Max yal calan co bꞌa dꞌa juntzan̈ comon dios
10
Ex vucꞌtac ex vanabꞌ,
in gana tzeyojtaquejeli,
tas ajnac ebꞌ co mam quicham dꞌa pecaꞌ ayic yochnac tzacꞌan ebꞌ yuj vin̈aj Moisés.
Ecꞌnac ebꞌ smasanil dꞌa yalan̈ jun asun,
cꞌaxpajnac pax ecꞌ ebꞌ smasanil dꞌa aꞌ Chacchac Mar.
2 Ichato acꞌjinac bautizar ebꞌ yuj jun asun chiꞌ yedꞌ pax dꞌa aꞌ mar chiꞌ.
Ichato acꞌjinac och ebꞌ yicoc vin̈aj Moisés dꞌa jun tiempoal chiꞌ.
3 Jun lajan svanac ebꞌ jun tas yacꞌnaccot Dios dꞌa satchaan̈.
4 An̈ejtonaꞌ,
masanil ebꞌ ucꞌannac pax jun a aꞌ yacꞌnaccot Dios,
aton jun aꞌ elnaccot dꞌa sat jun qꞌuen tenam.
A jun qꞌuen tenam chiꞌ,
schꞌoxnabꞌil Cristo yaj qꞌueen.
5 Vachꞌchom icha chiꞌ ajnac ebꞌ,
palta an̈ejaꞌ tzijtum ebꞌ malaj svachꞌil spensar dꞌa yichan̈ Dios.
Yuj chiꞌ,
sacleminac ajnaccanbꞌat snivanil ebꞌ dꞌa jun taquin̈ luum bꞌaj ecꞌnac ebꞌ chiꞌ.
6 A juntzan̈ tas janac dꞌa yibꞌan̈ ebꞌ chiꞌ,
chꞌoxnabꞌil yaj dꞌayon̈ yic max co nibꞌejoch juntzan̈ chucal icha yutejnac ebꞌ snibꞌanochi.
7 Yuj chiꞌ,
max yal calan co bꞌa dꞌa juntzan̈ comon dios,
icha yutejnac sbꞌa juntzan̈ ebꞌ dꞌa scal ebꞌ chiꞌ.
A Slolonel Dios Tzꞌibꞌabꞌilcani,
a tzꞌalan yuj ebꞌ icha tic:
Ix em cꞌojjabꞌ ebꞌ chon̈abꞌ smasanil,
ix va ebꞌ,
ix yucꞌan aꞌ ebꞌ.
Ix lajvi chiꞌ,
ix qꞌue bꞌulnaj ebꞌ schan̈alvi yedꞌ scꞌulan chucal dꞌa yichan̈ sdiosal chiꞌ,
xchicani.
8 Max yal quem dꞌa ajmulal.
Yujto icha chiꞌ yutejnac sbꞌa juntzan̈ ebꞌ dꞌa scal ebꞌ chiꞌ.
Yuj jun chiꞌ,
23 mil ebꞌ chamnac dꞌa jun cꞌu.
9 Max yal cacꞌan proval Cajal Jesús yic squilaꞌ tato syacꞌ nivancꞌolal.
Yujto icha chiꞌ yutejnac sbꞌa juntzan̈ ebꞌ dꞌa scal ebꞌ chiꞌ,
yuj chiꞌ lajvinac el ebꞌ yuj juntzan̈ nocꞌ chan.
10 Max yal calan specal Cajal Jesús chiꞌ.
Yujto ay ebꞌ aljinac specal,
yuj chiꞌ lajvinac el ebꞌ yuj jun ángel ay yopisio smilancham anima.
11 Masanil juntzan̈ tas janac dꞌa yibꞌan̈ ebꞌ co mam quicham chiꞌ,
chꞌoxnabꞌil yaj dꞌayon̈.
Tzꞌibꞌabꞌilcan juntzan̈ chiꞌ dꞌa Slolonel Dios yic scojtaquejeli to ay smay yoch co mul,
yujto a on̈ tic,
ay on̈xo ecꞌ dꞌa slajvubꞌ tiempoal.
12 Yuj chiꞌ,
a mach snaani to te tecꞌanxo,
yovalil syil val sbꞌa,
yujto ay smay sjuvieli.
13 Jantacn̈ej juntzan̈ proval sja dꞌa quibꞌan̈,
lajann̈ej yedꞌ juntzan̈ sja dꞌa yibꞌan̈ ebꞌ anima smasanil.
Palta a Dios tzꞌeln̈ejcꞌoch tas syalaꞌ.
Max scha on̈ yacꞌ proval junoc tas max techaj cuuj.
Ayic sja junjun proval chiꞌ,
a tzꞌacꞌan tas scutej co colan co bꞌa dꞌay,
yic vachꞌ stechaj cuuj.
14 Yuj chiꞌ,
ex xajanabꞌil vuuj,
man̈ eyal e bꞌa dꞌa juntzan̈ comon dios.
15 Svalbꞌat juntzan̈ tic dꞌayex,
yujto jelan exxo.
Tze cham naej val sicꞌlabꞌil tato yel svalaꞌ.
16 A jun vaso yic Cajal Jesús,
jun scacꞌ yuj diosal yuuj,
a schꞌoxani to ay calan quic yedꞌ schiqꞌuil Cristo.
An̈ejtonaꞌ jun pan spucjiecꞌ dꞌa co cal,
a schꞌoxan paxi to ay calan quic dꞌa snivanil.
17 Vachꞌchom tzijtum on̈,
junn̈ej pan sco va co masanil.
Yuj chiꞌ,
icha jun pan junn̈ej chiꞌ,
junn̈ej pax nivanil tzon̈ aj co masanil,
vachꞌchom tzijtum on̈.
18 Tze na jabꞌoc vedꞌoc tas yutejnac sbꞌa ebꞌ vetisraelal.
A ebꞌ schiꞌan juntzan̈ silabꞌ sn̈usji dꞌa yibꞌan̈ altar,
ay yalan yic ebꞌ yedꞌ Dios,
yujto aꞌ ay yic jun altar chiꞌ.
19 Mantoc svalaꞌ to ay yelcꞌoch juntzan̈ comon dios.
An̈ejtonaꞌ pax juntzan̈ tas tzꞌacꞌji silabꞌil dꞌay,
man̈ toc svalaꞌ to ay yelcꞌochi.
20 Palta a jun sval tic,
aton yic syacꞌan juntzan̈ silabꞌ chiꞌ ebꞌ man̈ israeloc,
man̈oc dꞌa Dios syacꞌ ebꞌ.
A dꞌa ebꞌ enemigo,
ataꞌ syacꞌ juntzan̈ silabꞌ chiꞌ ebꞌ.
Palta malaj in gana ay eyalan eyic yedꞌ ebꞌ enemigo chiꞌ.
21 Max yal co comon ucꞌlabꞌan jun vaso yic Cajal Jesús,
slajvi chiꞌ scucꞌlabꞌanxi jun yic ebꞌ enemigo chiꞌ.
An̈ejtonaꞌ,
max yal co comon vaan jun pan tzꞌacꞌji dꞌayon̈ dꞌa smexa Cajal Jesús,
slajvi chiꞌ sco vaan juntzan̈ tas tzꞌacꞌji dꞌa smexa ebꞌ enemigo chiꞌ.
22 ¿Tom co gana sco tzuntzejcot yoval scꞌool Cajal Jesús chiꞌ dꞌa quibꞌan̈?
¿Tom a e naani to ecꞌal co poder dꞌa yichan̈?
Max yal cacꞌan ixtaxel spensar junocxo
23 Tecan ayex tzeyal icha tic:
Libre co cꞌulan masanil tasi.
Yel toni,
palta man̈ smojoc sco cꞌulej smasanil.
Yel toni,
syaln̈ej co cꞌulan juntzan̈ chiꞌ smasanil,
palta man̈ masaniloc juntzan̈ chiꞌ tzꞌacꞌan co tecꞌanil.
24 Junjun on̈,
max yal cacꞌan co gana dꞌa yol quicoꞌ.
Yovalil sco say tas scutej cacꞌan stecꞌanil juntzan̈xo ebꞌ.
25 Axo ticnaic,
yaln̈ej tas chibꞌejal schon̈ji bꞌaj schon̈ji nocꞌ chibꞌej,
syaln̈ej e manan nocꞌ e chiꞌa.
Man̈ e cꞌanbꞌej bꞌaj scot nocꞌ,
yic vachꞌ axo jun tzꞌacꞌan mandar e pensar,
max ixtax el yuuj.
26 Yujto a yolyibꞌan̈qꞌuinal tic yedꞌ masanil tas ay dꞌay,
yicn̈ej Cajal Jesús yaj smasanil.
27 Qꞌuinaloc ay ebꞌ man̈ creyenteoc tzex avtanbꞌat vael dꞌa spat.
Tato e gana tzex bꞌati,
syaln̈ej e chiꞌan masanil tas syacꞌ ebꞌ dꞌayex.
Man̈ e cꞌanbꞌej dꞌa ebꞌ bꞌaj ix cot juntzan̈ syacꞌ ebꞌ chiꞌ dꞌayex,
yic vachꞌ axo jun tzꞌacꞌan mandar e pensar,
max juviel yuuj.
28 Palta tato ay junoc mach tzꞌalan dꞌayex:
A jun chibꞌej syacꞌ vin̈ tic,
ix acꞌji silabꞌil dꞌa juntzan̈ comon dios,
ta xchi dꞌayex,
man̈ e chiꞌa.
Yujto a jun tzꞌalan dꞌayex chiꞌ,
ay smay,
talaj sjuviel jun tzꞌacꞌan mandar spensar eyuuj.
29 Svalbꞌat juntzan̈ tic dꞌayex,
yic man̈ eyuujoc sjuviel spensar ebꞌ mantalaj stecꞌanil.
Man̈ yujoc jun tzꞌacꞌan mandar e pensar chiꞌ,
svalbꞌat juntzan̈ tic dꞌayex.
Palta tecan ayex tzeyal icha tic:
A on̈ tic syaln̈ej co chiꞌan masanil tasi.
Yuj chiꞌ,
¿tas yuj tzon̈ yalubꞌtan̈ej juntzan̈xo ebꞌ xiv schiꞌan nocꞌ chibꞌej chiꞌ?
30 Tato scacꞌ yuj diosal dꞌa Dios yuj nocꞌ chibꞌej chiꞌ,
sco chiꞌan nocꞌ,
malaj mach syal yalan chucal dꞌa co patic,
tecan xe chi.
Tecan ayex icha chiꞌ tze na ticnaic.
31 Palta svalbꞌat dꞌayex,
vachꞌchom tzon̈ vaꞌi,
ma scuqꞌuej junoc tasi,
yaln̈ejocabꞌ tas sco cꞌulej,
co cꞌulejocabꞌi yic squicꞌanchaan̈ Dios.
32 Vachꞌchom ebꞌ israel,
ma ebꞌ man̈ israeloc,
max yal cacꞌan juvoquel spensar ebꞌ.
An̈ejtonaꞌ ebꞌ yiglesia Dios,
max yal cacꞌan juvoquel spensar ebꞌ.
33 A inxo tic,
yuj jantacn̈ej tas tzin cꞌulej,
svacꞌlej vacꞌan stzalajcꞌolal ebꞌ anima smasanil.
Man̈toc munil tzin sayecꞌ in vachꞌil dꞌa yol vicoꞌ,
palta tzin say yic juntzan̈xo anima,
yic vachꞌ ta icha chiꞌ ol colchajel ebꞌ.