A ebꞌ syacꞌ queja sbꞌa dꞌa ebꞌ yajal
6
Ix vabꞌi to ay oval dꞌa e cal,
tobꞌ bꞌat eyacꞌlajoch e bꞌa dꞌa alcal.
¿Tas yuj tze tecꞌbꞌej e bꞌa e bꞌat dꞌa vin̈ alcal man̈ creyenteoc chiꞌ?
¿Tas yuj man̈oc dꞌa ebꞌ yicxo Dios tzex bꞌat e bꞌo yaji?
2 ¿Tom man̈ eyojtacoc to a on̈ yic on̈xo Dios tic,
ol co chꞌolbꞌitej tas yaj ebꞌ yic yolyibꞌan̈qꞌuinal tic?
Yuj chiꞌ smoj a on̈ sco bꞌo yaj juntzan̈ chequel yaj tic.
3 ¿Tom maxto nachajel eyuuj to a on̈ tic,
ol co chꞌolbꞌitej tas yaj ebꞌ ángel?
Yuj chiꞌ,
a juntzan̈ tas ay dꞌa yolyibꞌan̈qꞌuinal tic,
smoj co bꞌoan yaji.
4 Ayic ay juntzan̈ oval dꞌa e cal,
¿tas yuj a dꞌa ebꞌ malaj yopisio yuj iglesia bꞌat e bꞌo yaji?
5 Svalbꞌat juntzan̈ tic dꞌayex,
yic vachꞌ tzex qꞌuixvieli.
¿Tom malaj junoc mach dꞌa e cal snachajel yuuj sbꞌoan yaji?
¿Tom malaj junoc mach syal sbꞌoan yaj dꞌayex a ex creyente exxo?
6 Ina ayex bꞌat eyujej e bꞌa dꞌa yichan̈ ebꞌ vin̈ yajal,
palta man̈ creyenteoc ebꞌ vin̈.
7 Ayic tzeyacꞌlanoch dꞌa eyibꞌan̈ chiꞌ,
tzꞌoch e mul dꞌa yichan̈ Dios.
Tato ay junoc ebꞌ yicxo Dios man̈ vachꞌoc syutej sbꞌa dꞌayex,
tzoc eyacꞌ val techajoc.
Tato ay mach tzꞌelcꞌan junoc tas dꞌayex,
aqꞌuec nivancꞌolal.
8 Palta ina ayex man̈ vachꞌoc tzeyutej e bꞌa.
Ina ayex elcꞌumex.
Icha pax chiꞌ tzeyutej e bꞌa dꞌa ebꞌ eyucꞌtac dꞌa ebꞌ eyanabꞌ.
9-10 ¿Tom manto eyojtacoc to a ebꞌ man̈ vachꞌoc syutej sbꞌa,
malaj yalan yic ebꞌ scꞌoch dꞌa yol scꞌabꞌ Dios?
Man̈ eyacꞌ musansatil e bꞌa.
A ebꞌ scomon em dꞌa mul,
ebꞌ tzꞌem cuman dꞌa juntzan̈ comon dios,
ebꞌ ayxo yetbꞌeyum tzꞌem dꞌa ajmulal,
ebꞌ syixtej sbꞌa yedꞌ ebꞌ yetvinaquil.
An̈ejtonaꞌ,
pax ebꞌ elcꞌum,
ebꞌ syiloch scꞌool dꞌa junocxo,
ebꞌ ucꞌum an̈,
ebꞌ bꞌajvajum yedꞌ ebꞌ scomon tocꞌanecꞌ junoc tas dꞌa yetanimail,
aton ebꞌ man̈ ol cꞌochlaj dꞌa yol scꞌabꞌ Dios.
11 Ay ex icha chiꞌ ix eyutej e bꞌa dꞌa yalan̈taxo.
Axo ticnaic,
icꞌbꞌilxo el e mul quedꞌoc.
Acꞌbꞌil exxo och yicoc Dios quedꞌoc.
A Dios chiꞌ tzꞌalani to vachꞌ on̈xo dꞌa yichan̈.
Icha chiꞌ tzon̈ aj yuj Cajal Jesucristo ticnaic yedꞌ pax yuj Yespíritu co Diosal.
A co nivanil yicn̈ej Dios yaji
12 Tecan ayex tzeyalaꞌ:
A on̈ tic,
libre co cꞌulan masanil tasi,
xe chi.
Yel toni,
palta man̈ smojoc co cꞌulan smasanil.
Yel toni,
libre co cꞌulan juntzan̈ chiꞌ smasanil,
palta malaj junoc tas bꞌaj syal cacꞌan co bꞌa,
yic tzon̈ yacꞌ mandar.
13 Tecan ay ex pax tzeyalaꞌ:
A tas co vaꞌa yic co cꞌool yaji,
yujto a co cꞌool tic,
a ay yic pax juntzan̈ chiꞌ,
xe chi.
Yel toni,
palta a Dios ol acꞌan lajvoquel juntzan̈ chiꞌ smasanil.
A co nivanil tic,
man̈ yicoc ajmulal,
palta to a Cajal Jesús ay yicoꞌ.
A Cajal Jesús chiꞌ,
stan̈vumal yaji.
14 Yuj chiꞌ icha yutejnac Dios yacꞌan pitzvocxi Cajal Jesús,
icha chiꞌ ol yutoc on̈ yacꞌanxi pitzvoc yuj spoder.
15 Ina eyojtacxo to a co nivanil tic,
icha junoc macan̈ snivanil Cristo yaji.
Yuj chiꞌ,
¿tom syal quicꞌanbꞌat junoc macan̈ snivanil chiꞌ,
bꞌat cacꞌanoch yetbꞌeyumoc junoc ix ajmul ix,
yic junxon̈ej tzꞌaj yedꞌ ix?
16 Eyojtacxo to a junoc mach syicꞌlaj sbꞌa yedꞌ junoc ix ajmul ix,
junxon̈ej nivanil tzꞌajcan yedꞌ ix.
Yujto icha chiꞌ syal dꞌa Slolonel Dios Tzꞌibꞌabꞌilcani,
aton bꞌaj syal icha tic:
A ebꞌ schavan̈il,
junxon̈ej nivanil tzꞌajcan ebꞌ,
xchi.
17 Palta ayic scacꞌanoch co bꞌa dꞌa Cajal Jesús,
junxon̈ej animail tzon̈ ajcan yedꞌoc.
18 Yuj chiꞌ tzeyicꞌ val el e bꞌa dꞌa jun ajmulal chiꞌ.
Yujto yaln̈ej tas juntzan̈xo chucal scꞌulej ebꞌ anima,
man̈oc yedꞌ snivanil ebꞌ scꞌulej.
Palta a ebꞌ tzꞌem dꞌa ajmulal chiꞌ,
yedꞌ snivanil ebꞌ smulani.
19 Palta eyojtacxo to a co nivanil tic,
stemplo Espíritu Santo yaji.
A ayoch cajan dꞌayon̈,
yujto a Dios acꞌjinacoch dꞌayon̈ junjun on̈.
Man̈xo quicoclaj co bꞌa ticnaic,
20 yujto manbꞌil on̈xo eli.
Yuj chiꞌ,
quicꞌocabꞌ chaan̈ Dios yedꞌ co nivanil tic.