A smunlajel ebꞌ schecabꞌ Jesucristo
4
Man̈ eyacꞌoch e pensar dꞌayon̈,
yujto yacꞌumaln̈ej servil Cristo caji.
A copisio to scacꞌ cꞌaybꞌaj juntzan̈ scꞌaybꞌubꞌal Dios,
aton juntzan̈ schꞌoxnac dꞌayon̈.
2 A mach scha yopisio,
yovalil jichan syutej smunlaj dꞌa jun tzꞌacꞌan yopisio chiꞌ.
3 Palta a in tic,
max in ochlaj ilcꞌolal tato a ex tzin e bꞌeytzitej yuj jun vopisio tic.
Vachꞌchom chꞌoc juntzan̈xo ebꞌ tzin bꞌeytzitani,
palta malaj jabꞌoc tzin naꞌa.
An̈ejtonaꞌ in,
max yal-laj in bꞌeytzitan in bꞌa yuj jun vopisio tic.
4 Vachꞌchom a in pensar tzꞌalani to malaj jabꞌoc in paltail,
man̈ yujoc chiꞌ syal valani to malaj in paltail dꞌa yichan̈ Dios,
yujto an̈ej Cajal Jesús syal schꞌolbꞌitan tas vaji.
5 Yuj chiꞌ,
max yal-laj e chꞌolbꞌitan yaj junocxo mach ticnaic.
An̈ej to tze tan̈vej sja Cajal Jesús,
yujto aꞌ ol chꞌoxanel masanil tastac.
Icha tzꞌaj scheclajel junoc tas cꞌubꞌabꞌilel dꞌa scal qꞌuicꞌalqꞌuinal ayic scꞌoch saquilqꞌuinal dꞌay,
icha chiꞌ ol aj scheclaj masanil tastac taꞌ.
A Cajal Jesús chiꞌ ol acꞌan checlajoc tas ay dꞌa co pensar co masanil.
Ato val taꞌ ol yal co vachꞌil Dios,
ato syalaꞌ tas co munlajel junjun on̈.
6 Ex vucꞌtac ex vanabꞌ,
ix valbꞌat juntzan̈ tic dꞌayex,
tas vaji yedꞌ tas pax yaj vin̈aj Apolos chiꞌ,
yic vachꞌ snachajel juntzan̈ cꞌaybꞌubꞌal tic eyuuj.
Yujto a in tic yedꞌ vin̈,
chꞌoxnabꞌil caj dꞌayex,
yic vachꞌ tzeyojtaquejeli to max yal-laj eyecꞌ dꞌa yibꞌan̈ tas syal Slolonel Dios Tzꞌibꞌabꞌilcani.
Yujto max yal-laj eyicꞌanchaan̈ e bꞌa yuj tas syal yuj junoc mach,
axo junocxo mach max yal yuuj tze patiquejeli.
7 Malaj junoc on̈ syal quicꞌanchaan̈ co bꞌa,
yujto ecꞌal copisio dꞌa junocxo,
yujto a tas syal cuuj,
a Dios tzꞌacꞌan dꞌayon̈.
Yuj chiꞌ,
max yal-laj quicꞌanchaan̈ co bꞌa yuuj.
Max yal-laj calani to munil quicoꞌ,
yujto a Dios chiꞌ tzꞌacꞌan dꞌayon̈.
8 A exxo tic,
¿tom tzꞌacan exxo e naani?
¿Tom e chanacxo masanil yic Dios e naan ticnaic?
Tecan yajal exxo e naani.
Palta a on̈xo pax tic,
man̈ on̈ yajaloclaj eyedꞌoc.
Comonoc to dꞌa val yel yajal ex,
yic a on̈ tic,
tzon̈ ochpax yajalil chiꞌ eyedꞌoc.
9 Tzin naꞌa to ix schꞌox Dios to a on̈ schecabꞌ on̈ Cristo tic,
slajvubꞌxo caji.
Icha yaj junoc anima ayxo och chamel dꞌa yibꞌan̈,
icha chiꞌ caji.
Axo ebꞌ anima dꞌa yolyibꞌan̈qꞌuinal tic yedꞌ ebꞌ ángel,
ton̈ej tzꞌoch qꞌuelan ebꞌ,
sat scꞌool ebꞌ on̈ yilani.
10 Ichato malaj co pensar dꞌa yichan̈ anima,
yujto ayoch co pensar dꞌa Cristo.
Palta a exxo tic,
te jelan exxo dꞌa yic Cristo e naani.
Cojtac to man̈ on̈ tecꞌanoc.
A exxo tic,
ichato te tecꞌan exxo.
A on̈ tic,
tzon̈ spatiquejel ebꞌ anima.
Palta a exxo tic,
te ay val eyelcꞌoch dꞌa sat ebꞌ.
11 An̈ejtonaꞌ ticnaic,
ay bꞌaj ya tzon̈ ecꞌ yuj vejel yedꞌ yuj taquin̈tial.
Malaj pax co pichul.
Ay bꞌaj tzon̈ smacꞌ ebꞌ anima.
Malaj pax co pat.
12 Tzꞌel val quip co munlaj yedꞌ co cꞌabꞌ tic.
Ay mach tzon̈ bꞌuchani,
palta sco cꞌancot svachꞌcꞌolal Dios dꞌa yibꞌan̈ ebꞌ.
Ay bꞌaj syacꞌoch yaelal ebꞌ dꞌa quibꞌan̈,
palta scacꞌn̈ej techajoc.
13 Syal co pecal ebꞌ,
te chuc syal ebꞌ,
palta te emnaquil scutej co bꞌa cacꞌan yabꞌix ebꞌ.
A dꞌa yolyibꞌan̈qꞌuinal tic,
icha cꞌalem,
icha chiꞌ caj dꞌa ebꞌ anima.
An̈ejtonaꞌ masanto ticnaic,
icha canlemal anima cajcan dꞌa yichan̈ ebꞌ.
14 Man̈ yujoc ex vacꞌan qꞌuixvelal tzin tzꞌibꞌejbꞌat juntzan̈ tic dꞌayex.
Palta tzex in cachaꞌ,
yujto icha junoc vuninal te xajan vuuj icha chiꞌ eyaji.
Icha chiꞌ eyaj vuuj ticnaic.
15 Vachꞌchom ay lajun̈eoc mil ebꞌ e cꞌaybꞌumal tzex cꞌaybꞌan dꞌa yic Cristo,
palta junn̈ej jun icha e mam yaji.
A in ton tic,
icha mamabꞌil vaj dꞌayex,
yujto a in in bꞌabꞌlaj alejnac el vachꞌ abꞌix dꞌayex taꞌ.
16 Yuj chiꞌ,
tzin tevi dꞌayex to tze cꞌanabꞌajej val in bꞌeybꞌal tic.
17 Yuj val jun tic,
tzin checbꞌat vin̈aj Timoteo tic dꞌayex.
Icha val to vuninal yaj vin̈ dꞌa yichan̈ Cajal Jesús.
Te xajanabꞌil vin̈ vuuj,
tzin scꞌanabꞌajej val vin̈.
A vin̈ ol bꞌat alan dꞌayex,
ol e naancoti tas ix vutej in bꞌeybꞌal ayic ix vacꞌanoch in pensar dꞌa Cristo.
Icha svutej in cꞌaybꞌan ebꞌ creyente dꞌa junjun iglesia,
icha chiꞌ ol yutoc vin̈ ex scꞌaybꞌanxi.
18 Ay abꞌ jayvan̈ ebꞌ syicꞌchaan̈ sbꞌa dꞌa e cal,
yujto a snaan ebꞌ to man̈xo ol in bꞌat ex vilaꞌ.
19 Palta a tzꞌaj in naani to toxo ol in bꞌat ex vilaꞌ,
tato icha chiꞌ sgana Cajal Jesús.
Ato taꞌ ol vilaꞌ tato yel ay tas syal yuj ebꞌ,
ma to ton̈ej syal ebꞌ.
20 Yujto man̈ yujocn̈ej junoc tas scalaꞌ scheclajeli to ayon̈xo och dꞌa yol scꞌabꞌ Dios.
Palta tato ayoch spoder Dios chiꞌ quedꞌoc,
yel ayon̈xo och dꞌa yol scꞌabꞌ.
21 Palta a ticnaic,
¿bꞌaja junoc tas e gana sbꞌat in bꞌo dꞌayex?
¿Tom e gana bꞌat vacꞌoch e yaelal yuj e mul?
¿Mato e gana bꞌat in chꞌoxeli to xajan ex vuuj,
nanam bꞌat vutej in bꞌa dꞌayex?