Yabꞌixal yic ix pitzvixi Cristo
15
A ticnaic,
ex vucꞌtac ex vanabꞌ,
in gana tze nacot jun vachꞌ abꞌix yic colnabꞌil valnaccan dꞌayex.
A jun abꞌix tic,
e chanacxo.
Tecꞌan exxo dꞌay ticnaic.
2 Tato an̈ejaꞌ ayoch e pensar dꞌa jun abꞌix valnaccan dꞌayex chiꞌ,
tato yel eyacꞌnacoch dꞌa e cꞌool,
ay e colnabꞌil yuuj.
3 A juntzan̈ cꞌaybꞌubꞌal in chanac,
aton ix val dꞌayex.
A juntzan̈ te nivac yelcꞌoch ix val dꞌayex.
To a Cristo ix cham yuj co mul,
icha yaj stzꞌibꞌchajcan dꞌa Slolonel Dios.
4 Ix mucchaji,
palta ix pitzvixi dꞌa schabꞌjial,
icha yaj stzꞌibꞌchajpaxcan dꞌa Slolonel chiꞌ.
5 Ix schꞌox sbꞌa dꞌa vin̈aj Pedro.
Ichato chiꞌ ix schꞌoxan sbꞌa dꞌa juntzan̈xo ebꞌ schecabꞌ.
6 Ix lajvi chiꞌ,
ix schꞌoxan sbꞌa dꞌa juntzan̈xo ebꞌ quetcreyenteal,
ecꞌal am oyeꞌ ciento sbꞌisul ebꞌ,
ayic molanecꞌ ebꞌ ix yilan ebꞌ smasanil.
Tzijtumto ebꞌ pitzan ticnaic,
palta ay jayvan̈ ebꞌ chamnacxo.
7 An̈ejtonaꞌ,
ix schꞌox sbꞌa dꞌa vin̈aj Jacobo.
Ix lajvi chiꞌ,
ix schꞌoxan sbꞌa dꞌa ebꞌ schecabꞌ smasanil.
8 Slajvubꞌalxo ix schꞌoxanpax sbꞌa dꞌayin.
Yujto icha junoc unin manto yaljubꞌaloc,
icha chiꞌ vaji.
Yujto slajvubꞌalxo ix in och schecabꞌoc.
9 Yuj chiꞌ,
a in tic malaj velcꞌoch dꞌa scal juntzan̈xo ebꞌ schecabꞌ Jesucristo chiꞌ.
Man̈ smojoc pax valji schecabꞌoc Jesús yedꞌ ebꞌ,
yujto vacꞌnac val och yaelal dꞌa yibꞌan̈ ebꞌ yiglesia Dios.
10 Palta yujn̈ej svachꞌcꞌolal Dios schecabꞌ Cristo vaj ticnaic.
Man̈ nabꞌan̈ejoc ix schꞌox svachꞌcꞌolal tic dꞌayin,
yujto ecꞌto in munlaj dꞌa yichan̈ ebꞌ vetbꞌeyum chiꞌ smasanil.
Palta man̈oc in tzin munlaj in chꞌocoj.
A Dios smunlaj vedꞌoc yuj svachꞌcꞌolal.
11 Yuj chiꞌ,
vachꞌchom a in tzin munlaji,
vachꞌchom a ebꞌ chiꞌ smunlaji,
palta an̈ejaꞌ ix alchajel jun vachꞌ abꞌix tic.
An̈ejaꞌ jun vachꞌ abꞌix tic ix eyacꞌoch dꞌa e cꞌool.
Ayic ol pitzvocxi ebꞌ chamnac
12 A jun vachꞌ abꞌix scalel tic,
a tzꞌalani to ix pitzvixi Cristo dꞌa scal ebꞌ chamnac.
Yuj chiꞌ,
¿tas yuj ayex van eyalan ticnaic to man̈ ol pitzvocxi ebꞌ chamnac?
13 Tato yel man̈ ol pitzvocxi ebꞌ icha tzeyal chiꞌ,
man̈ pitzvinacoc amxi Cristo chiꞌ syal chiꞌ.
14 An̈ejtonaꞌ,
tato man̈ pitzvinacocxi Cristo chiꞌ,
a jun vachꞌ abꞌix scalel tic,
malaj am jabꞌoc yelcꞌochi.
Tato icha chiꞌ,
nabꞌan̈ej am tzeyacꞌoch dꞌa e cꞌool.
15 Tato icha chiꞌ,
a on̈ tic,
squesej stioc Dios,
yujto ix caleli to a Dios ix acꞌanxi pitzvoc Cristo.
Qꞌuinaloc max yal spitzvixi ebꞌ chamnac icha tzeyal jayvan̈ ex chiꞌ,
maj am acꞌjixi pitzvoc Cristo chiꞌ yuj Dios.
16 Tato max yal spitzvixi ebꞌ chamnac chiꞌ,
an̈ejtonaꞌ icha pax chiꞌ Cristo,
maj am pitzvocxilaj.
17 Palta qꞌuinaloc tato maj pitzvixi Cristo chiꞌ,
nabꞌan̈ej am tzeyacꞌoch dꞌa e cꞌool,
yujto an̈ej ama ayoch e mul dꞌa eyibꞌan̈.
18 Axo ebꞌ creyente chamnacxo,
juneln̈ej am chamnac ebꞌ.
19 Tato yujn̈ej val co vachꞌiloc dꞌa yolyibꞌan̈qꞌuinal tic scacꞌoch Cristo yipoc co cꞌool,
más am obꞌiltac on̈ dꞌa yichan̈ ebꞌ anima smasanil.
20 Palta dꞌa val yel pitzvinac Cristo chiꞌ dꞌa scal ebꞌ chamnac.
Icha junoc bꞌabꞌel ajan tzꞌeluli,
icha chiꞌ aj sbꞌabꞌlaj pitzvinacxi Cristo chiꞌ dꞌayon̈,
yic vachꞌ schꞌoxoꞌ to ol on̈ pitzvocxi pax a on̈ tic.
21 Yuj jun vin̈ vinac,
aton vin̈aj Adán ix acꞌjicancot chamel dꞌa quibꞌan̈ co masanil.
An̈ejtonaꞌ yuj junxo mach,
aton Cristo ol acꞌjocxi pitzvoc ebꞌ chamnacxo.
22 Masanil anima schami,
yujto yin̈tilal ebꞌ vin̈aj Adán.
An̈ejtonaꞌ,
a on̈ yic on̈xo Cristo ol on̈ pitzvocpax co masanil.
23 Palta dꞌa stzolal ol aj co pitzvixi.
A Cristo chiꞌ bꞌabꞌlaj pitzvinac.
Axo yic ol jax junelxo,
ato taꞌ ol on̈ pitzvocxi co masanil a on̈ yic on̈xo tic.
24 Ol lajvoc chiꞌ,
ol ja slajvubꞌ.
Ato taꞌ ol can masanil ebꞌ yajal dꞌa yalan̈ yuj Cristo,
masanil ebꞌ ay yopisio yedꞌ masanil ebꞌ ay spoder.
Ichato chiꞌ ol acꞌjoc och ebꞌ dꞌa yol scꞌabꞌ Dios Mamabꞌil yuuj.
25 Yujto a Cristo chiꞌ,
yovalil ol ochcan Reyal,
masanto ol can masanil juntzan̈ ayoch ajcꞌolal dꞌay dꞌa yalan̈ yuuj.
26 Ay pax junxo icha ajcꞌool yajoch dꞌayon̈,
aton chamel.
A jun chiꞌ,
ol acꞌjoccan lajvoc yuj Cristo dꞌa slajvubꞌalxo.
27 Yujto syal dꞌa Slolonel Dios Tzꞌibꞌabꞌilcan icha tic:
A Dios ix acꞌanoch masanil tas dꞌa yol scꞌabꞌ Cristo chiꞌ,
yic vachꞌ aꞌ tzꞌacꞌan mandar smasanil,
xchi.
Ayic syalani to ix acꞌjioch masanil yuj Dios dꞌa yol scꞌabꞌ chiꞌ,
man̈ locanoc yacꞌji mandar Dios chiꞌ yuuj.
Yujto Aꞌ tzꞌacꞌanoch masanil tas dꞌa yol scꞌabꞌ Cristo chiꞌ.
28 Ayic ol vachꞌ acꞌjococh masanil tas dꞌa yol scꞌabꞌ Yuninal Dios,
axo svachꞌ acꞌanoch sbꞌa dꞌa yol scꞌabꞌ Dios Mamabꞌil chiꞌ.
Yujto a Dios chiꞌ acꞌjinac och smasanil tas dꞌa yol scꞌabꞌ.
Ichato chiꞌ,
axon̈ej Dios ol och yajalil dꞌa yibꞌan̈ smasanil.
29 A ticnaic,
ay ebꞌ syacꞌ bautizar sbꞌa sqꞌuexuloc ebꞌ chamnac.
Palta tato man̈ ol pitzvocxi ebꞌ chamnac chiꞌ,
¿tas yuj ay ebꞌ syacꞌ bautizar sbꞌa sqꞌuexuloc ebꞌ?
30 A on̈xo pax tic,
¿tas yuj scacꞌoch co bꞌa dꞌa yol scꞌabꞌ yaelal dꞌa masanil tiempo?
31 A in tic,
ex vucꞌtac ex vanabꞌ,
junjun cꞌu ijan tzin miljichamoc.
Val yel sval dꞌayex,
tzin tzalaj eyuuj,
yujto ix eyacꞌoch Cajal Jesucristo dꞌa e cꞌool vedꞌoc.
32 A dꞌa Éfeso tic,
ay juntzan̈ ebꞌ cotnac yoval dꞌayin.
Te ov ebꞌ icha junoc nocꞌ nocꞌ ay smay.
Tato man̈ ol on̈ pitzvocxi,
¿tas gana vixtejnac in bꞌa icha chiꞌ?
Tato man̈ ol pitzvocxi ebꞌ chamnac,
más am vachꞌ ton̈ej scacꞌ co gana ticnaic.
Con̈ vaec,
cuqꞌuec junoc an̈,
talaj qꞌuicꞌan chamnac on̈xo.
33 Man̈ eyacꞌ e bꞌa musansatil yuj junoc es.
Tato junn̈ej tzon̈ ecꞌ yedꞌ ebꞌ chuc,
tzꞌixtaxel co vachꞌ bꞌeybꞌal yuj ebꞌ.
34 Naec val e bꞌa,
tze bꞌoan e pensar.
Man̈xo e cꞌulej juntzan̈ chucal,
yujto ayex manto eyojtaquej val el Dios.
Svalbꞌat juntzan̈ tic dꞌayex,
sec yuj chiꞌ ol ex qꞌuixvoqueli.
A tas ol on̈ aj co pitzvixi
35 Tecan ay junoc ex ol e cꞌanbꞌej dꞌayin:
A ebꞌ chamnac tzal chiꞌ,
¿chajtil ol aj spitzvixi ebꞌ?
¿Chajxomtil yilji snivanil ebꞌ,
ayic ol pitzvocxi ebꞌ?
tecan xe chi.
36 Tato tze cꞌanbꞌej icha chiꞌ,
mantalaj e pensar.
Qꞌuinaloc ay junoc in̈at ticnaic,
tato scavej,
yovalil scꞌabꞌat jun in̈at chiꞌ yic spaqꞌui.
37 Ayic scavan jun in̈at chiꞌ,
man̈oclaj steel scavej.
Vachꞌchom ixim trigo,
ma juntzan̈xo in̈at,
an̈ej val sat scavej.
38 Axo Dios tzꞌacꞌan steel chiꞌ icha sgana,
ato syalaꞌ tas in̈atil junjun.
39 Axo masanil tas sbꞌeyecꞌ dꞌa yolyibꞌan̈qꞌuinal tic,
chꞌocchꞌoc snivanil junjun macan̈.
Chꞌoc co nivanil a on̈ anima on̈ tic.
Chꞌoc pax snivanil nocꞌ nocꞌ chan̈eꞌ yoc.
Chꞌoc pax snivanil nocꞌ much.
An̈ejtonaꞌ,
chꞌoc pax snivanil nocꞌ chay.
40 Ay juntzan̈ tas ay dꞌa satchaan̈.
Ay pax juntzan̈ tas dꞌa yolyibꞌan̈qꞌuinal tic.
Chꞌoc svachꞌil juntzan̈ tas ay dꞌa satchaan̈.
Chꞌoc pax svachꞌil juntzan̈ tas ay dꞌa yolyibꞌan̈qꞌuinal tic.
41 A juntzan̈ tas ay dꞌa satchaan̈ chiꞌ chꞌocchꞌoc yilji stziquiquial.
Chꞌoc yilji stziquiquial yoc cꞌu.
Chꞌoc pax yilji stziquiquial qꞌuen uj.
Axo qꞌuen cꞌanal,
chꞌocchꞌoc pax yilji stziquiquial junjun qꞌueen.
42 An̈ejtonaꞌ,
icha chiꞌ ol aj ebꞌ chamnac,
ayic ol pitzvocxi ebꞌ.
A co nivanil tic,
aꞌ smucchaji,
yujto yic chamel yaji.
Palta ayic ol on̈ pitzvocxi,
a co nivanil chiꞌ,
man̈xalaj bꞌaqꞌuin̈ ol chamoc.
43 Ayic ol mucchaj co nivanil tic,
malaj jabꞌoc yelcꞌochi,
toxon malaj jabꞌoc svachꞌil.
Palta ayic ol on̈ pitzvocxi,
te nivanxo yelcꞌochi,
yelxo vachꞌ jun co nivanil chiꞌ.
44 Ayic ol mucchaj co nivanil tic,
nabꞌa chibꞌej.
Axo yic ol on̈ pitzvocxi,
a jun co nivanil chiꞌ,
yicxo espíritu.
Yujto ay jun co nivanil nabꞌa chibꞌej tic,
yuj chiꞌ cojtac to ay pax junxo co nivanil yicxo espíritu.
45 Icha chiꞌ yaj stzꞌibꞌchajcan dꞌa Slolonel Dios,
aton bꞌaj syalcan icha tic:
A vin̈ bꞌabꞌel vinac bꞌobꞌil,
aton vin̈aj Adán,
vin̈ acꞌbꞌil sqꞌuinal,
xchi.
Palta ay junxo tzacꞌanto sjavi,
icha vin̈aj Adán chiꞌ yaji,
palta a jun chiꞌ,
aton jun Espíritu acꞌum qꞌuinal.
46 Man̈oc jun co nivanil yic espíritu ix bꞌabꞌlaj acꞌji dꞌayon̈.
A jun co nivanil yic chibꞌejal tic,
aꞌ ix bꞌabꞌlaj acꞌji.
Axo co nivanil yic espíritu,
tzacꞌanto ol acꞌjoc.
47 A vin̈ bꞌabꞌel vinac,
aꞌ dꞌa lum luum bꞌojinac vin̈.
Yuj chiꞌ yic yolyibꞌan̈qꞌuinal tic yaj vin̈.
Axo junxo schabꞌil,
aton Cajal Jesús,
yic satchaan̈ yaji.
48 Icha snivanil jun vin̈ bꞌobꞌil dꞌa lum luum chiꞌ,
icha chiꞌ co nivanil tic,
yic yolyibꞌan̈qꞌuinal tic yaji.
Palta icha snivanil jun yic satchaan̈ chiꞌ,
icha chiꞌ junxo co nivanil yic satchaan̈ ol co chaꞌa.
49 A ticnaic,
lajan co nivanil tic yedꞌ jun vin̈ bꞌobꞌil dꞌa lum luum chiꞌ.
Palta a dꞌa jun tiempoal chiꞌ,
lajan ol aj jun co nivanil tic yedꞌ jun yic satchaan̈ chiꞌ.
50 Ex vucꞌtac ex vanabꞌ,
in gana svalbꞌat junxo tic dꞌayex.
A jun co nivanil tic,
nabꞌa chicꞌ,
nabꞌa chibꞌej.
Yuj chiꞌ,
man̈ ol yal-laj scꞌoch bꞌaj syacꞌ Yajalil Dios.
A co nivanil tic,
chamelbꞌa yaji.
Yuj chiꞌ max yal schaan sqꞌuinal dꞌa juneln̈ej.
51 Palta ay jun tas tzin nibꞌej tzeyojtaquejel ticnaic,
aton jun tas malaj mach ojtannac dꞌa yol yicoꞌ.
A on̈ creyente on̈ tic,
man̈ co masaniloc ol on̈ chamoc,
palta co masanil ol qꞌuexmaj co nivanil tic.
52 A jun chiꞌ,
elan̈chamel ol ujoc.
Junn̈ej mutzꞌsatil ol aj sjavi ayic ol ocꞌ jun qꞌuen slajvubꞌ trompeta.
Ayic ol ocꞌ jun trompeta chiꞌ,
ol laj pitzvocxi masanil ebꞌ creyente chamnacxo,
man̈xalaj bꞌaqꞌuin̈ ol chamxoc ebꞌ.
A on̈xo pitzan on̈to taꞌ,
ol qꞌuexmaj jun co nivanil tic.
53 Yujto a co nivanil tic,
man̈ najtiloc tzꞌeqꞌui,
yuj chiꞌ yovalil ol co cha junxo co nivanil malaj bꞌaqꞌuin̈ ol ixtaxoc.
A jun co nivanil tic,
chamelbꞌa yaji.
Yuj chiꞌ,
yovalil ol co cha junxo co nivanil man̈xa bꞌaqꞌuin̈ ol chamoc.
54 Yel toni,
a jun co nivanil tic tzꞌixtaxeli,
yujto chamelbꞌa yaji.
Palta a junxo co nivanil ol acꞌjoc dꞌayon̈,
man̈xa bꞌaqꞌuin̈ ol ixtaxoc,
malaj pax bꞌaqꞌuin̈ ol chamoc.
Ato taꞌ ol elcꞌoch jun tas tzꞌibꞌyajcan dꞌa Slolonel Dios,
aton jun tzꞌalan icha tic:
A chamel ol can dꞌa yalan̈,
yujto ol acꞌjoc ganar.
55 Yuj chiꞌ a ticnaic,
schꞌoxocabꞌ yipal chamel chiꞌ yuj yacꞌan satel anima.
Schꞌoxocabꞌcot yopisio chamel chiꞌ sataneli,
xchicani.
56 Yuj co mul ay spoder chamel chiꞌ on̈ smilani.
Yuj sley Dios ix acꞌjican spoder co mul chiꞌ yic tzon̈ cham yuuj.
57 Palta scacꞌ val yuj diosal dꞌa Dios,
yujto yuj tas ix scꞌulej Cajal Jesucristo yuj chiꞌ scacꞌ ganar chamel chiꞌ.
58 Yuj chiꞌ ex xajanabꞌil vuuj,
tecꞌan val tzeyutej e bꞌa.
Man̈ eyacꞌ somchajel e pensar.
Dꞌa smasanil e cꞌool tzex munlaj dꞌa yic Cajal Jesús dꞌa smasanil tiempo,
yujto eyojtacxo to a jun munlajel sco bꞌo dꞌa yol scꞌabꞌ Cajal Jesús,
man̈ nabꞌan̈ejoc.