Jun ofrenda sqꞌue vaan
16
A ticnaic,
ol valbꞌat dꞌayex yuj jun ofrenda ol qꞌue vaan dꞌa e cal,
yic ol acꞌjoc dꞌa ebꞌ yicxo Dios.
A juntzan̈ checnabꞌil ol valbꞌat dꞌayex tic,
valnacxo dꞌa ebꞌ creyente dꞌa yol yic Galacia.
Yuj chiꞌ,
icha syutej sbꞌa ebꞌ chiꞌ,
icha chiꞌ ol eyutoc e bꞌa.
2 Junjun ex tzeyiqꞌuel eyofrenda dꞌa junjun domingoal,
ato syalaꞌ jantac tzeyacꞌ ganar,
tze molbꞌani.
Tato icha chiꞌ,
man̈octo tzin cꞌochi,
tzeyacꞌan lista eyofrenda.
3 Tze say jayvan̈oc ebꞌ ol in checbꞌat dꞌa Jerusalén.
Ato ol in cꞌochoc ol in bꞌoan jun carta ol bꞌat yedꞌ ebꞌ,
yic ol ilchajoc to ay yopisio ebꞌ.
Aton ebꞌ chiꞌ ol icꞌanbꞌat eyofrenda dꞌa ebꞌ creyente taꞌ.
4 Ayic ol in cꞌoch eyedꞌ taꞌ,
ol vilaꞌ talaj a in ol in bꞌat lacꞌan yedꞌ ebꞌ dꞌa Jerusalén chiꞌ.
Tato icha chiꞌ,
vedꞌ ol bꞌat ebꞌ.
Sna vin̈aj Pablo yuj sviaje
5 Ayic ol in bꞌat ex vilaꞌ,
yovalil ol in ecꞌ chabꞌ oxeoc cꞌual dꞌa yol yic Macedonia,
ichato chiꞌ ol in cꞌoch dꞌayex.
6 Ta icha chiꞌ ol in ecꞌ nivanoc tiempo eyedꞌ taꞌ.
Talaj ay in ecꞌ taꞌ ol ecꞌ n̈abꞌilqꞌuinal.
Axo yic ol in bꞌatxoc,
ol ex colvaj dꞌayin dꞌa yol bꞌe bꞌaj ol in bꞌatxoc chiꞌ.
7 In gana man̈ elan̈chameloc tzin ecꞌ dꞌayex.
In gana tzin ecꞌ nivanoc tiempo eyedꞌoc,
tato icha chiꞌ tzꞌel dꞌa scꞌool Cajal Jesús.
8 Palta ay in to ecꞌ dꞌa Éfeso tic,
masanto ol ecꞌ qꞌuin̈ Pentecostés,
axo in bꞌat chiꞌ.
9 Yujto svilaꞌ to te vachꞌn̈ej tzꞌelcꞌoch in munlajel dꞌa yic Cajal Jesús dꞌa tic.
Vachꞌchom tzijtum ebꞌ schichonoch scꞌool dꞌayin,
palta jacann̈ej in munlaji,
ay pax tas svicꞌ dꞌa in munlajel tic.
10 Tato ol cꞌoch vin̈aj Timoteo dꞌayex taꞌ,
tzeyacꞌ tzalajbꞌoc scꞌool vin̈ eyedꞌoc,
yic man̈ ol cus vin̈,
yujto a dꞌa yic Cajal Jesús smunlaj vin̈ icha in tic.
11 Yuj chiꞌ,
malaj junoc ex tze patiquejel vin̈ taꞌ.
A inxo tic,
van in tan̈van sja vin̈ dꞌa tic yedꞌ juntzan̈xo ebꞌ cucꞌtac ol ja yedꞌ vin̈,
yuj chiꞌ ayic ol cot vin̈ dꞌa yol bꞌe,
tzex colvajcot dꞌa vin̈,
sec yuj chiꞌ tzalajcꞌolal ol cot vin̈.
12 Axo vin̈ cucꞌtac Apolos,
ix in tevi dꞌa vin̈,
yic sbꞌat vin̈ ex yilaꞌ.
Palta max yal scꞌool vin̈ sbꞌat ex yil dꞌa jun tiempoal tic.
Ato yic ol och scolanil vin̈,
ol bꞌat ex yilan vin̈.
Tzꞌacꞌjibꞌat stzatzil scꞌool ebꞌ
13 Macvajan̈ec.
Tecꞌan tzeyutej e bꞌa eyacꞌanoch Cajal Jesús dꞌa e cꞌool.
Man̈ ex xiv jabꞌoc.
Tecꞌbꞌejec e bꞌa junjun ex.
14 A jantacn̈ej tas tze cꞌulej,
tze cꞌulej dꞌa smasanil e cꞌool yuj svachꞌiloc ebꞌ quetanimail.
15 A ticnaic ex vucꞌtac ex vanabꞌ eyojtac to a vin̈aj Estéfanas yedꞌ ebꞌ cajan yedꞌ vin̈ dꞌa spat,
bꞌabꞌel creyente vin̈ yedꞌ ebꞌ dꞌa yol yic Acaya bꞌaj ayex chiꞌ.
A ebꞌ chiꞌ,
syacꞌ val servil ebꞌ yetcreyenteal ebꞌ dꞌa smasanil scꞌool.
16 Tzin cꞌan pavor dꞌayex to tze cꞌanabꞌajej tas syal ebꞌ.
Tze cꞌanabꞌajan pax jantacn̈ej ebꞌ lajan syutej sbꞌa icha ebꞌ chiꞌ,
aton ebꞌ scolvaji,
yedꞌ smunlaj dꞌa yic Cajal Jesús.
17 Tzin tzalaj ticnaic,
yujto ix ja vin̈aj Estéfanas vedꞌ dꞌa tic yedꞌ vin̈aj Fortunato yedꞌ vin̈aj Acaico.
A ebꞌ vin̈ tic,
scolvaj val ebꞌ vin̈ dꞌayin.
Ichato e qꞌuexul yaj ebꞌ vin̈ scolvaj dꞌayin dꞌa tic,
yujto max yal-laj e javi.
18 Icha ix yutej ebꞌ vin̈ yacꞌan snivanil e cꞌool taꞌ,
icha chiꞌ syutej ebꞌ vin̈ yacꞌanpax snivanil in cꞌool dꞌa tic.
Ayocabꞌ yelcꞌoch ebꞌ vin̈ dꞌayex.
Tato ay juntzan̈xo ebꞌ icha ebꞌ vin̈ tic,
ayocabꞌ pax yelcꞌoch ebꞌ dꞌayex.
19 A ebꞌ ay dꞌa junjun iglesia dꞌa yol yic Asia tic,
syacꞌbꞌat stzatzil e cꞌool ebꞌ e masanil taꞌ.
An̈ejtonaꞌ vin̈aj Aquila yedꞌ ix Priscila yedꞌ ebꞌ creyente smolbꞌej sbꞌa dꞌa spat ebꞌ,
syacꞌpaxbꞌat stzatzil e cꞌool ebꞌ dꞌa sbꞌi Cajal Jesús.
20 Syacꞌbꞌat stzatzil e cꞌool masanil ebꞌ creyente dꞌa tic.
Slaj eyacꞌlaj stzatzil e cꞌool dꞌa tzalajcꞌolal taꞌ.
21 A stzatzil e cꞌool svacꞌbꞌat tic,
a in val Pablo in tzin tzꞌibꞌejbꞌat yedꞌ in cꞌabꞌ.
22 Tato ay junoc mach max xajanan Cajal Jesucristo,
cotocabꞌ yoval scꞌool Dios dꞌa yibꞌan̈.
Ach Cajal,
cotan̈ dꞌa elan̈chamel.