Quetmunlajvumal co bꞌa dꞌa yic Dios
3
Ex vucꞌtac ex vanabꞌ,
ayic ix in ecꞌ dꞌa e cal,
maj yal-laj valan dꞌayex icha svutej valan dꞌa ebꞌ scꞌanabꞌajan Yespíritu Dios.
Yujto a e pensar tzex acꞌan mandar,
ichato unin exto dꞌa yic Cristo.
2 Lajanexto icha junoc neneꞌ unin maxto yal svaan ixim vail.
Yuj chiꞌ,
icha tzꞌutaj yacꞌji chunoc junoc neneꞌ unin,
icha chiꞌ ix vutej valan juntzan̈ cꞌaybꞌubꞌal dꞌayex.
An̈ej juntzan̈ cꞌaybꞌubꞌal man̈ ajaltacoc ix ecꞌ val dꞌayex,
yujto a juntzan̈ cꞌaybꞌubꞌal ya,
maxto techaj eyuuj.
Palta an̈ejtonaꞌ icha ex taꞌ ticnaic,
3 yujto an̈ejaꞌ a e pensar tzex acꞌan mandar.
Ina an̈ejaꞌ ay e chichoncꞌolal,
an̈ejaꞌ e gana tze poj e bꞌa.
Yuj chiꞌ syalelcꞌochi to an̈ejaꞌ e pensar tzex acꞌan mandar.
Lajan val tzeyutej e bꞌa yedꞌ ebꞌ manto ojtannacoc Dios.
4 Yujto ayex tzeyalaꞌ:
A in tic,
yic in vin̈aj Pablo,
xe chi.
Ay ex pax tzeyalaꞌ:
Yic in vin̈aj Apolos,
xe chi.
Ayic tzeyalan icha chiꞌ,
syalelcꞌochi to te lajan e pensar yedꞌ ebꞌ manto ojtannacoc Dios.
5 ¿Tom ay velcꞌoch a in Pablo in tic?
An̈ejtonaꞌ vin̈aj Apolos chiꞌ,
¿tom ay yelcꞌoch vin̈?
Yujto a on̈ tic,
yacꞌumaln̈ej servil Dios caji.
Cuuj eyacꞌnacoch Cajal Jesús dꞌa e cꞌool.
Ton̈ej tzon̈ munlaj junjun on̈,
ato syalaꞌ tas copisio ix yacꞌaꞌ.
6 A in tic,
ayic ix in ecꞌ dꞌa e cal,
ichato ix in ecꞌ vavejcan juntzan̈ in̈at.
Axo vin̈aj Apolos chiꞌ,
ichato a vin̈ ix acꞌanoch yalil.
Palta a Dios ix ex acꞌan qꞌuibꞌoc.
7 Yuj chiꞌ,
a ebꞌ tzꞌavani yedꞌ ebꞌ tzꞌacꞌanoch yalil,
malaj yelcꞌoch ebꞌ.
An̈ej Dios ay yelcꞌochi,
yujto a tzꞌacꞌan qꞌuibꞌoc.
8 A ebꞌ tzꞌavani yedꞌ ebꞌ tzꞌacꞌanoch yalil,
lajann̈ej yelcꞌoch smunlajel ebꞌ chiꞌ.
Palta ol scha spac ebꞌ dꞌa Dios,
ato syalaꞌ jantac smunlajel junjun ebꞌ.
9 Yuj chiꞌ a on̈ tic,
quetmunlajvumal co bꞌa cacꞌan servil Dios.
A exxo,
icha yaj juntzan̈ avbꞌen chiꞌ eyaj dꞌa yichan̈ Dios.
An̈ejtonaꞌ,
icha yaj junoc pat van sbꞌoan Dios,
icha chiꞌ eyaji.
10 A inxo tic,
icha yaj junoc ojtannac sbꞌoan pat,
icha chiꞌ vaj yuj svachꞌcꞌolal Dios.
A in tic,
ayic vecꞌnac dꞌa e cal taꞌ ichato ecꞌ vacꞌnac em yipumal yich junoc pat.
Axo ticnaic,
chꞌocxo mach van smunlaj dꞌa e cal.
Yuj chiꞌ ichato van yacꞌanqꞌue xan dꞌa yibꞌan̈ jun yich chiꞌ.
A junjun mach smunlaj taꞌ,
yovalil syil ebꞌ tas syacꞌqꞌue ebꞌ dꞌa yibꞌan̈ chiꞌ.
11 Malaj junocxo mach syal yacꞌanem junocxo yich dꞌa e cal taꞌ,
yujto a jun yich ayxoem chiꞌ,
aton Jesucristo.
12 Axo ebꞌ smunlaj dꞌa jun munlajel chiꞌ,
ay ebꞌ te vachꞌ smunlaji.
Ichato a qꞌuen oro,
qꞌuen plata yedꞌ juntzan̈xo qꞌuen te caro stojol syacꞌqꞌue ebꞌ dꞌa yibꞌan̈,
yujto te vachꞌ smunlaj ebꞌ.
Ay pax ebꞌ man̈ vachꞌoc smunlajel.
Ichato a te teꞌ syacꞌlabꞌej ebꞌ,
an̈ ac,
teꞌ aj,
icha chiꞌ juntzan̈ syacꞌqꞌue ebꞌ dꞌa yibꞌan̈.
13 Palta a co munlajel junjun on̈ ol checlajeloc ayic ol ja scꞌual schꞌolbꞌitaji.
Icha junoc cꞌacꞌ sjavi,
icha chiꞌ ol aj yilji co munlajel junjun on̈,
a to syalaꞌ tom vachꞌ,
mato maay.
14 A ebꞌ man̈ ol tzꞌabꞌat smunlajel chiꞌ,
aton ebꞌ chiꞌ ol chaan spac.
15 Palta ay pax ebꞌ malaj svachꞌil smunlajel.
Icha junoc pat,
a an̈ ac ayoch yichtacoc,
cꞌun stzꞌabꞌati,
icha chiꞌ ol aj smunlajel ebꞌ chiꞌ ayic ol iljoc.
Yuj chiꞌ,
malaj jabꞌoc spac ol scha ebꞌ.
Ol colchaj ebꞌ,
palta icha tzꞌaj junoc scolchajelta dꞌa scal cꞌacꞌ,
icha chiꞌ ol aj scolchaj ebꞌ.
16 ¿Tom man̈ eyojtacoc to stemplo Dios eyaji,
axo Yespíritu cajan ecꞌ dꞌa e cal e masanil?
17 Tato ay mach sjuanel stemplo Dios chiꞌ,
a Dios chiꞌ ol satanpaxeloc.
Yujto a stemplo chiꞌ,
yicn̈ej yaji.
A stemplo sval tic,
a ex toni.
18 Malajocabꞌ mach syacꞌ musansatil sbꞌa.
Tato ayex tze naꞌa to jelan ex dꞌa yic yolyibꞌan̈qꞌuinal tic,
yovalil tzeyiqꞌuemta e bꞌa,
ichato malaj tas eyojtac,
yic vachꞌ ol yacꞌ e jelanil Dios.
19 Yujto a jelanil yic yolyibꞌan̈qꞌuinal tic,
malaj yelcꞌoch dꞌa yichan̈ Dios.
Yujto icha chiꞌ yaj stzꞌibꞌchajcan dꞌa Slolonel Dios,
aton bꞌaj syal icha tic:
A ebꞌ jelan syutej sbꞌa,
a Dios ol yaman ebꞌ dꞌa scal sjelanil chiꞌ,
xchi.
20 Syalanpax junxo tic:
Yojtac Dios Cajal to a tas sna ebꞌ jelan,
toxon malaj jabꞌoc yelcꞌochi,
xchicani.
21 Yuj chiꞌ,
max yal eyacꞌanoch e pensar dꞌa junoc anima yic tzeyicꞌchaan̈ e bꞌa yuuj.
Yujto masanil tas syacꞌ Dios eyiquej.
22 Vachꞌchom a in Pablo in tic,
ma vin̈aj Apolos,
ma vin̈aj Pedro,
jun yolyibꞌan̈qꞌuinal tic,
co qꞌuinal,
chamel,
juntzan̈xo tas ay ticnaic yedꞌ juntzan̈ tas toto ol javoc,
masanil syacꞌ Dios eyiquej yuj e vachꞌiloc.
23 A ex tic,
yic exxo Cristo quedꞌoc.
Axo Cristo chiꞌ,
a Dios ay yicoꞌ.