Tzalajnac ebꞌ schecabꞌ Cristo yedꞌ vin̈aj Pablo
2
14 abꞌilxo chiꞌ,
ichato chiꞌ in bꞌatxi dꞌa Jerusalén chiꞌ,
yedꞌ vin̈aj Bernabé,
ajun pax vin̈aj Tito bꞌat quedꞌoc.
2 Bꞌat in taꞌ,
yujto schꞌox Dios dꞌayin to yovalil tzin bꞌati.
Ayic in cꞌoch taꞌ,
a ebꞌ scuchbꞌan ebꞌ creyente,
smolbꞌej sbꞌa ebꞌ vedꞌoc.
Ataꞌ val dꞌa ebꞌ schꞌocoj chajtil yaj jun vachꞌ abꞌix yic colnabꞌil svalel dꞌa scal ebꞌ man̈ israeloc chiꞌ.
Icha chiꞌ vutej in bꞌa,
talaj nabꞌan̈ej vixtej in bꞌa in munlaji.
3 Axo vin̈aj Tito chiꞌ,
aton vin̈ ajun vedꞌoc,
vachꞌchom griego vin̈,
palta man̈ acꞌbꞌiloc pural vin̈ yacꞌji circuncidar.
4 Yel toni,
ay juntzan̈ ebꞌ syaloch sbꞌa creyenteal,
snibꞌej ebꞌ to acꞌji circuncidar vin̈aj Tito chiꞌ.
Palta a ebꞌ chiꞌ,
elcꞌaltac och ebꞌ dꞌa co cal,
ton̈ej smaclej yil ebꞌ chajtil tzꞌaj quel dꞌa yalan̈ ley Moisés yuj Cristo Jesús.
Yujto snibꞌej ebꞌ tzon̈ canxi dꞌa yalan̈ jun ley chiꞌ.
5 Palta maj co cꞌanabꞌajej tas yal ebꞌ chiꞌ,
yujto malaj co gana sqꞌuexchaj jun vachꞌ abꞌix te yel bꞌaj ix eyacꞌoch e cꞌool.
6 Palta a ebꞌ cuchbꞌum yaj dꞌa ebꞌ,
man̈xa junocxo checnabꞌil yacꞌ ebꞌ dꞌayin.
Maj in naꞌa tato nivan yopisio ebꞌ,
yujto a dꞌa sat Dios,
lajan on̈n̈ej co masanil.
7 Malaj tas yal ebꞌ dꞌayin,
yujto nachajel yuj ebꞌ to a Dios acꞌjinac vopisio valanel vachꞌ abꞌix yic colnabꞌil dꞌa scal ebꞌ man̈ israeloc,
icha ajnac yacꞌji yopisio vin̈aj Pedro yalanel vachꞌ abꞌix yic colnabꞌil chiꞌ dꞌa scal ebꞌ israel.
8 A Dios ix yamcꞌabꞌan vin̈aj Pedro chiꞌ dꞌa scal ebꞌ israel,
an̈ejtonaꞌ,
Aꞌ ix in yamcꞌabꞌan dꞌa scal ebꞌ man̈ israeloc.
9 Axo vin̈aj Jacobo,
vin̈aj Pedro yedꞌ vin̈aj Juan,
yel ton val nivan yelcꞌoch ebꞌ vin̈ dꞌa sat ebꞌ creyente dꞌa Jerusalén chiꞌ,
ix nachajel yuj ebꞌ vin̈ to a Dios acꞌjinac jun vopisio tic yuj svachꞌcꞌolal,
yuj chiꞌ co yamlaj co cꞌabꞌ yedꞌ ebꞌ vin̈ yedꞌ vin̈aj Bernabé.
Icha chiꞌ yutej ebꞌ vin̈ schꞌoxani to sgana ebꞌ vin̈ tzon̈ bꞌat dꞌa scal ebꞌ man̈ israeloc,
yacbꞌan van smunlaj pax ebꞌ vin̈ dꞌa scal ebꞌ quetisraelal.
10 An̈ej jun yal ebꞌ vin̈ dꞌayon̈ to sco nacot ebꞌ mebꞌaꞌ.
Palta a jun chiꞌ,
toxon in gana tzin cꞌulej.
Tumajnac vin̈aj Pedro yuj vin̈aj Pablo dꞌa Antioquía
11 Palta ayic yulecꞌ vin̈aj Pedro dꞌa Antioquía,
in tumej vin̈ dꞌa yichan̈ ebꞌ smasanil,
yujto man̈ vachꞌoc yutej sbꞌa vin̈.
12 Yujto ayic scꞌochnaj vin̈,
sva vin̈ yedꞌ ebꞌ creyente man̈ israeloc.
Palta axo yic scꞌoch juntzan̈ ebꞌ schecabꞌ vin̈aj Jacob dꞌa Antioquía chiꞌ,
yicꞌanel sbꞌa vin̈,
majxo valaj vin̈ yedꞌ ebꞌ man̈ israeloc chiꞌ,
yujto xiv vin̈ dꞌa juntzan̈ ebꞌ aytooch spensar dꞌa ley Moisés.
13 Axo juntzan̈xo ebꞌ israel creyentexo,
sbꞌeybꞌalej sbꞌeybꞌal vin̈aj Pedro chiꞌ ebꞌ.
Chabꞌ sat yutej sbꞌa ebꞌ yedꞌ vin̈.
Yedꞌ pax vin̈aj Bernabé,
chabꞌsat yutej pax sbꞌa vin̈ yedꞌ ebꞌ.
14 Palta vilaꞌ to man̈ vachꞌoc yutej sbꞌa ebꞌ icha syal jun vachꞌ abꞌix te yel,
yuj chiꞌ val dꞌa vin̈aj Pedro chiꞌ dꞌa yichan̈ ebꞌ creyente smasanil:
A ach tic,
israel ach,
palta ina lajan a bꞌeybꞌal yedꞌ ebꞌ man̈ israeloc chiꞌ.
Man̈ lajanoc tzutej a bꞌeybꞌal icha sbꞌeybꞌal ebꞌ quetisraelal.
Yuj chiꞌ,
¿tas yuj tzacꞌ pural ebꞌ man̈ israeloc chiꞌ,
yic lajan syutej sbꞌeybꞌal ebꞌ yedꞌ ebꞌ quetisraelal tic?
xin chi dꞌa vin̈.
15 A on̈ tic,
yin̈tilal on̈ israel.
Yuj chiꞌ,
ichato man̈ on̈ ajmuloc icha ebꞌ man̈ israeloc.
16 Palta cojtac to malaj junoc mach tzꞌoch vachꞌil dꞌa yichan̈ Dios yujn̈ej to scꞌanabꞌajej ley Moisés.
Palta an̈ej ebꞌ tzꞌacꞌanoch Jesucristo dꞌa scꞌool vachꞌ dꞌa yichan̈ Dios chiꞌ.
An̈ejtonaꞌ on̈ pax tic,
scacꞌ paxoch Jesucristo chiꞌ dꞌa co cꞌool eyedꞌoc,
yic vachꞌ on̈ dꞌa yichan̈.
Yujn̈ej cacꞌanoch Cristo chiꞌ dꞌa co cꞌool,
vachꞌ on̈ dꞌa yichan̈ Dios,
man̈ yujoc co cꞌanabꞌajan ley Moisés chiꞌ.
Yujto malaj junoc mach vachꞌ dꞌa yichan̈ Dios yujn̈ej scꞌanabꞌajan tas syal jun ley chiꞌ.
17 Co gana to yuj Cristo syal Dios to vachꞌ on̈ dꞌa yichan̈.
Yuj chiꞌ,
scheclajeli to a on̈ co masanil israel on̈ tic ay pax co mul.
Palta ¿tom a Cristo tzon̈ acꞌanoch chucal chiꞌ?
Maay.
18 Toxo ix valaꞌ to man̈xalaj yopisio jun ley chiꞌ.
Qꞌuinaloc svalaꞌ to tzato ochxi yopisio,
scheclajelta to a in van yoch in mul.
19 A ticnaic,
ichato chamnac on̈ dꞌa ley Moisés chiꞌ.
Yuj jun ley chiꞌ,
ichato chamnac on̈,
yic vachꞌ pitzan on̈xo dꞌa yichan̈ Dios.
20 A ticnaic,
a dꞌa yichan̈ Dios,
dꞌun̈bꞌabꞌil on̈ qꞌue dꞌa teꞌ culus yedꞌ Cristo.
Yuj chiꞌ man̈xo on̈ pitzanoc ticnaic.
Aton Cristo pitzan yajoch dꞌayon̈.
A tas sco cꞌulej ticnaic,
sco cꞌulej yuj cacꞌan och Cristo Yuninal Dios dꞌa co cꞌool.
Schꞌoxnac val to xajan on̈ yuuj,
yujto yacꞌnaccham sbꞌa cuuj.
21 Man̈ vanoc valan dꞌayex to nabꞌan̈ej schꞌoxnac svachꞌcꞌolal Dios dꞌayon̈.
Qꞌuinaloc tato yujto sco cꞌanabꞌajej ley Moisés syalan Dios to vachꞌ on̈ dꞌa yichan̈,
nabꞌan̈ej am ix cham Cristo chiꞌ cuuj.