Jun ajmul schꞌolbꞌitaj yaji
5
Ix vabꞌi to ay jun vin̈ te ajmul dꞌa e cal.
Tobꞌ ix yicꞌ ix schabꞌil snun vin̈.
A jun chiꞌ,
te chuc.
A dꞌa scal ebꞌ manto ojtannacoc Dios,
malaj jun chiꞌ.
2 Eyojtac to icha chiꞌ ix scꞌulej vin̈,
palta an̈ejaꞌ eyicꞌanchaan̈ e bꞌa.
Smoj val to tzex och ilcꞌolal yuuj.
A jun vin̈ ix cꞌulan jun chucal chiꞌ,
yovalil tzeyiqꞌuel vin̈ dꞌa e cal.
3 A inxo tic,
vachꞌchom man̈ in ayoc ecꞌ eyedꞌ taꞌ,
palta ichato ay in val ecꞌ eyedꞌoc.
Yuj chiꞌ,
toxo ix in bꞌeytzitej tas yaj jun vin̈ chiꞌ,
yujto ichato ay in ecꞌ eyedꞌ taꞌ.
4 Yuj chiꞌ,
ayic tze molbꞌan e bꞌa dꞌa sbꞌi Cajal Jesús taꞌ yedꞌ yipalil yacꞌan mandar,
a inxo tic,
ichato ol in cꞌoch eyedꞌoc.
5 Axo jun vin̈ chiꞌ,
acꞌjocabꞌcan och vin̈ dꞌa yol scꞌabꞌ vin̈ Satanás,
yic ol satcanel snivanil vin̈,
yic vachꞌ ol colchaj vin̈ ayic ol jax Cajal Jesús.
6 Yuj jun chucal dꞌa e cal chiꞌ,
man̈ smojoc tzeyicꞌchaan̈ e bꞌa.
¿Tom man̈ eyojtacoc to a jabꞌoc yich pan,
spajbꞌibꞌat ixim pan chiꞌ smasanil yuuj?
7 A juntzan̈ co bꞌeybꞌal dꞌa yalan̈taxo,
lajan icha yich pan chiꞌ.*
Yuj chiꞌ actejeccan juntzan̈ e bꞌeybꞌal chiꞌ yic icha chiꞌ ol aj e yoch icha ixim pan to malaj jabꞌoc spaltail,
aton ixim svaji dꞌa qꞌuin̈ chiꞌ.
Yujto val yel icha ex chiꞌ dꞌa yichan̈ Cristo,
yujto a ix cham co qꞌuexuloc,
icha nocꞌ calnel smiljicham yicoc silabꞌ ebꞌ israel yic snaancot ebꞌ tas aj yelnaccot ebꞌ dꞌa Egipto.
8 Mocabꞌ co nacot schamel chiꞌ dꞌa scal chucal.
Yovalil dꞌa stojolal sco nacoti,
yujto a chucal yedꞌ ajmulal lajan yedꞌ yich pan chiꞌ.
9 Valnacxobꞌat dꞌa jun in carta dꞌayex to max yal-laj junn̈ej tzon̈ ecꞌ yedꞌ ebꞌ scꞌulan ajmulal.
10 Man̈ yujoc ebꞌ ajmul dꞌa yolyibꞌan̈qꞌuinal tic svalbꞌati.
An̈ejtonaꞌ ebꞌ syiloch scꞌool dꞌa junocxo,
ebꞌ elcꞌum yedꞌ ebꞌ tzꞌem cuman dꞌa juntzan̈ comon dios,
tato yic yolyibꞌan̈qꞌuinal tic ebꞌ,
man̈ yujoc ebꞌ svalaꞌ to max yal-laj jun tzon̈ ecꞌ yedꞌ ebꞌ.
Yacbꞌan ayon̈ ecꞌ dꞌa yolyibꞌan̈qꞌuinal tic,
ol co cꞌumlaj co bꞌa yedꞌ ebꞌ,
yujto ayon̈ ecꞌ dꞌa scal ebꞌ.
11 Palta a jun valnacxobꞌat dꞌayex,
syalelcꞌochi tato ay ebꞌ tzꞌalani to creyente ebꞌ,
palta chuc sbꞌeybꞌal ebꞌ,
man̈xo toc syal junn̈ej tzex ecꞌ yedꞌ ebꞌ.
A ebꞌ sval chiꞌ,
aton ebꞌ tic:
Ebꞌ ajmul,
ebꞌ syiloch scꞌool dꞌa junocxo,
ebꞌ tzꞌem cuman dꞌa juntzan̈ comon dios,
ebꞌ bꞌajvajum,
ebꞌ ucꞌum an̈ yedꞌ ebꞌ elcꞌum.
A ebꞌ icha chiꞌ sbꞌeybꞌal,
tato syal ebꞌ to creyente ebꞌ,
vachꞌchom ton̈ej tzon̈ va yedꞌ ebꞌ,
max yal-laj.
12-13 Yujto a ebꞌ yic yolyibꞌan̈qꞌuinal tic,
malaj calan quic co chꞌolbꞌitan tas yaj ebꞌ,
yujto a Dios ol chꞌolbꞌitan ebꞌ.
Palta a ebꞌ creyente,
yovalil sco chꞌolbꞌitej tas yaj ebꞌ.
Yuj chiꞌ,
a jun vin̈ chuc chiꞌ,
pechequel vin̈ dꞌa e cal taꞌ.