Sco xajanej co bꞌa
13
Qꞌuinaloc tato te jelan on̈ calan juntzan̈ tiꞌ tzꞌalchaj dꞌa yolyibꞌan̈qꞌuinal tic yedꞌ calan pax stiꞌ ebꞌ ángel,
palta tato max co xajanej co bꞌa,
lajan quelcꞌoch icha junoc tan̈bꞌil,
mato icha juntzan̈ pachquiltac son ton̈ej stzin̈iljubꞌi.
2 Vachꞌchom acꞌbꞌil copisio calanel slolonel Dios,
vachꞌchom snachajel masanil tas mantalaj mach ojtannac cuuj,
taxon̈ej cojtac masanil tas dꞌa yolyibꞌan̈qꞌuinal tic,
vachꞌchom scacꞌ val och Dios dꞌa co cꞌool,
yic syal quicꞌanel junoc vitz dꞌa yedꞌtal,
palta tato max co xajanej co bꞌa,
te malaj jabꞌoc quelcꞌochi.
3 Vachꞌchom sco siej masanil tas ay dꞌayon̈ dꞌa ebꞌ mebꞌaꞌ,
mato scacꞌoch co bꞌa dꞌa yol scꞌabꞌ chamel yic stzꞌabꞌat co nivanil tic,
palta tato max co xajanej co bꞌa,
nabꞌan̈ej squixtej co bꞌa,
malaj jabꞌoc spac ol co chaꞌa.
4 Ol valaꞌ tas scutej co bꞌa,
tato yel sco xajanej co bꞌa:
Te nivan scutej co cꞌool dꞌa ebꞌ quetanimail,
sco chꞌoxan pax co vachꞌcꞌolal dꞌa ebꞌ.
Max quiloch co cꞌool dꞌa junocxo.
Malaj bꞌaj squicꞌchaan̈ co bꞌa,
malaj pax bꞌaj scacꞌ acꞌumtaquil.
5 Tato yel sco xajanej co bꞌa,
malaj bꞌaj scacꞌ qꞌuixvelal junocxo mach.
Co gana man̈oc on̈n̈ej ay calan quicoꞌ.
Man̈ utzinoc scutej co cꞌool.
Malaj bꞌaj sco na tas scutej co pacan co bꞌa dꞌa ebꞌ quetanimail.
6 Max on̈ tzalaj yuj junoc chucal scꞌulej junoc anima.
An̈ej val juntzan̈ yel tzon̈ tzalaj yedꞌoc.
7 Tato yel sco xajanej co bꞌa,
scacꞌ techaj masanil tasi,
scacꞌoch dꞌa co cꞌool to vachꞌn̈ej scꞌulej ebꞌ quetanimail,
scacꞌn̈ejoch ebꞌ yipoc co cꞌool.
Yaln̈ej tas junoc sja dꞌa quibꞌan̈,
tecꞌann̈ej scutej co bꞌa.
8 A jun bꞌaj sco xajanej co bꞌa tic,
malaj bꞌaqꞌuin̈ ol lajvoc.
Ay jun tiempoal ol javoc,
man̈xo yovaliloc ay mach tzꞌacꞌji yopisio yuj Dios yalanel slolonel.
A dꞌa jun tiempoal chiꞌ,
man̈xo yovaliloc ay mach slolon dꞌa juntzan̈ chꞌocchꞌoc tial.
An̈ejtonaꞌ,
man̈xa yopisio co jelanil tic taꞌ.
9 A ticnaic manto tzꞌacanoc co jelanil.
An̈ejtonaꞌ,
manto tzꞌacanoc scutej calanel slolonel Dios.
10 Palta ayic ol tzꞌacvoc smasanil,
ato taꞌ ol lajvoc yopisio masanil juntzan̈ man̈ tzꞌacanoc sco cꞌulej tic.
11 A in tic,
ayic unin in,
in lolon icha slolon ebꞌ cotac unin.
In nanac juntzan̈ tas icha sna ebꞌ unin chiꞌ,
yujto lajan in pensar yedꞌ ebꞌ.
Axo ticnaic,
icham vinac inxo,
yuj chiꞌ vactejnaccan in bꞌeybꞌal yic vuninal chiꞌ.
Icha vaji ayic unin in chiꞌ,
icha chiꞌ caj co masanil,
12 yujto a ticnaic,
maxto nachajel val yic Dios cuuj.
Ichato van quilan juntzan̈ tas dꞌa junoc nen tzaxo moymon quilani.
Palta a dꞌa jun tiempoal ayic ol tzꞌacvoc masanil tas chiꞌ,
sicꞌlabꞌil ol quil masanil.
A ticnaic,
manto tzꞌacvilaj cojtacanel yic Dios,
palta a dꞌa jun tiempoal chiꞌ,
ol cojtaquejeli.
Icha ix aj on̈ yojtacanel Dios ticnaic,
icha chiꞌ ol aj cojtacanel smasanil taꞌ.
13 A ticnaic,
scacꞌoch Dios dꞌa co cꞌool,
scacꞌanpax och yipoc co cꞌool.
Sco xajanej Dios yedꞌ ebꞌ quetanimail.
A oxeꞌ sco cꞌulej tic,
ay yopisio dꞌa masanil tiempo.
Palta ay junxo ecꞌal dꞌa yichan̈ chabꞌ tic,
aton co xajanan Dios yedꞌ ebꞌ quetanimail.