Juntzan̈ chꞌocchꞌoc tial
14
Tzeyacꞌ val eyip e xajanan e bꞌa junjun ex.
An̈ejtonaꞌ tzeyacꞌ pax eyip e sayan juntzan̈ opisio syacꞌ Yespíritu Dios dꞌayex.
Ay jun opisio más vachꞌ,
aton jun aloj el slolonel Dios.
2 Ay juntzan̈ ebꞌ syal slolon dꞌa juntzan̈ chꞌocchꞌoc tial.
A dꞌa Dios slolon ebꞌ,
man̈oclaj dꞌa anima,
yujto malaj mach tzꞌabꞌan tas syal ebꞌ.
Aton Yespíritu Dios tzꞌacꞌan yal ebꞌ,
palta malaj junoc mach snachajel yuuj.
3 Palta a mach tzꞌalanel slolonel Dios,
a dꞌa ebꞌ yetanimail ebꞌ syaleli,
yic vachꞌ stecꞌcꞌaj ebꞌ.
Tato icha chiꞌ,
svachꞌ nachajel yuj ebꞌ,
tzꞌacꞌjipax snivanil scꞌool ebꞌ.
4 A ebꞌ slolon dꞌa juntzan̈ chꞌocchꞌoc tial,
munil stecꞌcꞌaj ebꞌ schꞌocoj.
Palta axo ebꞌ tzꞌalanel slolonel Dios,
aton ebꞌ tzꞌacꞌan stecꞌanil ebꞌ yetcreyenteal.
5 In gana tzex lolon dꞌa juntzan̈ chꞌocchꞌoc tial e masanil.
Palta tzin nibꞌej val to a slolonel Dios tzeyaleli.
Yujto a jun tic,
más val ay yopisio dꞌa yichan̈ juntzan̈ chꞌocchꞌoc tial chiꞌ.
A juntzan̈ chiꞌ,
ay ton yopisio tato ay mach tzuji snaaneli tas val syalelcꞌochi,
yic vachꞌ tzꞌoch stecꞌanil ebꞌ creyente chiꞌ yuuj.
6 Yuj chiꞌ,
ex vucꞌtac ex vanabꞌ,
qꞌuinaloc tzin cꞌoch valel juntzan̈ chꞌoc tial dꞌayex ticnaic,
¿tas val jabꞌoc svachꞌil tzeyicꞌcani?
An̈ej tato svacꞌ eyojtaquejel juntzan̈ tas acꞌbꞌil dꞌayin yuj Dios,
juntzan̈ sjelanil,
mato svalel slolonel Dios yedꞌ juntzan̈xo cꞌaybꞌubꞌal dꞌayex,
an̈ej yuj chiꞌ syal eyicꞌan svachꞌil.
7 Qꞌuinaloc tato ay juntzan̈ son ticnaic,
tzꞌocꞌ junoc flauta,
scꞌan̈ pax junoc arpa.
Tato ton̈ej sn̈ilili sjaj,
¿tom scabꞌi tas jajil bꞌaj van scꞌan̈ junjun?
8 Qꞌuinaloc tato ay junoc oval ticnaic,
ayic scꞌoch yorail sbꞌat ebꞌ soldado,
tzꞌocꞌ strompeta ebꞌ,
sbꞌat ebꞌ.
Palta tato man̈oclaj yaj yocꞌ qꞌueen tzꞌaj yoqꞌui,
¿tom syal yacꞌan lista sbꞌa ebꞌ sbꞌat dꞌa oval chiꞌ?
9 An̈ejtonaꞌ,
ich on̈ taꞌ,
tato scal juntzan̈ lolonel malaj mach tzꞌabꞌani,
¿tas ol aj snachajel yuj ebꞌ tas scalaꞌ?
Nabꞌan̈ej am tzon̈ comon lolon icha chiꞌ.
10 A ticnaic,
tzijtum macan̈il tiꞌ ay dꞌa yolyibꞌan̈qꞌuinal tic.
Masanil juntzan̈ tiꞌ chiꞌ,
ay val yelcꞌoch junjun.
11 Qꞌuinaloc tato ay junoc mach sloloni,
palta max cabꞌlaj tas syalaꞌ,
tato icha chiꞌ,
ichato chꞌoc chon̈abꞌil caj dꞌay.
An̈ejtonaꞌ,
ichato chꞌoc chon̈abꞌil yaj pax dꞌayon̈.
12 Vojtacxo to e gana juntzan̈ opisio syacꞌ Yespíritu Dios dꞌayex.
Yuj chiꞌ,
svalaꞌ to tzeyacꞌ val eyip yic vachꞌ ol e cha jun opisio más vachꞌ.
Tato icha chiꞌ,
ol yal eyacꞌan stecꞌanil ebꞌ eyetcreyenteal.
13 Yuj chiꞌ,
tato ay junoc mach tzꞌacꞌji lolon dꞌa junoc chꞌoc tiꞌal,
yovalil scꞌan dꞌa Dios yic syal yalani tas syalelcꞌoch jun chiꞌ.
14 Qꞌuinaloc tato dꞌa junoc chꞌoc tial tzin lesalvi ticnaic,
a in pixan,
slesalvi,
palta axo in pensar max nachajel yuuj tas juntzan̈ sval chiꞌ.
15 Yuj chiꞌ,
¿tas am sco cꞌulej tze naꞌa?
Man̈ocn̈ej yedꞌ co pixan tzon̈ lesalvi.
Yovalil tzon̈ lesalvi pax yedꞌ co pensar yic snachajel cuuj.
An̈ejtonaꞌ,
ayic tzon̈ bꞌitani,
man̈ ton̈ejoc tzon̈ bꞌitan yedꞌ co pixan.
Yovalil tzon̈ bꞌitan pax yedꞌ co pensar,
yic vachꞌ snachajel cuuj.
16 Qꞌuinaloc tato ay junoc ex ticnaic,
tzeyal vachꞌ lolonel dꞌa Dios dꞌa junoc chꞌoc tiꞌal,
tato icha chiꞌ,
an̈ej yedꞌ e pixan tzeyalaꞌ.
Axo ebꞌ ayecꞌ eyedꞌoc,
max nachajel yuj ebꞌ tas jun tzeyal chiꞌ.
Yuj chiꞌ,
ayic tzeyacꞌan yuj diosal dꞌa Dios,
max yal junn̈ej slesalvi ebꞌ eyedꞌoc.
17 Vachꞌchom vachꞌ jun e lesal chiꞌ ayic tzeyacꞌan yuj diosal chiꞌ,
palta malaj mach tzꞌacꞌji stecꞌanil yuuj.
18 Yuj val dios dꞌa co Mam Dios yujto más val syal in lolon dꞌa juntzan̈ chꞌocchꞌoc tial chiꞌ dꞌa eyichan̈ e masanil.
19 Palta ayic sco molbꞌan co bꞌa dꞌa culto,
más vachꞌ a e tiꞌ svalaꞌ yic tzex in cꞌaybꞌej.
Yujto vachꞌchom oyeꞌn̈ej bꞌelan̈ lolonel sval dꞌayex dꞌa e tiꞌ chiꞌ,
palta ecꞌal yopisio dꞌa yichan̈ lajun̈eoc mil lolonel max nachajel eyuuj.
20 Ex vucꞌtac ex vanabꞌ,
man̈ ichoc ebꞌ unin tzeyutej e bꞌa e naan juntzan̈ tic.
Axo e bꞌeybꞌal,
ichaocabꞌ yic ebꞌ nenetac unin,
icha chiꞌ tzeyutej,
yujto max saylaj chucal ebꞌ,
ichocabꞌ ta tzeyutej e bꞌa.
Tecꞌan val tzeyutej e pensar,
yujto man̈ ex uninoc.
21 A dꞌa sley Dios,
tzꞌibꞌyajcan icha tic:
A in tic ol in lolon dꞌa jun chon̈abꞌ tic dꞌa juntzan̈ chꞌocchꞌoc tial yedꞌ dꞌa stiꞌ ebꞌ chꞌocchꞌoc chon̈abꞌil.
Palta an̈ejaꞌ man̈ ol yacꞌoch spensar ebꞌ dꞌayin,
xchi Dios Cajal.
22 Yuj chiꞌ,
a juntzan̈ chꞌocchꞌoc tial tzꞌalji,
chꞌoxnabꞌil yajcan dꞌa ebꞌ man̈ creyenteoc,
man̈oc dꞌa ebꞌ creyente.
Palta ayic tzꞌaljiel slolonel Dios,
yic ebꞌ creyente yaji,
man̈oc ebꞌ man̈ creyenteoc ay yicoꞌ.
23 Qꞌuinaloc tze molbꞌej e bꞌa e masanil a ex creyente ex taꞌ,
mato a ex masanil ex tzex lolon dꞌa juntzan̈ chꞌocchꞌoc tiꞌal,
tato scꞌoch junoc man̈ creyenteoc,
mato man̈ yojtacoc tas yaj jun quic tic,
tecan syal icha tic:
Ichato ay tas scot dꞌa sjolom ebꞌ,
xchama.
24 Palta qꞌuinaloc van eyalanel slolonel Dios e masanil,
ayic scꞌoch junoc man̈ creyenteoc,
vachꞌchom man̈ yojtacoc tas yaj jun quic tic,
snachajel yuuj to ay smul.
Sbꞌeycꞌolej sbꞌa ayic syabꞌan tas tzeyal junjun ex.
25 Ichato chiꞌ scheclajeli tas ay dꞌa spensar.
Yuj chiꞌ,
tzꞌem cuman,
syalan sbꞌa dꞌa Dios.
Axom syalani:
Yel toni,
ay val och Dios eyedꞌoc,
xchama.
Vachꞌocabꞌ scutej co cꞌulan masanil tasi
26 Yuj chiꞌ ex vucꞌtac ex vanabꞌ,
ol valbꞌat dꞌayex tas yovalil tzeyutej e bꞌa taꞌ ayic tze molbꞌan e bꞌa.
Ay ex tzex bꞌitani,
ayex tzeyacꞌ junoc cꞌaybꞌubꞌal,
ayex tzeyaleli tas syacꞌ Dios dꞌayex,
ayex tzex lolon dꞌa junoc chꞌoc tial,
ayex pax tzeyalaꞌ tas syalelcꞌoch jun tzeyal chiꞌ.
A masanil tas tze cꞌulej chiꞌ,
cꞌulejec yic tzex tecꞌcꞌaj e masanil.
27 Tato ayex tzex lolon dꞌa juntzan̈ chꞌocchꞌoc tial,
chavan̈ ma oxvan̈exn̈ej tzex loloni.
Junjunal tzeyal eyicoꞌ.
An̈ejtonaꞌ yovalil ay junoc ex tzeyalaꞌ tas syalelcꞌochi.
28 Tato malaj mach syal yalani tas syalelcꞌoch jun chiꞌ,
más vachꞌ max ex lolonlaj dꞌa juntzan̈ chꞌocchꞌoc tial bꞌaj tze molbꞌej e bꞌa chiꞌ.
Más vachꞌ munil tzex lesalvi dꞌa Dios e chꞌocoj.
29 An̈ejtonaꞌ,
tato ayex tzeyalel slolonel Dios,
chavaan̈ ma oxvan̈exn̈ej tzeyaleli.
A exxo e masanil,
tzeyacꞌ val och e chiquin dꞌa tas tzꞌalji dꞌayex,
yic snachajel eyuuj.
30 Qꞌuinaloc tato ay junoc ex van eyalanel slolonel Dios dꞌa e cal chiꞌ.
Palta tato ay junocxo tzꞌacꞌji yal junocxo tas yuj Dios,
yovalil tzex och vaan eyalan eyic chiꞌ,
syalan yic junxo chiꞌ.
31 Tato icha chiꞌ,
a jantac ex tzꞌacꞌji eyalel slolonel Dios,
junjunal syal eyalan eyicoꞌ,
yic vachꞌ tzeyicꞌ e cꞌaybꞌubꞌal e masanil,
tzeyicꞌan pax e tecꞌanil.
32 Mach ex tzꞌacꞌji eyalel slolonel Dios,
tzeyil val e bꞌa,
yic junjunal tzeyal eyicoꞌ.
33 Tato ton̈ej tzon̈ qꞌue somnaj calani,
man̈oc dꞌa Dios scot jun chiꞌ,
yujto a Dios chiꞌ sgana to a dꞌa stzolal tzon̈ loloni.
A syutej sbꞌa ebꞌ creyente dꞌa junjun iglesia to a ebꞌ ix ix numan tzꞌaj ebꞌ ix.
34 An̈ejtonaꞌ,
icha chiꞌ dꞌayex,
yovalil numan tzꞌaj ebꞌ ix ix bꞌaj tze molbꞌej e bꞌa,
yujto malaj spermiso ebꞌ ix slolon dꞌa culto.
Scꞌanabꞌajejocabꞌ ebꞌ ix,
yujto icha chiꞌ syal sley Dios.
35 Tato ay junoc ebꞌ ix sgana scꞌanbꞌan junoc tas,
yovalil a dꞌa vin̈ yetbꞌeyum ix scꞌanbꞌej yabꞌi ayic scꞌochxi ebꞌ dꞌa spat.
Yujto man̈ smojoc slolon ebꞌ ix dꞌa culto chiꞌ.
36 Yovalil tze nacoti to man̈oc dꞌayex ix bꞌabꞌlaj acꞌji slolonel Dios chiꞌ.
An̈ejtonaꞌ,
man̈ e chꞌocojoc ix e cha slolonel Dios chiꞌ.
37 Tato ayex tze naꞌa to ay eyopisio eyalanel slolonel Dios,
mato tze naꞌa to a Yespíritu Dios smunlaj dꞌayex,
nachajocabꞌel eyuuj to schecnabꞌil Cajal Jesús yaj juntzan̈ tzin tzꞌibꞌejbꞌat tic dꞌayex.
38 Tato ay ebꞌ malaj yelcꞌoch juntzan̈ checnabꞌil tic dꞌa sat,
an̈ejtonaꞌ malajocabꞌ pax yelcꞌoch ebꞌ dꞌayex.