Max yal cacꞌanoch ley yipoc co cꞌool
3
A ex aj Galacia ex tic,
te quistal tzeyutej e bꞌa.
Ichato ix acꞌji e cꞌool icha tzꞌutaj junoc anima yuj ebꞌ ajchum,
yic maxtzac e cꞌanabꞌajej jun cꞌaybꞌubꞌal te yel.
Ayic quecꞌnac taꞌ,
calnac val dꞌayex chajtil ajnac scham Jesucristo dꞌa teꞌ culus.
Icha val to eyilnac schami.
2 In gana to tze tacꞌvej jun ol in cꞌanbꞌej tic dꞌayex,
¿yuj am to ix e cꞌanabꞌajej ley Moisés,
yuj chiꞌ ix e cha Yespíritu Dios,
ma yujto ix eyacꞌoch jun abꞌix eyabꞌnac dꞌa e cꞌool?
3 ¿Tas yuj te quistal tzeyutej e bꞌa?
Yujto a dꞌa sbꞌabꞌelal,
an̈ej Yespíritu Dios eyacꞌnac och yipoc e cꞌool.
Axo ticnaic,
e gana tzeyacꞌ tzꞌacvoc e colnabꞌil yuj juntzan̈ tas munil tze cꞌulej.
4 Man̈ jantacoc ix eyabꞌ syail yujn̈ej Cristo,
palta ichato nabꞌan̈ej.
Octom val man̈ nabꞌan̈ejoc ix eyabꞌ syail.
5 A Dios yacꞌnac Yespíritu dꞌayex,
schꞌoxannac juntzan̈ tas satubꞌtac dꞌa e cal,
man̈ yujoc e cꞌanabꞌajan ley Moisés yacꞌnac Yespíritu chiꞌ dꞌayex,
palta yujto eyacꞌnacoch jun vachꞌ abꞌix albꞌilcan dꞌayex dꞌa e cꞌool,
aton jun albꞌilcan dꞌayex,
yuj chiꞌ acꞌbꞌil dꞌayex.
6 A vin̈aj Abraham,
yacꞌnac val och Dios vin̈ dꞌa scꞌool,
yuj chiꞌ ochnac vin̈ vachꞌil dꞌa yichan̈ Dios chiꞌ.
7 Yuj chiꞌ,
nachajocabꞌel eyuuj to a ebꞌ tzꞌacꞌanoch Dios dꞌa scꞌool,
aton ebꞌ chiꞌ dꞌa val yel yin̈tilalcan vin̈aj Abraham chiꞌ.
8 Ayocto yalannaccan Dios dꞌa Slolonel Tzꞌibꞌabꞌilcani to ayex man̈ ex israeloc ol yal Dios to vachꞌ ex dꞌa yichan̈,
yujto ix eyacꞌoch dꞌa e cꞌool.
Atax dꞌa pecaꞌ albꞌilcan vachꞌ abꞌix dꞌa vin̈aj Abraham chiꞌ.
Aton jun tzꞌalan icha tic:
Uuj ol vacꞌ in vachꞌcꞌolal dꞌa junjun nación,
xchicani.
9 Yuj chiꞌ,
tato scacꞌoch Dios chiꞌ dꞌa co cꞌool,
lajan svachꞌcꞌolal sco cha icha ajnac schaan vin̈aj Abraham chiꞌ,
yujto yacꞌnac och Dios chiꞌ vin̈ dꞌa scꞌool.
10 A ebꞌ tzꞌacꞌanoch ley Moisés yipoc scꞌool,
aycot yoval scꞌool Dios dꞌa yibꞌan̈ ebꞌ.
Yujto icha tic syal dꞌa Slolonel Dios chiꞌ:
Ayn̈ej och yoval scꞌool Dios dꞌa yibꞌan̈ jantacn̈ej ebꞌ max cꞌanabꞌajann̈ej masanil tas tzꞌibꞌabꞌilcan dꞌa ley tic,
xchi.
11 Palta chequel to malaj junoc mach vachꞌ dꞌa yichan̈ Dios yujn̈ej scꞌanabꞌajej jun ley chiꞌ.
Yujto syal pax icha tic dꞌa Slolonel chiꞌ:
A ebꞌ tzꞌacꞌanoch Dios dꞌa scꞌool,
vachꞌ ebꞌ dꞌa yichan̈.
Yuj chiꞌ ay sqꞌuinal ebꞌ dꞌa juneln̈ej,
xchi.
12 A jun ley chiꞌ,
malaj syalaꞌ tato yovalil scacꞌ val och Dios dꞌa co cꞌool.
Palta icha tic syalaꞌ:
A ebꞌ scꞌanabꞌajann̈ej juntzan̈ checnabꞌil tic,
ol scha sqꞌuinal ebꞌ yuuj,
xchi.
13 Ay ton cot yoval scꞌool Dios dꞌa quibꞌan̈ yuj jun ley chiꞌ,
palta a Cristo ix on̈ colanel dꞌa yol scꞌabꞌ yoval scꞌool chiꞌ,
yujto schanac och yoval scꞌool Dios chiꞌ dꞌa yibꞌan̈ co qꞌuexuloc.
Yujto syal dꞌa Slolonel Dios chiꞌ:
A junoc mach sdꞌun̈bꞌajqꞌue dꞌa te teꞌ,
ay val cot yoval scꞌool Dios dꞌa yibꞌan̈,
xchi.
14 Icha chiꞌ ix aj Cristo Jesús chiꞌ,
yic vachꞌ a svachꞌcꞌolal Dios yacꞌnac dꞌa vin̈aj Abraham dꞌa pecaꞌ chiꞌ yedꞌ dꞌayon̈ yin̈tilal on̈ tic,
aꞌ tzꞌacꞌjipax dꞌayex a ex man̈ ex israeloc.
An̈ejtonaꞌ,
yujto ix cacꞌoch Cristo dꞌa co cꞌool,
chabꞌil Yespíritu Dios cuuj co masanil,
icha yutejnaccan yalani.
A ley Moisés yedꞌ jun stiꞌ Dios yalnaccani
15 Ex vucꞌtac ex vanabꞌ,
tzin nibꞌej svalbꞌat dꞌayex yuj co bꞌeybꞌal a on̈ anima on̈ tic.
A sco bꞌoan co trato yedꞌ junoc anima,
sbꞌocan yumal,
scacꞌancanem smam co cꞌabꞌ.
A jun chiꞌ schꞌoxani to yovalil ol elcꞌochoc.
Tato icha chiꞌ,
malaj junoc mach syal sjuani,
malaj pax junoc mach syal yacꞌanoch xicul.
16 A Dios,
yacꞌnaccan stiꞌ dꞌa vin̈aj Abraham yedꞌ dꞌa yin̈tilal chiꞌ.
Max yal-laj dꞌa Slolonel Dios chiꞌ:
A juntzan̈ ebꞌ in̈tilal,
man̈ xchioc.
Yujto man̈ tzijtumoc ebꞌ yin̈tilal bꞌaj yalnac.
Palta yalnac icha tic:
A in̈tilal,
xchi.
Yujto junn̈ej val jun yin̈tilal vin̈aj Abraham chiꞌ bꞌaj yalnac,
aton Cristo.
17 Aton jun tic tzin nibꞌej svalbꞌat dꞌayex to a Dios yacꞌnac strato yedꞌ vin̈aj Abraham chiꞌ,
schꞌoxannac to yovalil ol elcꞌochoc.
Ayxo 430 abꞌil yacꞌannaccan strato chiꞌ,
ichato chiꞌ ix acꞌji ley Moisés.
Palta maj juvoclaj jun trato chiꞌ yuj jun ley chiꞌ.
A jun tas albꞌilcan yuj Dios ayic yacꞌannaccan stiꞌ chiꞌ,
maj ecꞌlaj yuj jun ley chiꞌ.
18 Qꞌuinaloc yujn̈ej scꞌanabꞌajan jun ley chiꞌ ebꞌ tzꞌelcꞌoch jun tas ijanoch yacꞌan Dios chiꞌ dꞌa ebꞌ,
tato icha chiꞌ,
man̈ yujoc am yacꞌancan stiꞌ Dios chiꞌ ix yalancan dꞌa ebꞌ.
Palta a stiꞌ Dios yacꞌnaccan dꞌa vin̈aj Abraham chiꞌ to ton̈ej ol siej jun chiꞌ dꞌa ebꞌ.
19 Palta ¿tas yopisio jun ley chiꞌ tze naꞌa?
A jun ley chiꞌ acꞌbꞌil yic vachꞌ scheclajel smul junjun anima.
Ayn̈ej ton yopisio jun ley chiꞌ,
masanto ix javi jun yin̈tilal vin̈aj Abraham chiꞌ,
aton dꞌa jun chiꞌ yacꞌnaccan stiꞌ Dios chiꞌ.
A ebꞌ ángel alannaccan jun ley chiꞌ,
axo vin̈aj Moisés acꞌannac cꞌaxpaj dꞌa ebꞌ anima.
20 Palta a ticnaic,
man̈xo yovaliloc ay junoc mach tzꞌoch sbꞌoumaloc yaj ebꞌ anima yedꞌ Dios,
yujto junn̈ej mach yacꞌnaccan stiꞌ,
aton Dios,
junn̈ej toni.
A yopisio ley
21 Palta a ley Moisés chiꞌ,
man̈ yajcꞌoloc sbꞌa yedꞌ juntzan̈ tas yalnaccan Dios,
ayic yacꞌannaccan stiꞌ dꞌayon̈.
Qꞌuinaloc ay junoc ley syal yacꞌan co qꞌuinal tato sco cꞌanabꞌajej,
tzam yal Dios chiꞌ to malaj co mul dꞌa yichan̈.
22 Palta syal dꞌa Slolonel Dios chiꞌ to a masanil anima,
ayecꞌ dꞌa yol scꞌabꞌ chucal.
Icha chiꞌ syalcani yic vachꞌ a ebꞌ tzꞌacꞌanoch Jesucristo dꞌa scꞌool,
syal schaan jun qꞌuinal ebꞌ altabꞌilcan yuj Dios.
23 Ayic manto ja jun mach scacꞌoch dꞌa co cꞌool,
ay on̈to ecꞌ dꞌa yalan̈ jun ley chiꞌ.
Ichato yambꞌil on̈ yuj jun ley chiꞌ masanto ix checlaj jun mach scacꞌoch dꞌa co cꞌool chiꞌ.
24 Yujto a jun ley chiꞌ,
ay yopisio on̈ scuchbꞌani masanto ix ja Cristo.
Axo ticnaic,
vachꞌ on̈ dꞌa yichan̈ Dios,
yujto scacꞌoch Cristo dꞌa co cꞌool.
25 A ticnaic,
man̈xo on̈ ayoc och dꞌa yol scꞌabꞌ jun cuchbꞌannac on̈ chiꞌ,
yujto ayxo och Cristo dꞌa co cꞌool.
26 Yujn̈ej to tzeyacꞌoch Cristo Jesús dꞌa e cꞌool quedꞌoc,
yuj chiꞌ yuninal exxo Dios,
junxon̈ej eyaj yedꞌ Cristo e masanil quedꞌoc.
27 A jantac on̈ tzon̈ acꞌji bautizar dꞌa yic Cristo,
junxon̈ej tzon̈ aj yedꞌoc,
axon̈ej sbꞌeybꞌal Cristo chiꞌ sco chaoch dꞌa quibꞌan̈ co bꞌeybꞌalani.
28 Man̈xa yelcꞌochi tato israel on̈,
mato maay.
Vachꞌchom checabꞌ caji,
ma munil quic co bꞌa,
vachꞌchom vinac,
ma ix,
man̈xa yelcꞌochi,
yujto junxon̈ej caj co masanil yedꞌ Cristo Jesús.
Icha val to junxon̈ej animail caj co masanil.
29 Yujto yic exxo Cristo,
yuj chiꞌ yin̈tilal exxo vin̈aj Abraham chiꞌ quedꞌoc.
Axo tas yalnaccan Dios to ol yacꞌ dꞌayon̈ ol e cha quedꞌoc.