Munil quicxo co bꞌa yedꞌ Cristo
5
A Cristo on̈ colanelta dꞌa yalan̈ jun ley Moisés chiꞌ,
yic vachꞌ quicxon̈ej co bꞌa yedꞌoc.
Yuj chiꞌ tecꞌan tzeyutej e bꞌa,
man̈xo eyacꞌoch e bꞌa dꞌa yalan̈ smandar jun ley chiꞌ,
yujto lajan yedꞌ junoc icatz te al.
2 Abꞌec tas sval a in Pablo in tic:
Tato tze chaoch jun yechel yic circuncisión dꞌa e nivanil,
juneln̈ej malaj jabꞌoc tas ol e cha dꞌa Cristo.
3 Svalanbꞌat junxo tic dꞌayex:
A mach tzꞌacꞌanoch jun circuncisión chiꞌ yipoc scꞌool,
yovalil scꞌanabꞌajej masanil tas syal dꞌa ley Moisés chiꞌ.
4 A ex mach ex tze naꞌa to vachꞌ ex dꞌa yichan̈ Dios yujto tze cꞌanabꞌajej jun ley chiꞌ,
a dꞌa Cristo,
malaj eyalan eyicoꞌ.
Man̈xalaj svachꞌcꞌolal Dios ol e chaꞌa.
5 A on̈xo,
yuj Yespíritu Dios scacꞌoch yipoc co cꞌool to a Dios ol alanoc to vachꞌ on̈ dꞌa yichan̈.
Aton jun tic van co tan̈vani,
yujto scacꞌoch Cristo dꞌa co cꞌool.
6 Tato junxon̈ej tzon̈ aj yedꞌ Cristo Jesús,
man̈xalaj yelcꞌochi tato acꞌbꞌil on̈ circuncidar,
mato maay.
An̈ej jun tic ay yelcꞌochi,
tato scacꞌoch Cristo dꞌa co cꞌool,
sco xajanej co bꞌa junjun on̈.
7 A dꞌa yalan̈taxo,
vachꞌ ix eyutej e bꞌeybꞌal.
¿Mach ix acꞌan e cꞌool yic maxtzac e cꞌanabꞌajej jun cꞌaybꞌubꞌal te yel?
8 A Dios ix ex avtanoch yicoc,
man̈oclaj Dios chiꞌ ix acꞌan e cꞌool.
9 Tze na nabꞌi to yujn̈ej jabꞌoc yich pan,
spajbꞌibꞌat ixim harina smasanil.
10 Svacꞌoch Cajalil yipoc in cꞌool to man̈ ol e vachꞌ aqꞌuejoch e pensar dꞌa junocxo chꞌoc cꞌaybꞌubꞌal.
Yaln̈ej mach ebꞌ tzꞌacꞌan e cꞌool chiꞌ,
a Dios ol acꞌanoch syaelal ebꞌ.
11 Ex vucꞌtac ex vanabꞌ,
qꞌuinaloc an̈ejaꞌ valani to yovalil tzꞌacꞌji circuncidar junjun anima,
max am in yacꞌoch ebꞌ vetisraelal dꞌa syaelal.
Qꞌuinaloc icha chiꞌ svutej valani,
max am chichon scꞌool ebꞌ dꞌa yabꞌixal schamel Cristo dꞌa teꞌ culus.
12 Axo ebꞌ tzecꞌ acꞌan e cꞌool chiꞌ yic tzex acꞌji circuncidar,
tzoc val poljiel yic ebꞌ chiꞌ smasanil.
13 Ex vucꞌtac ex vanabꞌ,
avtabꞌil ex yuj Dios,
yic vachꞌ maxtzac ex can dꞌa yalan̈ smandar ley chiꞌ.
Palta man̈ yujoc chiꞌ syal eyacꞌlabꞌan e chuc pensaril.
Más vachꞌ tzeyacꞌlaj servil e bꞌa,
yujto tze xajanej e bꞌa.
14 Syicꞌ sbꞌa ley Moisés masanil yuj jun checnabꞌil tic:
Ichaocabꞌ eyaꞌilan e bꞌa,
ichaocabꞌ chiꞌ e xajanan ebꞌ ay dꞌa spatic schiquin e pat,
xchi.
15 Palta tato an̈ejaꞌ schichon e cꞌool dꞌayex junjun ex,
ay smay ol eyacꞌ lajvoquel e bꞌa junjun ex.
A Yespíritu Dios yedꞌ co chuc pensaril
16 Svalanbꞌat junxo tic dꞌayex:
Bꞌeybꞌalejec icha schꞌox Yespíritu Dios.
Tato icha chiꞌ,
man̈ ol e bꞌeybꞌalej tas sgana e chuc pensaril.
17 Yujto a jun co chuc pensaril tic,
yajcꞌol sbꞌa yedꞌ Yespíritu Dios.
Axo Yespíritu chiꞌ,
yajcꞌol sbꞌa yedꞌ co chuc pensaril.
Yuj chiꞌ ijan val max yal vachꞌ tzeyutej e bꞌeybꞌal icha e gana.
18 Palta tato van co cꞌanabꞌajan icha schꞌox Yespíritu Dios chiꞌ,
a ley man̈xalaj yalan yic dꞌayon̈.
19 A ebꞌ scꞌanabꞌajan schuc pensaril chiꞌ,
chequel yaj tas scꞌulej ebꞌ.
Tzꞌem ebꞌ dꞌa ajmulal,
scꞌulan juntzan̈ tas qꞌuixvubꞌtac ebꞌ yedꞌ snivanil.
20 Syalan sbꞌa ebꞌ dꞌa juntzan̈ comon dios.
Sbꞌalan yetanimail ebꞌ.
Jelan ebꞌ dꞌa juntzan̈xo tastac snaꞌa.
Ajcꞌoltac syutej sbꞌa ebꞌ,
acꞌum oval ebꞌ.
Schichon scꞌol ebꞌ dꞌa tas ay dꞌa junocxo anima.
Cꞌun scot yoval ebꞌ.
Sgana ebꞌ an̈ej ebꞌ ay yelcꞌochi.
Sgana ebꞌ spojel sbꞌa dꞌa macquiltaquil.
21 Syiloch scꞌool ebꞌ dꞌa tas ay dꞌa junocxo anima.
Smacꞌvi cham anima ebꞌ.
Ucꞌuman̈ ebꞌ.
Bꞌucꞌtzin anima ebꞌ.
Ay juntzan̈xo tas lajan icha sval tic scꞌulej ebꞌ.
Svalbꞌat dꞌayex ticnaic,
icha val vutejnac valan dꞌayex dꞌa yalan̈taxo to a ebꞌ scꞌulan juntzan̈ sval tic,
val yel malaj yalan yic ebꞌ yoch dꞌa yol scꞌabꞌ Dios.
22 Palta axo Yespíritu Dios tzꞌacꞌan co xajanej co bꞌa,
syacꞌanpax co tzalajcꞌolal,
co juncꞌolal.
Syacꞌan cacꞌ techaj tas sja dꞌa quibꞌan̈.
Yuj Yespíritu chiꞌ,
vachꞌ scutej co bꞌa dꞌa ebꞌ quetanimail,
vachꞌ scutej co pensar dꞌa ebꞌ,
scacꞌan elcꞌoch tas scalaꞌ.
23 Nanam scutej co bꞌa.
Yuj Yespíritu Dios chiꞌ,
sco cachoch vaan co bꞌa.
A juntzan̈ vachꞌ bꞌeybꞌal tic,
malaj junoc ley scachani.
24 A on̈ yic on̈xo Cristo tic,
man̈xalaj yelcꞌoch co chuc pensaril yedꞌ juntzan̈ schucal snibꞌej.
Ichato acꞌbꞌilxooch cuuj dꞌa teꞌ culus.
25 Yuj Yespíritu Dios chiꞌ ay co qꞌuinal.
Yuj chiꞌ,
yovalil sco cꞌanabꞌajej icha sgana Yespíritu chiꞌ.
26 Max yal-laj quicꞌanchaan̈ co bꞌa,
max yal co tzuntzan co bꞌa junjun on̈.
Max yal-laj schichonoch co cꞌool dꞌayon̈ junjun on̈.