4
In gana svalbꞌat junxo tic dꞌayex:
Qꞌuinaloc ay junoc uninabꞌil tzꞌicancan masanil tastac ay dꞌa smam.
Vachꞌchom syiquejcan smasanil,
palta ayic yuneto,
lajan tzꞌajcan icha junoc majan.
2 Ayto mach tzꞌacꞌan mandar,
syilan tastac ay dꞌay,
masanto sja scꞌual ayic syalan smam to ay yalan yic dꞌa smasanil.
3 An̈ejtonaꞌ ichon̈taꞌ.
A dꞌa yalan̈taxo,
ichato unin on̈,
yujto on̈ acꞌji mandar yuj bꞌeybꞌal yic yolyibꞌan̈qꞌuinal tic.
4 Palta ayic ix cꞌoch stiempoal,
a Dios ix acꞌancot Yuninal,
ix alji dꞌa jun ix ix icha tzꞌaj calji co masanil.
Ix acꞌji mandar yuj ley Moisés.
5 Icha chiꞌ ix aj yuleqꞌui,
yic tzon̈ scolcanel dꞌa yalan̈ jun ley chiꞌ,
yic tzon̈ yicꞌoch Dios yuninaloc.
6 A Dios ix acꞌancot Yespíritu Yuninal chiꞌ dꞌayon̈,
yic scojtaquejeli to yuninal on̈xo.
Yuj Yespíritu ayoch dꞌayon̈ chiꞌ,
scal dꞌa Dios icha tic:
Mamin,
xco chi.
7 Yuj chiꞌ man̈xo ichoc junoc checabꞌ caji,
yujto yuninal on̈xo Dios yuj Cristo.
Yuj chiꞌ quicxo masanil tastac ol yacꞌ Dios dꞌayon̈.
Cusnac vin̈aj Pablo yuj ebꞌ creyente
8 A dꞌa yalan̈taxo,
manto eyojtacoc Dios.
Eyacꞌnac servil juntzan̈ comon dios,
palta man̈ diosoc.
9 Axo ticnaic,
eyojtacxo Dios,
más vachꞌ scal icha tic to ojtacabꞌil exxo yuj Dios chiꞌ.
Yuj chiꞌ,
¿tas yuj tzex meltzajxi dꞌa juntzan̈ bꞌeybꞌal malaj yelcꞌoch chiꞌ?
¿Tas yuj e gana eyacꞌanxioch e bꞌa dꞌa yalan̈ jun ley chiꞌ,
tzeyacꞌanxi servil?
10 Ina tzato e cꞌanabꞌajej juntzan̈ qꞌuin̈ yic junjun sábado,
juntzan̈ qꞌuin̈ ayic tzꞌalji qꞌuen uj yedꞌ juntzan̈ qꞌuin̈ yic smolchaj sat avbꞌen yedꞌ juntzan̈xo qꞌuin̈ tzꞌoch dꞌa yuctaquil abꞌil.
11 Yujto icha chiꞌ tzeyutej e bꞌa,
svacꞌ pensar,
talaj nabꞌan̈ej in munlajel dꞌa e cal taꞌ.
12 Ex vucꞌtac ex vanabꞌ,
tzin tevi dꞌayex to tzeyiqꞌuel e bꞌa dꞌa yalan̈ jun ley chiꞌ icha ajnac vicꞌanelta in bꞌa a in tic.
Yujto a in tic,
ecꞌnac in dꞌa yalan̈ jun ley chiꞌ icha tzeyutej e bꞌa chiꞌ ticnaic.
Ayic vecꞌnac dꞌayex taꞌ,
vachꞌn̈ej eyutejnac e bꞌa dꞌayin.
13 Eyojtac to ayic vecꞌnac dꞌayex dꞌa sbꞌabꞌelal,
yuj jun yabꞌil ochnac dꞌayin yuj chiꞌ cannac in valel jun vachꞌ abꞌix yic colnabꞌil dꞌayex.
14 Vachꞌchom eyabꞌnac syail vedꞌoc yuj jun in yabꞌil chiꞌ,
palta maj in e patiquejel-laj,
maj in e chaqueli.
Icha scutej co chaan junoc yángel Dios,
icha chiꞌ eyutejnac in e chaani,
ichato a Jesucristo e chanac.
15 Ayic vecꞌnac dꞌayex chiꞌ,
val yel te tzalajnac ex.
Qꞌuinaloc tato yalnac,
eyicꞌnac am elta yol e sat eyacꞌannac dꞌayin.
Palta,
¿bꞌaj ix cꞌoch jun e tzalajcꞌolal chiꞌ ticnaic?
16 ¿Tom scajcꞌolej co bꞌa eyedꞌoc yujn̈ej to svalbꞌat jun cꞌaybꞌubꞌal te yel tic dꞌayex?
17 Ay ebꞌ nivanoc tzex xajanani,
palta man̈ yujoc e vachꞌiloc.
A spensar ebꞌ to ton̈ej tzex smontejel ebꞌ yic tzeyacꞌanoch e pensar dꞌa ebꞌ.
18 Vachꞌ toni tato ay mach bꞌaj scacꞌoch co pensar,
palta tato dꞌa co vachꞌiloc.
Octom icha chiꞌ tzeyutej e pensar dꞌa masanil tiempo dꞌayin,
man̈ocn̈ej ayic ay in ecꞌ eyedꞌ taꞌ.
19 A exxo,
icha val to vuneꞌ ex,
svabꞌ val syail eyuuj,
icha junoc ix ix tzꞌabꞌan syail yalji yuneꞌ.
Ichan̈ej chiꞌ svabꞌ syail eyuuj,
masanto ol lajanbꞌoc e pensar yedꞌ Cristo.
20 Octom ayinecꞌ eyedꞌ taꞌ ticnaic,
yic man̈ ichoc tic svutej valan dꞌayex,
palta maxtzac nachaj vuuj tas vachꞌ valan dꞌayex.
A ix Agar yedꞌ ix Sara
21 A exxo,
e gana to a ley Moisés tzex acꞌan mandar.
Palta ¿tom max e nacoti tas syal jun ley chiꞌ?
22 Yujto syal yuj vin̈aj Abraham to ay chavan̈ yuninal vin̈.
Ay jun aljinac dꞌa ix Agar,
ix schecabꞌ ebꞌ.
Ay pax junxo aljinac dꞌa ix yetbꞌeyum vin̈aj Abraham chiꞌ,
aton vin̈aj Isaac.
A ix yetbꞌeyum vin̈aj Abraham chiꞌ,
munil yic sbꞌa ix,
malaj junocxo bꞌaj ochnac ix checabꞌoc.
23 A jun yuneꞌ ix schecabꞌ ebꞌ chiꞌ,
ton̈ej ix alji icha tzꞌaj yalji junjun anima.
Axo junxo aljinac dꞌa ix munil yic sbꞌa yedꞌ vin̈ yetbꞌeyum chiꞌ,
yuj spoder Dios aljinac,
yujto yacꞌnaccan stiꞌ Dios yuuj.
24 A yabꞌixal ebꞌ ix tic,
chꞌoxnabꞌil yaji.
A chavan̈ ebꞌ ix ix tic,
a chabꞌ strato Dios schꞌoxel ebꞌ ix.
A ix Agar chiꞌ,
schꞌoxcot jun strato sbꞌonac dꞌa jun tzalan Sinaí.
A ebꞌ yic jun trato chiꞌ,
ichato yuneꞌ ix yaj ebꞌ.
Checabꞌ yaj ebꞌ icha aj yecꞌnac ix.
25 A ix Agar chiꞌ,
a jun tzalan Sinaí ay dꞌa yol yic Arabia schꞌoxcot ix.
A chon̈abꞌ Jerusalén ayecꞌ ticnaic,
yicto tzalan Sinaí chiꞌ,
yujto a ebꞌ yic jun chon̈abꞌ chiꞌ,
ayoch ebꞌ dꞌa yalan̈ smandar jun ley chiꞌ.
26 Axo junxo Jerusalén ay dꞌa satchaan̈,
aton ay on̈ yicoꞌ.
Yuj chiꞌ,
quic co bꞌa,
maxtzac on̈ acꞌji mandar yuj jun ley chiꞌ.
27 A dꞌa Slolonel Dios Tzꞌibꞌabꞌilcani,
ataꞌ syalcan icha tic:
Vachꞌchom toxonton malaj uneꞌ,
palta tzach tzalaji.
Man̈ ojtacoc chajtil syail yalji unin,
palta elocabꞌ av yuj tzalajcꞌolal.
Yujto a jun ix scan schꞌocoj,
ecꞌalto sbꞌisul yuneꞌ ix ol aljoc dꞌa yichan̈ ix ay vin̈ yetbꞌeyum,
xchicani.
28 Ex vucꞌtac ex vanabꞌ,
lajan on̈ icha vin̈aj Isaac chiꞌ.
Yujn̈ej to yacꞌnaccan stiꞌ Dios,
yuj chiꞌ tzon̈ och yuninaloc.
29 Palta a dꞌa pecaꞌ chiꞌ,
a vin̈ ton̈ej aljinac icha tzꞌaj yalji junjun anima,
yacꞌnac och yaelal vin̈ dꞌa yibꞌan̈ jun aljinac yuj spoder Yespíritu Dios chiꞌ.
Icha yutejnac sbꞌa vin̈ chiꞌ,
icha chiꞌ tzon̈ utaj yuj ebꞌ anima tzꞌacꞌji mandar yuj ley chiꞌ ticnaic.
30 Palta a Slolonel Dios chiꞌ,
aꞌ tzꞌalani:
A ix checabꞌ yaj tic,
pechel ix yedꞌ yuneꞌ tic,
xchi ix Sara dꞌa vin̈aj Abraham chiꞌ.
Yujto a jun yuneꞌ ix chiꞌ,
malaj yalan yic schaan jabꞌoc tas yedꞌ jun yuneꞌ ix yic sbꞌa schꞌocoj yedꞌ vin̈ yetbꞌeyum chiꞌ,
xchicani.
31 Yuj chiꞌ ex vucꞌtac ex vanabꞌ,
man̈ on̈ lajanoc icha jun yuneꞌ ix checabꞌ yaj chiꞌ.
Palta lajan on̈ icha jun yuneꞌ ix munil yic sbꞌa yedꞌ vin̈ yetbꞌeyum chiꞌ.