3 Calec vachꞌ lolonel dꞌa co Mam Dios,

aton Smam Cajal Jesucristo,

yujto ix yacꞌ masanil juntzan̈ vachꞌil yic Espíritu dꞌayon̈,

aton juntzan̈ yic satchaan̈,

yujto junxon̈ej caj yedꞌ Cristo.

4 A Dios sicꞌjinac on̈xo el yuj Cristo,

ayic manto bꞌo yolyibꞌan̈qꞌuinal tic,

yic vachꞌ an̈ej ayon̈ yicoꞌ,

man̈xa jabꞌoc co paltail dꞌa yichan̈.

5 Te xajan on̈ yuuj,

yuj chiꞌ atax dꞌa yichbꞌanil snanaccani to ol on̈ och yuninaloc yuj Jesucristo.

Icha chiꞌ ix el dꞌa scꞌool,

6 yic tzꞌalji vachꞌ lolonel dꞌay,

yujto te nivan yelcꞌoch svachꞌcꞌolal.

Ix schꞌox val svachꞌcꞌolal dꞌayon̈,

yujto junxon̈ej caj yedꞌ Yuninal,

aton jun te xajan yuuj.

7 Yuj snivan vachꞌcꞌolal,

ix on̈ scolel yuj schamel Yuninal chiꞌ.

Icha chiꞌ ix aj yacꞌancan lajvoc co mul.

8 Yuj svachꞌcꞌolal ix yacꞌ sjelanil dꞌayon̈.

Ix yacꞌan nachajel cuuj.

9 Ay val jun tas snanaccan Dios to ol sbꞌo icha dꞌa sgana.

A dꞌa pecaꞌ,

malaj mach ojtannac jun tic.

Palta a ticnaic aꞌ tzꞌacꞌan cojtaquejel tas sgana sbꞌo chiꞌ.

10 Ayic ol cꞌoch stiempoal,

ol elcꞌoch tas sgana chiꞌ.

Yujto ataꞌ ol svachꞌ aqꞌuejoch masanil mach yedꞌ masanil tas dꞌa yalan̈ smandar Cristo.

Vachꞌchom juntzan̈ ay dꞌa satchaan̈ yedꞌ pax juntzan̈ ay dꞌa yolyibꞌan̈qꞌuinal tic,

junxon̈ej ol yutoc yacꞌanoch smasanil dꞌa yalan̈ smandar chiꞌ.

11 Atax dꞌa pecaꞌ,

sicꞌbꞌil on̈xo el yuj Dios,

yic ol co cha quic ol yacꞌ dꞌayon̈ junjun on̈,

yujto junxon̈ej caj yedꞌ Cristo.

Ol elcꞌoch jun sgana Dios chiꞌ,

yujto scꞌulej masanil tas icha sgana,

12 yic vachꞌ cuuj tzꞌalji vachꞌ lolonel dꞌa Dios yuj snivanil yelcꞌochi,

yujto icha chiꞌ ix el dꞌa scꞌool dꞌayon̈ a on̈ co bꞌabꞌlaj aqꞌuejnac och Cristo yipoc co cꞌool.

13 A exxo pax tic,

ayic eyabꞌannac jun abꞌix te yel,

aton yabꞌixal co colnabꞌil,

eyacꞌnac och Cristo dꞌa e cꞌool quedꞌoc.

Yuj chiꞌ junxon̈ej ex aj yedꞌoc.

Icha aj yacꞌannaccan stiꞌ Dios chiꞌ,

icha chiꞌ ix aj yacꞌanoch Yespíritu dꞌayex,

icha tzꞌaj yacꞌjioch junoc sello dꞌa junoc tasi.

14 Yuj Yespíritu chiꞌ cojtac to dꞌa val yel ol co cha jun quic ol yacꞌ Dios dꞌayon̈.

Ato yic ol on̈ svachꞌ colanel a on̈ yic on̈xo tic,

ato taꞌ ol svachꞌ aqꞌuej co colnabꞌil,

yic ol aljoc vachꞌ lolonel dꞌay yuj snivanil yelcꞌochi.

15 Svabꞌi to tzeyacꞌ val och Cajal Jesús dꞌa e cꞌool.

Tzabꞌ e xajanan pax ebꞌ yicxo Dios quedꞌoc.

16 Yuj chiꞌ,

svacꞌ yuj diosal dꞌa Dios eyuuj ayic tzin lesalvi dꞌa juntac el.

17 Tzin cꞌan dꞌa sDiosal Cajal Jesucristo,

aton co Mam te nivan yelcꞌochi,

yic ol yacꞌ sjelanil dꞌayex yuj Yespíritu,

yic ol vachꞌ nachajel eyuuj tas acꞌbꞌil cojtaquejeli,

yic ol e vachꞌ ojtaquejel co Mam Dios.

18 Tzin cꞌan dꞌa Dios chiꞌ,

yic sjac e pensar,

yic snachajpaxel eyuuj tas ayoch yipoc co cꞌool,

yujto avtabꞌil on̈ yuuj.

Axo snachajel eyuuj to man̈ jantacoc svachꞌil jun quic ol yacꞌ dꞌayon̈,

yujto yic on̈xo.

19 Tzin cꞌananpax dꞌay to tzeyojtaquejeli to te nivan spoder,

masanil tas syal yuuj.

Aton jun spoder chiꞌ van smunlajoch dꞌayon̈ a on̈ scacꞌoch Jesucristo dꞌa co cꞌool.

Schꞌoxnaqueli to te nivan spoder chiꞌ,

20 ayic yacꞌannacxi pitzvoc Cristo dꞌa scal ebꞌ chamnac,

yacꞌannacxi em cꞌojan dꞌa svachꞌ cꞌabꞌ dꞌa satchaan̈.

21 Ataꞌ,

a Cristo tzꞌacꞌan yajalil dꞌa yibꞌan̈ ebꞌ yajal smasanil,

aton ebꞌ man̈ chequeloc,

ma ebꞌ ay spoder dꞌa satchaan̈.

Yelxo val nivan yelcꞌoch dꞌa yichan̈ masanil ebꞌ sbꞌinaj yuj yopisio chiꞌ,

aton ebꞌ ay yopisio yacꞌan mandar dꞌa jun tiempoal tic,

ma dꞌa jun tiempoal toto ol javoc.

22 A spoder Dios chiꞌ acꞌannac och masanil tastac dꞌa yalan̈ smandar Cristo.

Yacꞌannac pax och yajaliloc yiglesia,

ichato sjolom yaji.

23 Icha tzꞌaj stzꞌactzitaj co jolom yuj co nivanil,

icha chiꞌ tzꞌaj stzꞌactzitaj Cristo yuj yiglesia,

palta a Cristo chiꞌ stzꞌactzitan masanil tastac.