11
Yuj chiꞌ,
icha svutej in bꞌa in cꞌanabꞌajan tas yutejnac sbꞌa Cristo,
ichocabꞌ chiꞌ tzeyutej e bꞌa.
A tas smoj syutej sbꞌa ebꞌ ix ix dꞌa culto
2 Ex vucꞌtac ex vanabꞌ,
tzex val vachꞌil,
yujto masanil tiempo tzin e nacoti,
yujto van e cꞌanabꞌajan pax juntzan̈ cꞌaybꞌubꞌal valnaccan dꞌayex.
3 Palta in gana tzeyojtaquejeli to a Cristo Yajal yaj dꞌa junjun ebꞌ vin̈ vinac,
ichato sjolomal yaj dꞌa ebꞌ vin̈.
Axo vin̈ yetbꞌeyum junjun ebꞌ ix ix,
a vin̈ yajal yaj dꞌa ebꞌ ix,
icha yaj Dios,
yujto Aꞌ Yajal yaj dꞌa Cristo.
4 A junoc vin̈ vinac,
ayic slesalvi vin̈,
mato ayic syalanel slolonel Dios vin̈,
tato ayqꞌue junoc tas dꞌa sjolom vin̈,
syacꞌ qꞌuixvelal sjolom vin̈ chiꞌ.
5 Axo ebꞌ ix ix,
tato malaj jabꞌoc scꞌox ebꞌ ix ayqꞌuei,
ayic slesalvi ebꞌ ix,
mato ayic syalanel slolonel Dios ebꞌ ix,
syacꞌ qꞌuixvelal sjolom ebꞌ ix chiꞌ.*
Ichato joxbꞌilel sjolom ebꞌ ix chiꞌ.
6 Tato ay ebꞌ ix max yal scꞌool syacꞌqꞌue scꞌox,
vachꞌ joxchajocabꞌ el xil sjolom ebꞌ ix chiꞌ.
Axo tato sqꞌuixvi ebꞌ ix sjoxchajel xil sjolom chiꞌ,
yacꞌocabꞌ qꞌue scꞌox ebꞌ ix.
7 A on̈ vinac on̈,
man̈ smojoc scacꞌqꞌue co cꞌox,
yujto ichato yechel Dios caji,
sco chꞌoxanel svachꞌil.
Axo ebꞌ ix ix tzon̈ chꞌoxanel a on̈ vinac on̈ tic.
8 Yujto ayic sbꞌoannac jun vin̈ bꞌabꞌel vinac Dios,
man̈oc dꞌa ix ix elnaccot vin̈,
palta a ix ix chiꞌ,
a dꞌa vin̈ elnaccot ix.
9 A ix ix chiꞌ,
bꞌobꞌil ix yuj svachꞌil vin̈ vinac.
Man̈ yujoc svachꞌil ix bꞌobꞌil vin̈ vinac chiꞌ.
10 Yuj chiꞌ,
smoj syacꞌqꞌue scꞌox ebꞌ ix.
Icha chiꞌ tzꞌaj schꞌoxanel ebꞌ ix to ayoch ebꞌ ix dꞌa yalan̈ smandar vin̈ yetbꞌeyum.
Smoj ton icha chiꞌ syutej sbꞌa ebꞌ ix,
yujto qꞌuelanoch ebꞌ ángel dꞌayon̈.
11 Palta a dꞌa yichan̈ Cajal Jesús,
man̈ocn̈ejlaj vin̈ vinac ay yelcꞌochi,
man̈ocn̈ejpaxlaj ix ix ay yelcꞌochi.
12 Yel toni,
a dꞌa vin̈ vinac chiꞌ elnaccot ix bꞌabꞌel ix.
Axo ticnaic,
a dꞌa ebꞌ ix tzon̈ pitzvielta.
Palta co masanil a Dios bꞌojinac on̈.
13 A exxo,
naec vedꞌoc,
¿tom smoj slesalvi junoc ix ix dꞌa Dios ayic malaj scꞌox ix?
14 Ina yojtac anima smasanil,
tato a on̈ vinac on̈ tic nivac xil co jolom icha junoc ix ix,
tzon̈ qꞌuixvi.
15 Axo ebꞌ ix ix,
tato nivac xil sjolom ebꞌ ix,
vachꞌ yilji ebꞌ ix yuuj.
A yopisio xil sjolom ebꞌ ix chiꞌ,
a schꞌoxani to smoj syacꞌqꞌue scꞌox ebꞌ ix.
16 Tato ayex mach ex scot eyoval dꞌa jun cꞌaybꞌubꞌal tic,
yovalil snachajel eyuuj to a on̈ tic,
toxon max co cha junocxo chꞌoc bꞌeybꞌal.
An̈ejtonaꞌ,
icha pax chiꞌ yaj ebꞌ creyente dꞌa junjun yiglesia Dios,
max scha junocxo chꞌoc bꞌeybꞌal ebꞌ.
A ebꞌ man̈ vachꞌoc syutej sbꞌa dꞌa Santa Cena
17 Ay juntzan̈xo tas ol valbꞌat dꞌayex.
Palta maxto yal ex valan vachꞌil,
yujto ayex ayto e paltail.
Yujto ayic tze molbꞌan e bꞌa taꞌ,
malaj jabꞌoc svachꞌil tze chaꞌa.
Ton̈ej tzex juviel yuuj.
18 Yuj chiꞌ a jun tic ol in bꞌabꞌlaj alejbꞌat dꞌayex.
Svabꞌi to a bꞌaj tze molbꞌej e bꞌa dꞌa e culto,
man̈ lajanoc tas tze naꞌa.
Palta a tzꞌaj in naani to yel juntzan̈ svabꞌ chiꞌ.
19 Tecan yovalil ay pojlajbꞌail dꞌa e cal,
yic scheclajelta mach ebꞌ nivan yelcꞌoch dꞌa e cal chiꞌ.
20 Yuj chiꞌ,
ayic tze molbꞌan e bꞌa,
man̈ yicoc Cajal Jesús jun cena tze va chiꞌ.*
21 Yujto ayic van scꞌoch yorail jun cena chiꞌ,
ton̈ej tze comon yamejoch e vaan eyic dꞌa elan̈chamel junjun ex.
Yuj chiꞌ ayex maxtzac e cha eyicoꞌ,
ton̈ej ste och e vejel.
Ay ex pax tzex och ucꞌuman̈il yuuj.
22 ¿Tom malaj e pat junjun ex bꞌaj syal e vaꞌi,
tzeyucꞌan aꞌ?
¿Tom e gana tzeyacꞌ qꞌuixvelal junoc mach mebꞌaꞌ?
Ayic tze cꞌulan juntzan̈ chiꞌ,
tze patiquejel ebꞌ,
palta yiglesia pax Dios ebꞌ eyedꞌoc.
¿Tas tze naꞌa?
¿Tom ol yal valan e vachꞌil yuj juntzan̈ tze cꞌulej chiꞌ?
Maay,
max yal-laj.
A Santa Cena
23 A juntzan̈ cꞌaybꞌubꞌal yic cena valnaccan dꞌayex,
a Cajal Jesús acꞌjinaccan vojtaquejeli.
Aton juntzan̈ chiꞌ ol valxibꞌat dꞌayex:
Dꞌa jun acꞌval ix acꞌjioch Cajal Jesús chiꞌ dꞌa yol scꞌabꞌ ebꞌ ix milani.
Ayic manto yamchaji,
ix yicꞌanchaan̈ ixim pan.
24 Ix lajvi yacꞌan yuj diosal yuj ixim,
ix spojanbꞌat ixim pan chiꞌ.
Ix yalan dꞌa ebꞌ scꞌaybꞌum:
Vaan̈ec.
A jun tic,
aton in nivanil ol yabꞌ syail eyuuj.
Ayic tze cꞌulan jun tic,
tzin e nacoti,
xchi.
25 An̈ejtonaꞌ icha chiꞌ ix yutej yicꞌanchaan̈ jun vaso ayic ix lajvi sva ebꞌ,
ix yalan dꞌa ebꞌ:
A tas ay dꞌa yol jun vaso tic,
a schꞌoxan junxo strato Dios.
Yuj in chiqꞌuil,
ol elcꞌoch jun strato tic.
Ayic tzeyucꞌan jun tic dꞌa juntac el,
icha tic ol eyutoc,
yic ol in e nacoti,
xchi Jesucristo chiꞌ.*
26 A juntac el sco va jun pan tic,
ayic scucꞌlabꞌan pax jun vaso tic,
syalelcꞌochi to van calanxiel schamel Cajal Jesús.
Ichan̈ej chiꞌ ol co cꞌuloc masanto ol jaxoc.
A tas scutej co bꞌa dꞌa Santa Cena
27 Yuj chiꞌ,
tato ay mach malaj yelcꞌoch dꞌay ayic svaan jun pan tic,
ayic syucꞌlabꞌan pax jun vaso tic,
tzꞌoch smul dꞌa snivanil Cajal Jesús yedꞌ dꞌa schiqꞌuil.
28 Yuj chiꞌ,
yovalil sco cham naej junjun on̈ tas caji,
ayic mantzac co va jun pan tic yedꞌ yic scucꞌlabꞌan jun vaso tic.
29 Yujto ayic sco vaani,
scucꞌani,
tato max cham val co naan snivanil Cajal Jesús,
squicꞌcot yaelal dꞌa quibꞌan̈.
30 Yuj juntzan̈ tic,
tzijtum ebꞌ spenaayax dꞌa e cal,
ay ebꞌ tzꞌontac,
ay pax ebꞌ schami.
31 Palta tato sco chꞌolbꞌitej tas caj junjun on̈,
a Cajal Jesús man̈xo yovaliloc tzon̈ schꞌolbꞌitej.
32 Ayic tzon̈ schꞌolbꞌitan Cajal Jesús chiꞌ,
syacꞌoch co yaelal,
yic vachꞌ max on̈ bꞌatcan dꞌa junxo nivan yaelal yedꞌ ebꞌ yic yolyibꞌan̈qꞌuinal tic.
33 Yuj chiꞌ,
ex vucꞌtac ex vanabꞌ,
ayic tze molbꞌan e bꞌa yuj jun cena tic,
slaj e tan̈vej e bꞌa,
yic molann̈ej tzex va e masanil.
34 Tato ayex mach ex ay e vejel,
yovalil tzex cham vacan dꞌa e pat,
yic icha chiꞌ vachꞌ ol eyutoc e bꞌa ayic tze molbꞌan e bꞌa taꞌ.
Axo Dios,
man̈ ol yacꞌcotlaj eyaelal.
Axo juntzan̈xo tas tzato yacꞌ palta dꞌayex,
ol to in bꞌo yaji ayic ol in cꞌoch dꞌayex taꞌ.