Yalnaccan vin̈aj Pablo yuj ebꞌ tzꞌoch yetbꞌeyum
7
Ol valbꞌat yuj juntzan̈ tas e cꞌanbꞌejnac dꞌa jun e carta dꞌayin.
Vachꞌ toni tato ay ebꞌ vin̈ max och yetbꞌeyum.
2 Palta ay smay sayan ajmulal ebꞌ vin̈.
Yuj chiꞌ,
vachꞌ tzꞌoch yetbꞌeyum ebꞌ vin̈.
Yedꞌ pax ebꞌ ix ix,
vachꞌ tzꞌoch yetbꞌeyum ebꞌ ix.
3 A exxo ay ix eyetbꞌeyum,
tzeyacꞌ sgana ebꞌ ix eyetbꞌeyum chiꞌ,
yujto eyetbꞌeyum e bꞌa.
An̈ejtonaꞌ,
icha chiꞌ tzeyutej e bꞌa a ex ix ex ayxo vin̈ eyetbꞌeyum.
4 Yujto malaj yalan yic jun e nivanil chiꞌ schꞌocoj.
A vin̈ eyetbꞌeyum chiꞌ ay yalan yic dꞌay.
An̈ejtonaꞌ,
icha pax chiꞌ ex ay ix eyetbꞌeyum,
malaj yalan yic jun e nivanil chiꞌ schꞌocoj.
A ix eyetbꞌeyum chiꞌ ay yalan yic dꞌay.
5 Yuj chiꞌ,
yovalil tze cꞌanabꞌajej tas sgana ebꞌ ix e yetbꞌeyum dꞌayex.
An̈ej,
tato jun tzꞌaj e pensar tzeyactancan jun chiꞌ jayeoc cꞌual,
yic vachꞌ tzex lesalvi dꞌa Dios dꞌa smasanil e cꞌool.
Slajvi yecꞌbꞌat jayeꞌ cꞌual chiꞌ,
junn̈ej tzex ajxicani,
yic vachꞌ max ex juviel yuj vin̈ Satanás.
Yujto ay smay,
max yal e cachan och vaan e nivanil chiꞌ.
6 A juntzan̈ svalbꞌat tic dꞌayex,
man̈ checnabꞌiloc.
Ton̈ej svalbꞌat dꞌayex icha tic,
yic vachꞌ syal e cꞌulan juntzan̈ chiꞌ.
7 A in tic,
tzin naꞌa to vachꞌ max och eyetbꞌeyum e masanil icha in tic.
Palta chꞌocchꞌoc co pensar junjun on̈ yuj Dios,
yujto ay ebꞌ yovalil tzꞌoch yetbꞌeyum.
Ay pax ebꞌ man̈ yovaliloc.
8 Svalanpaxbꞌat juntzan̈xo tic dꞌayex,
a ex manto och eyetbꞌeyum yedꞌ ex chamnacxo eyetbꞌeyum.
Vachꞌ ama tzex cann̈ej e chꞌocoj,
icha in tic.
9 Palta tato max techaj eyuj e chꞌocoj,
ochocabꞌ eyetbꞌeyum.
Yujto vachꞌ tzꞌoch eyetbꞌeyum,
yic max e nibꞌej em e bꞌa ajmulal.
10 A exxo ayxo eyetbꞌeyum,
ol valbꞌat juntzan̈ checnabꞌil tic dꞌayex.
A juntzan̈ checnabꞌil tic,
man̈ vicoc,
yic Cajal Jesús:
A ex vanabꞌ ex,
max yal-laj e pucan e bꞌa yedꞌ vin̈ eyetbꞌeyum.
11 Palta tato ay junoc ix spuc sbꞌa yedꞌ vin̈ yetbꞌeyum,
yovalil scann̈ej ix ichn̈ej taꞌ.
An̈ej yedꞌ vin̈ yetbꞌeyum ix chiꞌ syal yicꞌlanxi sbꞌa junelxo.
An̈ejtonaꞌ,
icha ex pax chiꞌ ex vucꞌtac ex,
max yal-laj e pucan e bꞌa yedꞌ ix eyetbꞌeyum.
12 Ay pax juntzan̈ exxo,
ay junxo ol valbꞌat dꞌayex.
Palta man̈ schecnabꞌiloc Cajal Jesús juntzan̈ tic,
yujto munil tzin naelta dꞌa yol vicoꞌ.
Tato ay junoc vin̈ cucꞌtac max och ix yetbꞌeyum creyenteal yedꞌoc,
palta tato ay sgana ix tzꞌaj yedꞌ vin̈,
max yal-laj spucan sbꞌa vin̈ yedꞌ ix.
13 An̈ejtonaꞌ,
tato ay junoc ix canabꞌ max och vin̈ yetbꞌeyum creyenteal yedꞌoc,
palta tato sgana vin̈ syicꞌ sbꞌa yedꞌ ix,
max yal-laj spucan sbꞌa ix yedꞌ vin̈.
14 Yujto a vin̈ yetbꞌeyum ix chiꞌ,
vachꞌchom man̈ creyenteoc vin̈,
ichato yic Dios yaj vin̈ yedꞌ ix,
yujto junn̈ej yaj vin̈ yedꞌ ix creyente chiꞌ.
An̈ejtonaꞌ icha pax chiꞌ junoc ix man̈ creyenteoc,
ichato yic Dios yaj ix,
yujto junn̈ej yaj ix yedꞌ vin̈ creyente chiꞌ.
Tato man̈ yicoc Dios yaj ebꞌ,
axo yuninal ebꞌ,
comon animan̈ej am yaj ebꞌ.
Palta maay,
yic pax Dios yaj ebꞌ.
15 Palta tato a jun man̈ creyenteoc chiꞌ sgana spucan sbꞌa yedꞌ jun creyente chiꞌ,
spucocabꞌ sbꞌa ebꞌ.
Tato icha chiꞌ,
axo jun creyente chiꞌ,
libre tzꞌajcani.
Max mulanlaj dꞌa icha chiꞌ,
yujto sgana Dios to juncꞌolaln̈ej tzon̈ aji.
16 Yujto a ex vanabꞌ ex,
man̈ eyojtacoc tato ol colchajel vin̈ eyetbꞌeyum chiꞌ,
yujn̈ej eyicꞌlan e bꞌa yedꞌ vin̈.
An̈ejtonaꞌ ex vucꞌtac ex ay eyetbꞌeyum,
man̈ eyojtacoc tato ol colchajel ix eyetbꞌeyum chiꞌ,
yujn̈ej eyicꞌlan e bꞌa yedꞌ ix.
17 Junjun on̈,
a tas cajcan yuj Cajal Jesús ayic ix on̈ yavtanoch Dios yicoc,
tzon̈ cann̈ej ichn̈ej taꞌ.
Icha chiꞌ svutej pax valan dꞌa ebꞌ creyente dꞌa junjun iglesia.
18 Yuj chiꞌ,
tato ayex chabꞌilxo jun yechel circuncisión dꞌa e nivanil ayic ix ex yavtanoch Dios yicoc,
max yal e cꞌubꞌaneli to chabꞌilxo jun chiꞌ eyuuj.
An̈ejtonaꞌ,
tato ayex man̈ chabꞌiloc jun yechel chiꞌ eyuuj,
ayic ix ex yavtanoch yicoc,
maxtzac yal-laj e chaan ticnaic.
19 Taxon̈ej chabꞌil jun yechel circuncisión chiꞌ cuuj,
mato maay,
malaj yelcꞌochi.
Palta ay val junxo te nivan yelcꞌochi to sco cꞌanabꞌajej icha sgana Dios.
20 Más vachꞌ tzon̈ can junjun on̈ ichataxon caji,
ayic ix on̈ yavtanoch Dios yicoc.
21 Tato ay ex,
ayex och checabꞌvumal ayic ix ex yavtanoch Dios yicoc,
man̈ ex och ilcꞌolal.
Palta tato syal e colanelta e bꞌa dꞌa yol scꞌabꞌ vin̈ tzeyacꞌ servil chiꞌ,
más vachꞌ tzeyacꞌ eyip e colanelta e bꞌa.
22 Yujto a mach ayoch checabꞌvumal ayic tzꞌavtajoch yicoc Cajal Jesús,
vachꞌchom manto libreoc yelta bꞌaj smunlaj chiꞌ,
palta libre yicꞌjielta dꞌa yol scꞌabꞌ chucal yuj Cajal Jesús.
Palta axo mach yic sbꞌa ayic tzꞌavtajoch yicoc Cristo chiꞌ,
a ticnaic checabꞌ yaj dꞌa Cristo.
23 A on̈ tic,
manbꞌil on̈xo yuj Dios.
Yuj chiꞌ,
maxtzac yal co chon̈an co bꞌa dꞌa ebꞌ anima yic tzon̈ can dꞌa yalan̈ smandar ebꞌ dꞌa juneln̈ej.
24 Yuj chiꞌ,
ex vucꞌtac ex vanabꞌ,
a dꞌa yichan̈ Dios,
vachꞌ tzon̈ can junjun on̈ ichataxon caji,
ayic ix on̈ yavtanoch yicoc.
25 A ex manto och eyetbꞌeyum,
malaj junoc schecnabꞌil Cajal Jesús ol valbꞌat dꞌayex.
A tas ol valbꞌat tic dꞌayex,
munil tzin na dꞌa yol vicoꞌ.
Palta a tas svalaꞌ,
ochocabꞌ yopisio eyuuj,
yujto ix ocꞌ scꞌool Dios dꞌayin,
ix yacꞌan vopisio tic.
26 Yuj juntzan̈ yaelal van sja dꞌa quibꞌan̈ tic,
tzin naꞌa to vachꞌ tzon̈ can junjun on̈ ichataxon caji.
27 Yuj chiꞌ,
a ex ayxo ix eyetbꞌeyum,
man̈ e say tas tzeyutej e pucan e bꞌa.
A exxo mantalaj ix eyetbꞌeyum,
vachꞌ ama tato max e say ebꞌ ix.
28 Palta tato ayex tzeyacꞌoch ix eyetbꞌeyum,
man̈ muloclaj.
Yedꞌ ex pax cobꞌestac ex,
man̈ muloclaj tato tzeyacꞌoch vin̈ eyetbꞌeyum.
Palta a ebꞌ tzꞌoch yetbꞌeyum,
más ol yil syaelal ebꞌ dꞌa yolyibꞌan̈qꞌuinal tic.
Yuj chiꞌ svalbꞌat juntzan̈ tic dꞌayex,
yujto in gana max ja juntzan̈ yaelal tic dꞌa eyibꞌan̈.
29 Ex vucꞌtac ex vanabꞌ,
a junxo tic sval dꞌayex:
A tiempo jabꞌxon̈ej ticnaic,
yuj chiꞌ,
a ebꞌ vin̈ ay ix yetbꞌeyum,
max yal-laj an̈ej dꞌa ix yetbꞌeyum ebꞌ vin̈ chiꞌ syacꞌoch spensar.
30 A ebꞌ scusi,
max yal-laj an̈ej jun scuselal ebꞌ chiꞌ snaꞌa.
Yedꞌ ebꞌ stzalaji,
max yal-laj an̈ej jun stzalajcꞌolal ebꞌ chiꞌ snaꞌa.
Yedꞌ ebꞌ smanvaji,
man̈ocn̈ejocabꞌ taꞌ syacꞌoch spensar ebꞌ.
31 An̈ejtonaꞌ ebꞌ syamcꞌabꞌan juntzan̈ tas ay dꞌa yolyibꞌan̈qꞌuinal tic,
max yal-laj an̈ej dꞌa juntzan̈ chiꞌ syacꞌoch spensar ebꞌ,
yujto a jun yolyibꞌan̈qꞌuinal squil tic,
vanxo slajvi eqꞌui.
32 In gana to max ex och ilcꞌolal.
A vin̈ quelemto,
an̈ej dꞌa juntzan̈ tas stzalaj Cajal Jesús yedꞌoc,
an̈ej taꞌ syacꞌoch spensar vin̈.
33 Axo vin̈ ayxo ix yetbꞌeyum,
a val tas ay dꞌa yolyibꞌan̈qꞌuinal tic sna vin̈.
Yujto sna vin̈ tas syutej yacꞌan tzalajbꞌoc scꞌool ix yetbꞌeyum chiꞌ.
34 Yuj chiꞌ chabꞌ tzꞌaj spensar vin̈.
An̈ejtonaꞌ,
man̈ lajanoc ix ayxo vin̈ yetbꞌeyum yedꞌ ix cobꞌesto.
Yujto a ix cobꞌes chiꞌ,
an̈ej dꞌa juntzan̈ tas stzalaj Cajal Jesús yedꞌoc,
a sna ix,
yujto syacꞌ val snivanil ix yicoc Dios yedꞌ spensar.
Axo ix ayxo vin̈ yetbꞌeyum,
a val tas ay dꞌa yolyibꞌan̈qꞌuinal tic snaubꞌtan̈ej ix,
yujto sna ix tas syutej yacꞌan servil vin̈ yetbꞌeyum ix chiꞌ.
35 Svalbꞌat juntzan̈ tic dꞌayex,
palta man̈ yujoc ex in cachanoch vaan svalanbꞌati.
Palta svalbꞌati yic vachꞌ tzeyutej e bꞌa.
Yujto in gana tze cꞌanabꞌajej tas sgana Cajal Jesús,
tzeyacꞌanpax servil dꞌa smasanil e cꞌool.
36 A ticnaic svalbꞌat dꞌayex a ex mamabꞌil ex,
yujto ay ex ay ebꞌ ix eyisil stiempoalxo yoch vin̈ yetbꞌeyum.
Tato tze naꞌa to vachꞌ tzꞌoch yetbꞌeyum ebꞌ ix,
tato tzeyilaꞌ to ay smay scan ebꞌ ix,
ujocabꞌ icha e gana.
Ochocabꞌ yetbꞌeyum ebꞌ ix,
yujto a jun chiꞌ,
man̈ muloclaj.
37 Palta tecan ayex ay ebꞌ ix eyisil man̈ yovaliloc tzꞌoch yetbꞌeyum.
Libre eyaj e cꞌulan icha e gana.
Tato tecꞌan tzeyutej e bꞌa e naan yuj ebꞌ ix eyisil max e cha ochlaj yetbꞌeyum chiꞌ,
vachꞌ ton tze cꞌulej.
38 Yuj chiꞌ,
a ebꞌ tzꞌacꞌanoch yetbꞌeyum ebꞌ ix yisil,
vachꞌ ton scꞌulej ebꞌ.
Axo ebꞌ max acꞌanoch yetbꞌeyum ebꞌ ix,
más vachꞌ scꞌulej ebꞌ.
39 A junoc ix ix ay vin̈ yetbꞌeyum,
yacbꞌan pitzanto vin̈,
ichato tzecꞌbꞌil ix yedꞌ vin̈ yuj sleyal Dios.
Axo tato scham vin̈ jun,
libre tzꞌajxican ix.
Syal yicꞌlan sbꞌa ix yedꞌ junocxo vin̈ bꞌaj scan sgana ix,
an̈ej tato creyente vin̈.
40 Palta tzin na a in tic,
más vachꞌ yic ix tato maxtzac yicꞌ junocxo vin̈ vinac ix.
Tzin naꞌa to a Yespíritu Dios ayoch vedꞌoc svalan juntzan̈ tic.