcꞌolal Dios chiꞌ tzon̈ colchaji.
6 Aꞌ ix on̈ acꞌanxi pitzvoc yedꞌ Cristo Jesús.
Axo dꞌa yichan̈,
cꞌojan on̈xo em yedꞌ Cristo chiꞌ dꞌa satchaan̈.
7 Ato ol javoc scꞌual,
a co Mam Dios ol acꞌan ojtacajeloc to man̈xo bꞌischajbꞌenoc jantac svachꞌcꞌolal.
Ol checlajel jun chiꞌ yuj snivan vachꞌcꞌolal ix yacꞌ dꞌayon̈ yuj Cristo Jesús.
8 Yuj val svachꞌcꞌolal Dios colbꞌil on̈xo,
yujto ix cacꞌoch Cristo dꞌa co cꞌool.
A jun bꞌaj ix cacꞌoch dꞌa co cꞌool chiꞌ,
man̈oc dꞌayon̈ ix paqꞌui,
palta a Dios ix acꞌan dꞌayon̈.
9 Man̈ yujoc junoc tas vachꞌ sco cꞌulej tzon̈ colchaji,
yic malaj junoc on̈ syal quicꞌanchaan̈ co bꞌa.
10 A Dios ix on̈ bꞌoanxi yuj Cristo Jesús,
yic sco bꞌo juntzan̈ tas vachꞌ nabꞌilcan yuuj dꞌa yalan̈taxo to sco bꞌeybꞌalej.
Junn̈ej caj yuj Cristo
11 Yuj chiꞌ a ex man̈ ex israeloc,
naeccoti tas eyaj dꞌa yalan̈taxo.
A ebꞌ vetisraelal,
yalnac ebꞌ dꞌa e patic to man̈ ex yicoc Dios,
yujto man̈ ex acꞌbꞌiloc circuncidar.
Yujto a ebꞌ chiꞌ,
syacꞌoch jun yechel circuncisión ebꞌ dꞌa snivanil.
12 A dꞌa yalan̈tax chiꞌ,
manto ayoc och Cristo eyedꞌoc.
Malaj eyalan eyic quedꞌ a on̈ israel on̈ tic.
Malaj pax eyalan eyic dꞌa jun strato Dios yacꞌnac quedꞌoc ayic yacꞌannac stiꞌ.
Ayex ton ecꞌ dꞌa yolyibꞌan̈qꞌuinal tic,
palta malaj junoc tas vachꞌ eyacꞌnac och yipoc e cꞌool,
yujto manto ayoc och Dios eyedꞌoc.
13 Axo ticnaic,
junxon̈ej eyaj yedꞌ Cristo Jesús.
Vachꞌchom a dꞌa yalan̈taxo,
ichato najat eyajcanel dꞌa Dios,
palta a ticnaic lacꞌanxo ayex ecꞌ dꞌa stzꞌey,
yujto elnaccan schiqꞌuil Cristo cuuj.
14 An̈ejaꞌ a tzꞌacꞌan juncꞌolal dꞌa co cal.
A ex tic,
a dꞌa yalan̈taxo eyajcꞌool e bꞌa quedꞌ a on̈ israel on̈ tic.
Palta a ix acꞌan lajvoc jun oval chiꞌ.
Yuj chiꞌ a dꞌa yichan̈ Dios,
junxon̈ej chon̈abꞌil eyaj quedꞌ ticnaic.
15 Yujto ayic ix cham Cristo chiꞌ,
ix yiqꞌuel yopisio jun ley,
aton juntzan̈ checnabꞌil tzꞌibꞌabꞌilcani.
An̈ejtonaꞌ,
junxon̈ej ix ex yutejcan quedꞌoc,
junxon̈ej chon̈abꞌil caj dꞌa yichan̈ Dios ticnaic,
yujto junn̈ej caj yedꞌ Cristo chiꞌ.
Icha chiꞌ ix yutej yacꞌanoch juncꞌolal dꞌa co cal.
16 Ayic ix cham Cristo dꞌa teꞌ culus,
ix yacꞌ lajvoc jun oval dꞌa e cal quedꞌoc.
Yuj chiꞌ junxon̈ej caj co masanil ticnaic.
An̈ejtonaꞌ,
yuj schamel chiꞌ,
ix och juncꞌolal dꞌa co cal yedꞌ Dios.
17 A Cristo ul alannaquel vachꞌ abꞌix yic juncꞌolal dꞌayon̈ co masanil.
Aꞌ ulnaquecꞌ yal dꞌayex a ex najat eyajcanel dꞌa Dios yedꞌ pax dꞌayon̈ a on̈ lacꞌanxo cajecꞌ dꞌay.
18 Yuj chiꞌ vachꞌchom israel on̈,
mato maay,
yuj Cristo ayxo calan quic calan co bꞌa dꞌa co Mam Dios ticnaic,
yujto junn̈ej Yespíritu ix yacꞌoch dꞌayon̈.
19 A dꞌa yalan̈taxo,
icha juntzan̈ ebꞌ chꞌoc chon̈abꞌil eyaj dꞌa yichan̈ Dios,
yujto man̈ ex schon̈abꞌoc.
Axo ticnaic,
man̈xo ichoc taꞌ eyaj dꞌay.
Yujto schon̈abꞌ exxo yedꞌ masanil on̈ yicon̈xo ticnaic.
Yuninal exxo pax quedꞌoc.
20 Icha junoc pat ix bꞌoi,
icha chiꞌ eyaji.
A on̈ schecabꞌ on̈ Jesús tic yedꞌ juntzan̈xo ebꞌ schecabꞌ Dios,
ichato a on̈ cacꞌnac em cimientoal yich.
A exxo,
ichato a ex latzꞌbꞌabꞌil ex qꞌue dꞌa yibꞌan̈.
Axo Jesucristo,
icha junoc qꞌuen qꞌueen tzꞌemcan yipumaloc yich junoc pat,
icha chiꞌ yaj dꞌayon̈.
21 Icha qꞌuen qꞌueen van slatzꞌjiqꞌue dꞌa yibꞌan̈ jun qꞌuen yich pat chiꞌ,
te vachꞌ tzꞌaj slatzꞌjiqꞌuei,
icha chiꞌ caj dꞌa Cristo co masanil,
yic tzon̈ och stemplooc Dios Cajal,
yicn̈ej yaji.
22 A dꞌa yalan̈ man̈ ex ichoc taꞌ.
Axo ticnaic,
junxon̈ej eyaj yedꞌ Cristo.
Van eyoch stemplooc co Mam Dios quedꞌoc,
yic tzon̈ och scajnubꞌoc Yespíritu Dios.