A tas tzꞌacꞌji co cꞌulej yuj Yespíritu Dios
12
Ex vucꞌtac ex vanabꞌ,
in gana snachajel eyuuj tastac juntzan̈ opisio syacꞌ Yespíritu Dios dꞌayon̈ junjun on̈.
2 Eyojtacxo to ayic manto ex och creyenteal,
ix ex icꞌjibꞌat dꞌa juntzan̈ ix eyaloch e diosaloc.
Tzex bꞌat tic,
tzex bꞌat tic e sayan ecꞌ juntzan̈ max yal-laj slolon chiꞌ.
3 Yuj chiꞌ,
in gana tzeyojtaquejel juntzan̈xo tic.
Tato ay junoc mach tzꞌalani:
Cotocabꞌ yoval scꞌool Dios dꞌa yibꞌan̈ Jesús,
tato xchi,
a jun chiꞌ,
man̈ ayoc och Yespíritu Dios yedꞌoc syalani.
Tato ay junoc mach tzꞌalani:
A Jesús,
Vajal,
tato xchi,
axon̈ej yuj Yespíritu Dios syal yalan icha chiꞌ.
4 A on̈ tic,
chꞌocchꞌoc copisio sco cha junjun on̈,
palta junn̈ej mach tzꞌacꞌan dꞌayon̈,
aton Yespíritu Dios.
5 Chꞌocchꞌoc scutej cacꞌan servil junjun on̈,
palta junn̈ej mach scacꞌ servil co masanil,
aton Cajal Jesús.
6 An̈ejtonaꞌ,
chꞌocchꞌoc co munlajel junjun on̈,
palta junn̈ej Dios van smunlaj quedꞌ co masanil.
7 A tzꞌacꞌan junoc opisio dꞌayon̈ junjun on̈,
yic schꞌoxani to ayoch Yespíritu chiꞌ quedꞌoc,
yic co vachꞌiloc co masanil.
8 Yuj Yespíritu tic,
ay ebꞌ tzꞌacꞌji yal sjelanil Dios,
ay pax ebꞌ snachajel yuj scꞌaybꞌani.
9 Yuj Yespíritu tic,
ay pax ebꞌ svachꞌ aqꞌuejoch Dios dꞌa scꞌool.
Yuuj paxi,
ay ebꞌ tzꞌacꞌji spoder yacꞌanxi bꞌoxoc scꞌool ebꞌ penaay.
10 Ay ebꞌ tzꞌacꞌji spoder schꞌoxanel juntzan̈ milagro yuuj.
Ay pax ebꞌ tzꞌacꞌji yalel slolonel Dios yuuj.
Yuj Yespíritu tic,
ay ebꞌ tzꞌacꞌji yojtaquejeli tato aꞌ ayoch yedꞌ junoc mach,
mato a junoc enemigo ayoch yedꞌoc.
Yuuj ay pax ebꞌ tzꞌacꞌji lolon dꞌa juntzan̈ chꞌocchꞌoc tial.
Ay pax juntzan̈xo ebꞌ tzꞌacꞌji alanel tas syalelcꞌoch jun syal ebꞌ chiꞌ.
11 Tzijtum val juntzan̈ tas tzꞌacꞌji co cꞌulej,
palta junn̈ej Espíritu tzꞌacꞌan co cꞌulej.
Chꞌocchꞌoc tas syacꞌ co cꞌulej junjun on̈,
ato syalaꞌ tas sgana dꞌayon̈.
Ichato junn̈ej nivanil caj co masanil
12 A jun co nivanil tic,
vachꞌchom tzijtum macan̈il yaji,
palta junn̈ej.
Icha juntzan̈ tas ayoch dꞌa co nivanil tic,
icha chiꞌ cajoch dꞌa Cristo.
Ichato snivanil Cristo caj co masanil.
13 Yujto co masanil,
vachꞌchom israel on̈,
mato maay,
palta junn̈ej caj co masanil.
Vachꞌchom ayon̈ och checabꞌoc dꞌa junoc anima,
ma quic co bꞌa co chꞌocoj,
palta junn̈ej caji.
Yujto ayic ix on̈ acꞌji bautizar,
junn̈ej ix on̈ ajcan yedꞌ Cristo.
Yujn̈ej Yespíritu Dios,
ichato junn̈ej nivanil caji,
yujto a ochnaccan dꞌayon̈ co masanil.
14 Ilecnabꞌ co nivanil tic.
Tzijtum macan̈il yaji,
man̈ junocn̈ej.
15 Qꞌuinaloc a voc tzꞌalan ticnaic:
A in tic,
man̈ in cꞌabꞌoc,
yuj chiꞌ malaj voch dꞌa jun nivanil tic,
tato xchi.
Vachꞌchom syal icha chiꞌ,
palta an̈ejaꞌ yic jun in nivanil tic.
16 Ma tato a jun in chiquin tic tzꞌalan ticnaic:
A in tic,
man̈ in yol satoc,
yuj chiꞌ man̈ in yicoc jun nivanil tic,
tato xchi.
Vachꞌchom syal icha chiꞌ,
palta an̈ejaꞌ yic jun in nivanil tic.
17 Qꞌuinaloc a jun in nivanil tic,
nabꞌa yol satn̈ej yaji,
tato icha chiꞌ,
¿tas svutej vabꞌani?
Qꞌuinaloc nabꞌa chiquinn̈ej yaji,
tato icha chiꞌ,
¿tas pax svutej in sucꞌlan junoc tasi?
18 Palta a Dios ix bꞌoan junjun tas dꞌa co nivanil tic icha sgana.
19 Qꞌuinaloc a jun co nivanil tic,
junn̈ej tas ay dꞌay,
tato icha chiꞌ,
man̈ nivaniloc.
20 Cojtac to tzijtum macan̈il yaj co nivanil tic,
palta junn̈ej yaji.
21 A yol co sat,
max yal-laj yalan dꞌa co cꞌabꞌ to malaj yopisio yuuj.
An̈ejtonaꞌ co jolom,
max yal-laj yalan dꞌa coc to malaj yopisio yuuj.
22 Ay juntzan̈ yetbꞌeyum co nivanil tic,
ichato malaj yopisio,
palta aton juntzan̈ tic más ay yopisio cuuj.
23 Yedꞌ pax juntzan̈ yetbꞌeyum co nivanil tic,
ichato malaj yelcꞌochi,
palta aton val juntzan̈ chiꞌ más ay yelcꞌoch dꞌayon̈.
A juntzan̈ man̈ smojoc yilji,
aꞌ scacꞌoch spichul.
Icha chiꞌ scutej co chꞌoxani to ay yelcꞌoch dꞌayon̈.
24 Axo juntzan̈ tas vachꞌ yilji,
man̈ yovaliloc scacꞌoch spichul.
Icha chiꞌ ix yutej Dios sbꞌoan co nivanil tic,
sec yuj chiꞌ a juntzan̈ malaj yelcꞌochi,
a juntzan̈ chiꞌ nivan yelcꞌoch dꞌayon̈.
25 Yuj chiꞌ max yal-laj spojan sbꞌa co nivanil tic,
yujto scol-laj sbꞌa junjun macan̈.
26 Qꞌuinaloc ay junoc syabꞌ syail,
an̈ejaꞌ syabꞌ pax syail smasanil yedꞌoc.
Tato ay pax junoc stzalaji,
stzalaj smasanil yedꞌoc.
27 Yuj chiꞌ a on̈ tic,
ichato snivanil Cristo caji.
Icha junjun macan̈ ay dꞌa snivanil chiꞌ,
icha chiꞌ cajoch co masanil dꞌay.
28 Yuj chiꞌ ay on̈ ix yacꞌ copisio Dios dꞌa yiglesia.
Dꞌa sbꞌabꞌelal,
schecabꞌ Cristo caji.
Schabꞌil,
tzꞌacꞌji copisio calanel slolonel Dios.
Yoxil,
ay on̈ cꞌaybꞌum on̈.
An̈ejtonaꞌ,
ay on̈ sco chꞌoxel milagro.
Ay on̈ syal cacꞌan bꞌoxoc scꞌool ebꞌ penaay.
Ay on̈ syal tzon̈ colvaji.
Ay on̈ tzon̈ cachvaji.
Ay on̈ pax tzon̈ lolon dꞌa juntzan̈xo chꞌoc tial.
29 Palta man̈ on̈ schecabꞌoc Cristo co masanil.
Man̈ co masaniloc tzꞌacꞌji copisio calanel slolonel Dios.
Man̈ on̈ cꞌaybꞌumoc co masanil.
Max yal-laj co chꞌoxan milagro co masanil.
30 Man̈ co masaniloc syal cacꞌan bꞌoxoc scꞌool ebꞌ penaay.
Man̈ co masaniloc syal tzon̈ lolon dꞌa juntzan̈ chꞌocchꞌoc tial.
An̈ejtonaꞌ,
man̈ co masaniloc syal calani tas syalelcꞌoch juntzan̈ chꞌocchꞌoc tial chiꞌ.
31 Yuj chiꞌ,
tzeyacꞌ eyip e sayan juntzan̈ opisio más nivan yelcꞌoch syacꞌ Dios.
Palta ayto val junxo modo más vachꞌ ol val dꞌayex.