Co col-lajec co bꞌa
6
Ex vucꞌtac ex vanabꞌ,
tato ay junoc mach scꞌulan chucal tzeyilaꞌ,
a exxo tze cꞌanabꞌajej Yespíritu Dios tic,
colvajan̈ec dꞌay,
aqꞌuec snaꞌ dꞌa acꞌancꞌolal,
yic ol bꞌoxoc spensar.
Tzeyilanpax e bꞌa junjun ex,
talaj ayex pax ol e cꞌulej chucal.
2 Tze col-laj e bꞌa junjun ex,
yic ol laj techaj eyuuj e masanil.
Tato icha chiꞌ,
van e cꞌanabꞌajan sley Cristo.
3 Tato ay mach nivan yelcꞌoch snaani,
malaj pax yelcꞌochi,
munil a syixtej sbꞌa snaan jun chiꞌ.
4 Yovalil sco na val junjun on̈ tas sco cꞌulej.
Tato icha chiꞌ,
ol ja co tzalajcꞌolal yuj tas sco cꞌulej chiꞌ,
man̈ yovaliloc sco lajbꞌej tas sco scꞌulej yedꞌ junocxo mach,
tato más vachꞌ quic dꞌa yichan̈.
5 Yujto yovalil munil ol cacꞌ entregar co cuenta junjun on̈ dꞌa Dios,
ato syalaꞌ tas acꞌbꞌil co cꞌulej junjun on̈ yuuj.
6 A ebꞌ tzon̈ cꞌaybꞌan dꞌa slolonel Dios,
yovalil tzon̈ colvaj cacꞌan juntzan̈ tastac vachꞌ dꞌa ebꞌ.
7 Man̈ eyacꞌ musansatil e bꞌa.
Malaj junoc mach syal yacꞌan musansatil Dios.
Yujto a icha tas scavej,
a ol co jachꞌaꞌ.
8 Icha pax chiꞌ,
tato a chuc pensaril sco cꞌanabꞌajej,
ol co cha spac,
aton chamel.
Palta tato a sgana Yespíritu Dios sco cꞌanabꞌajej,
ol co cha spac dꞌa Yespíritu chiꞌ,
aton co qꞌuinal dꞌa juneln̈ej.
9 Yuj chiꞌ vachꞌn̈ej scutej co bꞌeybꞌal dꞌa masanil tiempo,
max yal tzon̈ tzactzaji.
Tato max cactejcan co cꞌulan vachꞌil,
ayic ol ja stiempoal,
ol co cha spac.
10 Yacbꞌan syal co colvaj dꞌa ebꞌ quetanimail,
yovalil vachꞌ scutej co pensar dꞌa ebꞌ.
Axo dꞌa ebꞌ yicxo Dios,
ecꞌalxo val vachꞌ scutej co colvaj dꞌa ebꞌ.
Man̈xa yelcꞌoch jun circuncisión
11 Ilecnabꞌ val juntzan̈ nivac letra a in val lacꞌan tzin tzꞌibꞌejbꞌati.
12 A ebꞌ sgana tzex acꞌan pural eyacꞌan circuncidar e bꞌa,
a sgana ebꞌ to vachꞌ scan ebꞌ dꞌa yichan̈ ebꞌ anima.
Malaj sgana ebꞌ tzꞌacꞌjioch syaelal icha tzꞌaj yacꞌjioch co yaelal a on̈ ayn̈ejoch co pensar dꞌa schamel Cristo dꞌa teꞌ culus.
Yuj chiꞌ tzex yacꞌ val pural ebꞌ.
13 Vachꞌchom acꞌbꞌil circuncidar ebꞌ,
palta max scꞌanabꞌajejlaj ley Moisés chiꞌ ebꞌ smasanil.
A ebꞌ chiꞌ,
sgana ebꞌ tzex yacꞌ circuncidar,
yic vachꞌ syicꞌchaan̈ sbꞌa ebꞌ eyuuj,
yic syal yalan ebꞌ to yuj ebꞌ ix acꞌjioch jun yechel chiꞌ dꞌa e nivanil.
14 Palta a inxo tic,
malaj junoc tas bꞌaj syal vicꞌanchaan̈ in bꞌa.
An̈ej schamel Cajal Jesucristo dꞌa teꞌ culus bꞌaj tzin tzalaji.
Yuj jun chiꞌ man̈xalaj yalan yic yolyibꞌan̈qꞌuinal tic dꞌayin.
Ichato chamnacxoel jun chiꞌ dꞌa vichan̈.
A inxo tic,
ichato chamnac inxo el dꞌay,
yujto man̈xalaj valan vic dꞌay.
15 Taxon̈ej acꞌbꞌil on̈ circuncidar mato maay,
malaj yalani.
An̈ej val jun tic nivan yelcꞌochi,
tato qꞌuexmajnacxo co pensar.
16 A jantac ebꞌ scꞌanabꞌajan juntzan̈ checnabꞌil tic,
aton ebꞌ israel dꞌa val yel,
ebꞌ schon̈abꞌ ton val Dios yaji.
Yacꞌocabꞌ sjuncꞌolal Dios dꞌa ebꞌ,
ocꞌocabꞌ pax scꞌool dꞌa ebꞌ.
17 A ticnaic,
malajocabꞌ mach tzin acꞌanxi cusoc.
Yujto a juntzan̈ jechꞌ ayoch dꞌa jun in nivanil tic,
a schꞌoxaneli to schecabꞌ in Cajal Jesús.
18 Ex vucꞌtac ex vanabꞌ,
yacꞌocabꞌ svachꞌcꞌolal Cajal Jesucristo dꞌayex e masanil taꞌ.
Amén.