A tas smoj schaan ebꞌ schecabꞌ Jesucristo
9
A in tic,
val yel schecabꞌ in Jesucristo.
Vilnac Cajal Jesús chiꞌ,
yuj chiꞌ ay val valan vic icha ebꞌ schecabꞌ smasanil.
A exxo,
ochnac ex creyenteal yuj in munlajel dꞌa yic Cajal Jesús.
2 Vachꞌchom ay ebꞌ tzꞌalani to man̈ in schecabꞌoc Cristo,
palta a ex tic eyojtac to schecabꞌ vaji.
Chꞌoxnabꞌil eyaji to schecabꞌ in,
yujto vuuj eyacꞌnacoch Cajal Jesús chiꞌ dꞌa e cꞌool.
3 Ay ebꞌ tzꞌalan chucal dꞌa in patictac.
Palta icha tic svutej valanxi spac dꞌa ebꞌ.
4 A in tic,
ay valan vic in chaan tas tzin va yedꞌ tas svuqꞌuej.
5 Qꞌuinaloc ay junoc ix canabꞌ svicꞌlaj in bꞌa yedꞌoc ticnaic,
ay valan vic vicꞌan bꞌeyecꞌ ix vedꞌoc.
Yujto icha chiꞌ syutej sbꞌa vin̈aj Pedro yedꞌ juntzan̈xo ebꞌ schecabꞌ Cajal Jesús yedꞌ pax ebꞌ yucꞌtac Cajal Jesús chiꞌ.
6 ¿Tom max yal vactancan in munlajel yedꞌ vin̈aj Bernabé tic tze naꞌa?
¿Tom an̈ej juntzan̈xo ebꞌ schecabꞌ chiꞌ ay yalan yic e naani?
7 Ina ebꞌ soldado,
¿tom ay ebꞌ an̈ejaꞌ sayan sgasto?
Yedꞌ ebꞌ tzꞌavan junoc tasi,
yovalil sva ebꞌ yeluli.
An̈ejtonaꞌ,
icha chiꞌ pax ebꞌ tan̈vum nocꞌ,
ay yalan yic ebꞌ yucꞌan yal yim nocꞌ.
8 Palta a juntzan̈ svalbꞌat tic dꞌayex,
man̈oclaj ebꞌ anima ay spensar.
A dꞌa ley Moisés,
ataꞌ yalnaccan juntzan̈ tic Dios.
9 An̈ejaꞌ dꞌa jun ley chiꞌ tzꞌibꞌabꞌilcan junxo tzꞌalan icha tic:
Man̈ eyacꞌoch spail stiꞌ nocꞌ vacax ayic stecꞌvi trigo nocꞌ,
xchi.
Man̈ocn̈ej yuj nocꞌ vacax chiꞌ yalnaccan juntzan̈ chiꞌ Dios,
10 palta cuuj paxi.
A jun ley chiꞌ tzꞌibꞌabꞌilcani,
yic snachajel cuuj.
Yujto a ebꞌ dꞌocum luum yedꞌ ebꞌ tecꞌum trigo,
ayic smunlaj ebꞌ,
syacꞌ val och ebꞌ yipoc scꞌool to ol sva ebꞌ yeluli.
Icha ebꞌ smunlaj chiꞌ,
icha chiꞌ caj pax a on̈ schecabꞌ on̈ Cristo tic.
11 Ayic quecꞌnac dꞌa e cal,
ichato ay tas ecꞌ cavejnaccan dꞌayex.
A jun chiꞌ,
yic Dios.
Yuj chiꞌ,
¿tom man̈ smojoc sco cha co gasto dꞌayex,
syalelcꞌochi aton stojol co munlajel chiꞌ?
12 Ay pax juntzan̈xo ebꞌ ay yalan yic schaan yic dꞌayex.
Yuj chiꞌ a on̈ tic,
yelxo val ecꞌal ay calan quic dꞌayex.
Vachꞌchom ay calan quic dꞌayex,
palta manta juneloc sco cꞌan co gasto dꞌayex.
Scacꞌ val techaj smasanil,
yic vachꞌ nivan yelcꞌoch yabꞌixal Cristo dꞌa bꞌajtac tzon̈ ecꞌ caleli.
13 Eyojtacxo,
a ebꞌ smunlaj dꞌa stemplo Dios,
a dꞌa spatic smunlajel ebꞌ chiꞌ scha tas svaꞌa.
Yujto a ebꞌ ay yopisio sn̈usantzꞌa juntzan̈ silabꞌ,
syal schiꞌan schibꞌejal nocꞌ nocꞌ sn̈usjitzꞌa silabꞌil chiꞌ ebꞌ.
14 An̈ejtonaꞌ,
icha chiꞌ yaj ebꞌ tzꞌecꞌ yalel vachꞌ abꞌix yic colnabꞌil.
Yujto yalnaccan Cajal Jesús to yovalil scha sgasto ebꞌ dꞌa spatic bꞌaj smunlaj chiꞌ.
15 A in tic,
vachꞌchom ay valan vic in chaan vic yedꞌ ebꞌ,
palta mantalaj juneloc tzin cꞌanaꞌ.
Ton̈ej svalbꞌat juntzan̈ tic dꞌayex,
man̈ yujoc to tzin cꞌan in gasto dꞌayex tzin tzꞌibꞌanbꞌat juntzan̈ tic.
Tzin naꞌa,
más am vachꞌ tzin chami,
dꞌa yichan̈ to tzin cꞌan in gasto dꞌayex.
Yuj jun tic ay valan vic in tzalaj dꞌa yichan̈ Dios.
Malaj mach syal yicꞌanecꞌ jun in tzalajcꞌolal tic.
16 A in tic,
vachꞌchom tzin ecꞌ valel vachꞌ abꞌix yic colnabꞌil,
palta man̈ yujoc chiꞌ syal vicꞌanchaan̈ in bꞌa,
yujto yovalil tzin ecꞌ valeli.
Te obꞌiltac in,
tato max in ecꞌ valel jun vachꞌ abꞌix tic.
17 Qꞌuinaloc tato in munlajel yaji,
yovalil am tzin cha in tojol.
Palta svaleli yujto vibꞌan̈ yaj valaneli.
Yujto a Dios acꞌjinac jun vopisio tic.
18 Yuj chiꞌ,
a jun spac van in chaan ticnaic,
aton tzalajcꞌolal yujto ix in ecꞌ valel vachꞌ abꞌix dꞌa nabꞌan̈ej.
Yuj chiꞌ vachꞌchom ay valan vic in cꞌanan in gasto dꞌa spatic vopisio tic,
palta malaj tas tzin cꞌanaꞌ.
19 Vachꞌchom malaj yalan yic anima dꞌayin,
palta svacꞌoch in bꞌa vacꞌan servil ebꞌ smasanil,
yic vachꞌ tzijtum ebꞌ ol in montejoch yicoc Cristo.
20 Ayic ay in ecꞌ dꞌa scal ebꞌ vetisraelal,
icha sbꞌeybꞌal ebꞌ,
icha pax chiꞌ svutej in bꞌeybꞌal,
yic ay ebꞌ tzin montejochi.
A ebꞌ chiꞌ,
ay val och spensar ebꞌ dꞌa ley Moisés.
Yuj chiꞌ,
ayic ay in ecꞌ yedꞌ ebꞌ,
vachꞌchom man̈ ayoc och in pensar dꞌa jun ley chiꞌ yedꞌ ebꞌ,
palta tzin cꞌanabꞌajej,
yic tzin montejoch ebꞌ.
21 Axo yic ay in ecꞌ dꞌa scal ebꞌ man̈ israeloc,
aton ebꞌ max yacꞌoch spensar dꞌa jun ley chiꞌ,
lajan svutej in pensar yedꞌ ebꞌ,
yic ay ebꞌ ol in montejochi.
Palta masanil tiempo,
yovalil tzin cꞌanabꞌajej sley Dios,
yujto ayoch in pensar dꞌa sley Cristo ticnaic.
22 Ayic ay in pax ecꞌ dꞌa scal ebꞌ manto tecꞌanoc,
lajan svutej in bꞌa yedꞌ ebꞌ.
Ichato manto in tecꞌanoc paxi,
yic ay ebꞌ tzin montejochi.
Yaln̈ej mach ebꞌ bꞌaj tzin eqꞌui,
lajann̈ej svutej in bꞌa yedꞌ ebꞌ smasanil,
yic talaj icha chiꞌ ay ebꞌ ol colchajcanel vuuj.
23 Jantacn̈ej juntzan̈ tzin cꞌulej tic,
yuj vachꞌ abꞌix yic colnabꞌil tzin cꞌulej,
yic ay pax svachꞌil ol in cha yuuj.
24 Qꞌuinaloc tato ay ebꞌ ayoch dꞌa junoc tajnel ticnaic,
a carrera syacꞌ ebꞌ.
Eyojtacxo,
vachꞌchom syacꞌ carrera chiꞌ ebꞌ smasanil,
palta an̈ej jun mach sbꞌabꞌlaj cꞌochi,
a jun chiꞌ schaan spac.
Yuj chiꞌ,
ichocabꞌ syutej sbꞌa ebꞌ tzꞌacꞌan carrera chiꞌ,
yovalil icha chiꞌ scutej co bꞌa dꞌa yic Cristo,
sec yuj chiꞌ ol co cha spac quic junjun on̈.
25 A jantacn̈ej ebꞌ tzꞌoch dꞌa jun tajnel chiꞌ,
syil val sbꞌa ebꞌ dꞌa masanil tas malaj svachꞌil.
Icha chiꞌ syutej sbꞌa ebꞌ,
yujto an̈ej yuj jun chiꞌ scha spac ebꞌ.
Palta a spac scha ebꞌ chiꞌ,
junn̈ej rato tzꞌeqꞌui.*
Axo pax spac quic ol co cha a on̈ tic,
malaj bꞌaqꞌuin̈ ol lajvoc eloc.
Yuj chiꞌ,
yovalil squil val co bꞌa.
26 A inxo tic,
icha junoc mach tzꞌacꞌan carrera chiꞌ,
syacꞌ val yip yic syacꞌ ganar,
icha chiꞌ svutej in bꞌa dꞌa yic Dios.
Icha ebꞌ stajni dꞌa macꞌval,
smacꞌvaj val ebꞌ yic syacꞌ ganar,
icha chiꞌ svutej in bꞌa a in tic.
27 Tzin cach pax och vaan in nivanil tic.
Svil val in bꞌa sicꞌlabꞌil.
Yujto vachꞌchom tzijtum ebꞌ bꞌaj ix valel slolonel Dios,
palta tato max vil in bꞌa,
ay smay tzin paticajcaneli.