An̈ej yabꞌixal Cristo yalnaquel vin̈aj Pablo
2
Ex vucꞌtac ex vanabꞌ,
ayic ix in ecꞌ valel yabꞌixal Dios te yel dꞌa e cal,
man̈ jelanoc ix vutej in loloni.
Man̈oc juntzan̈ lolonel syal ebꞌ jelan ix ecꞌ valeli.
2 Yujto ayic ix in ecꞌ dꞌayex,
ix in na to malaj junocxo tas svacꞌ eyojtaquejeli.
An̈ej val yabꞌixal Jesucristo ix ecꞌ valel dꞌayex,
to ix cham dꞌa teꞌ culus.
3 Ayic ix in ecꞌ taꞌ,
icha junoc anima malaj yelcꞌochi,
icha chiꞌ ix vutej in bꞌa.
Ix in ibꞌxiqꞌue yuj xivelal.
4 Ix in nibꞌej to man̈oc in ix ex in montej.
Yuj chiꞌ ayic ix in lolon eyedꞌoc,
ix valan eyabꞌi.
Man̈ jelanoc ix vutej in bꞌa ayic ix valan dꞌayex.
A Yespíritu Dios,
montannac ex yedꞌ spoder Dios chiꞌ.
5 Yuj chiꞌ,
man̈ yujoc sjelanil anima van eyacꞌanoch Dios dꞌa e cꞌool ticnaic,
palta yujn̈ej spoder chiꞌ.
A Espíritu tzꞌacꞌan cojtaquejeli chajtil yaj Dios
6 Palta axo dꞌa ebꞌ creyente tecꞌanxo,
ay jun jelanil svalel dꞌa scal ebꞌ.
A jun jelanil svalel chiꞌ,
man̈ yicoc yolyibꞌan̈qꞌuinal tic,
man̈oc pax dꞌa ebꞌ yajalil yolyibꞌan̈qꞌuinal tic scoti,
yujto a juntzan̈ tic,
toxo ol lajvoqueloc.
7 Palta a jun jelanil svalel chiꞌ,
aton sjelanil Dios.
A jun jelanil chiꞌ,
max nachajel yuj ebꞌ anima,
yujto cꞌubꞌabꞌilel dꞌa ebꞌ.
A Dios najinacxocan jun tic yuj co vachꞌiloc,
ayic manto sbꞌo yolyibꞌan̈qꞌuinal tic.
8 Malaj junoc ebꞌ yajal snachajel jun tic yuuj.
Qꞌuinaloc tato ix nachajel yuj ebꞌ,
maj am yacꞌoch Cajal Jesús ebꞌ te nivan yelcꞌoch dꞌa teꞌ culus.
9 Palta syal dꞌa Slolonel Dios Tzꞌibꞌabꞌilcan icha tic:
Ay val jun tas sbꞌonaccan Dios,
yic syacꞌ dꞌa ebꞌ xajanani.
Manta junoc mach tzꞌilan jun chiꞌ,
manta pax mach tzꞌabꞌani.
Malaj pax junoc mach syal snaaneli,
xchicani.
10 Palta a Dios tzꞌacꞌan cojtaquejel juntzan̈ tic yuj Yespíritu.
Yujto a Yespíritu chiꞌ tzꞌojtacanel masanil tasi.
A juntzan̈ tas yic Dios,
max nachajel yuj anima,
palta axo Yespíritu Dios chiꞌ yojtac.
11 A dꞌa scal anima,
malaj junoc mach ojtannac tas yaj spensar junocxo anima.
Yujto munil cojtac junjun on̈ tas ay dꞌa co pensar.
Icha pax chiꞌ Dios,
an̈ej Yespíritu ojtannac tas snaꞌa.
12 A on̈ tic,
man̈oclaj espíritu yic yolyibꞌan̈qꞌuinal tic co chanac.
Palta a jun Espíritu cotnac dꞌa Dios,
a jun chiꞌ co chanac.
Yuj chiꞌ,
a juntzan̈ tas syacꞌ Dios dꞌayon̈ yuj svachꞌcꞌolal,
snachajel cuuj.
13 A juntzan̈ lolonel scal tic,
man̈ yujoc co jelanil snachajel cuuj.
Palta a Yespíritu Dios tzꞌacꞌan nachajel cuuj.
A juntzan̈ cꞌaybꞌubꞌal tic,
yic Yespíritu Dios chiꞌ.
Yuj chiꞌ,
a ebꞌ bꞌaj ayochi,
aton ebꞌ syal co cꞌaybꞌani.
14 A ebꞌ man̈ ayococh Yespíritu Dios dꞌay,
max yacꞌoch juntzan̈ cꞌaybꞌubꞌal tic ebꞌ dꞌa scꞌool,
yujto malaj tzꞌoch dꞌa ebꞌ.
Max yal-laj scomon nachajel juntzan̈ tic yuj ebꞌ,
yujto an̈ej Yespíritu Dios chiꞌ tzꞌacꞌan cojtaquejeli.
15 Palta a ebꞌ bꞌaj ayxo och Yespíritu Dios chiꞌ,
syal schꞌolbꞌitan tas yaj masanil tastac ebꞌ,
tato vachꞌ dꞌa yichan̈ Dios,
mato maay.
Palta malaj junoc anima syal schꞌolbꞌitan tas yaj ebꞌ.
16 Yujto tzꞌibꞌyajcan dꞌa Slolonel Dios:
¿Tom ay val junoc mach ojtannac tas sna Dios Cajal?
¿Toc ay junoc mach ol yal scꞌaybꞌani?
xchicani.
Palta a on̈xo tic,
ayxo och spensar Cristo dꞌayon̈.