A juntzan̈ silabꞌ tzꞌacꞌji dꞌa juntzan̈ comon dios
8
A ticnaic,
sval yuj juntzan̈ tas tzꞌacꞌji silabꞌil dꞌa juntzan̈ comon dios,
slajvi chiꞌ schiji paxi.
Yel toni,
cojtac co masanil to malaj vachꞌ yoch juntzan̈ comon dios chiꞌ,
palta tato an̈ej dꞌa tas cojtac chiꞌ scacꞌoch co pensar,
squicꞌchaan̈ co bꞌa yuuj.
Axo tato sco xajanej ebꞌ yicxo Dios syicꞌ stecꞌanil ebꞌ cuuj.
2 A ebꞌ jelan snaani,
palta max cꞌochlaj ijan snaan ebꞌ icha sgana Dios.
3 Palta a ebꞌ xajanabꞌil Dios yuuj,
ojtacabꞌil pax ebꞌ yuj Dios chiꞌ.
4 A ticnaic ol val yuj juntzan̈ tas schiji ayic toxo ix altajoch dꞌa juntzan̈ comon dios.
A juntzan̈ comon dios chiꞌ,
cojtac to malaj jabꞌoc vachꞌ yoch dꞌa yolyibꞌan̈qꞌuinal tic,
yujto junn̈ej Dios ay,
malaj chavan̈ oxvan̈oc.
5 Ay juntzan̈ comon dios,
tzꞌecꞌ dꞌa satchaan̈ yedꞌ dꞌa yolyibꞌan̈qꞌuinal tic.
Yujto a ebꞌ anima,
man̈ jantacoc juntzan̈ tas syacꞌoch ebꞌ sdiosaloc,
yajaliloc.
6 Palta a on̈xo tic,
junn̈ej co Diosal,
aton co Mam.
A co Mam chiꞌ,
aton bꞌojinac masanil tasi.
A bꞌojinac on̈ paxi,
yic vachꞌ sco chꞌoxel svachꞌil.
Junn̈ej pax Cajal,
aton Jesucristo.
Yuuj ayecꞌ masanil tasi.
Yuuj ayon̈ pax ecꞌ a on̈ tic.
7 Palta man̈ masaniloc ebꞌ yicxo Dios snachajel juntzan̈ tic yuuj.
Ay ebꞌ cꞌajanto yedꞌ juntzan̈ comon dios chiꞌ.
Yuj chiꞌ,
ayic schiꞌan chibꞌej ebꞌ,
yicn̈ej juntzan̈ comon dios chiꞌ snaan ebꞌ.
Yujto a jun spensar ebꞌ tzꞌacꞌan cuenta chiꞌ,
manto tecꞌanoc.
Yuj chiꞌ tzꞌixtax spensar ebꞌ ayic schiꞌan juntzan̈ chibꞌej chiꞌ ebꞌ.
8 Palta a juntzan̈ tas sco chiꞌa,
max on̈ schꞌolbꞌitejlaj Dios yuuj.
Man toc yujto sco chiꞌa más vachꞌ on̈,
an̈ejtonaꞌ,
tato max co chiꞌa,
man̈ on̈ chucoclaj.
9 Vachꞌchom libre co chiꞌan masanil tasi,
palta ay smay cuuj sjuviel ebꞌ manta stecꞌanil.
Yuj chiꞌ yovalil squil val co bꞌa.
10 A exxo snachajel eyuuj to man̈ chucoclaj schiji juntzan̈ chiꞌ,
palta ay ebꞌ manto tecꞌcꞌaj val,
manto yojtacoc jun tic ebꞌ.
Qꞌuinaloc syil ebꞌ to tzex em cꞌojan vael bꞌaj ay juntzan̈ syaloch ebꞌ anima sdiosaloc.
Tato icha chiꞌ,
tze montejbꞌat spensar ebꞌ,
axo schiꞌan pax ebꞌ juntzan̈ silabꞌ tzꞌacꞌji yicoc juntzan̈ comon dios chiꞌ.
11 Tato icha chiꞌ tzeyutej e bꞌa,
sjuviel ebꞌ manta stecꞌanil chiꞌ eyuuj.
Palta ina to yuj ebꞌ ix champax Cristo.
12 Yuj chiꞌ,
a ebꞌ mantalaj stecꞌanil chiꞌ,
tato eyuuj tzꞌixtaxel spensar ebꞌ,
a dꞌa Cristo tzꞌoch e mul.
13 Yuj chiꞌ,
qꞌuinaloc ay junoc mach tzꞌixtax spensar yuj junoc tas tzin chiꞌa,
tato icha chiꞌ,
más vachꞌ maxtzac in chi juntzan̈ chibꞌej chiꞌ,
yic vachꞌ malaj junoc ebꞌ sjuviel vuuj.